2 LENGTE 25 - PATHIAN LEKHABU THIANGTHO (BSI)

Judai Gam Pûkna leh Saltânna

¹ Babulon Lengpa Nebukadnezar a hung lal ah kipat, a kum kuana ah tha sawmna, zia tha ni sawm a hung tin ni tak ah chun, ama tawh a sepaite chu Jerusalem bulu dingin a hung tau a; panmun a siam ua a kikul chak tau a; khawpi chu a kîmvêl suak kêi in kul in a hung khak khum tau a.

² Tichun, Zedekiah lalna kum sawm leh khat a hung tinna takah chun khawpi chu lak in a hung um tai.

³ Tichun, a tha li’na, a ni kua tin ni kipat chun kial huaisia tak in zia khawpi chun a hung tung tai; mipite nêk ding bangmacha a um ta puai.

⁴ Ziaphatchun, khawpi kulbâng mun khat a phevang ua, Lengpa tawh a sepaite chu zia jan ah chun Lengpa huan pâm ah, kulbâng thua ni kikâl ah chia in kul kotkhak ah Kaldaite, amau ûm kîmvêlte lak chu hawtheng in a taidok ua, Arabah lam zuan in a tai pek tau a.

⁵ Ahi’n, Kaldai sepaite chun Lengpa chu a delzui ua, Jeriko phâijawl ah chun a delpha tau a: Ziaphatchun, a sepaite chun jamsan sik sek tau hi.

⁶ Tichun, Lengpa chu a man ua; Riblah lam ah Babulon Lengpa kiang in a pui tung tau ah; a chung thu vaihawmna a hun nei tau ah, a chung thu a thupûkna gual tak un,

⁷ ama mit mu ngei ah chun a chate chu a hun that ua, ziazaw chun Zedekiah mit chu a hun khel daw piak in, sum-eng thikkol busak in, Babulon lam in a kâi tau hi.

⁸ Chun, a tha nga’na, ni sagi’na chun, zia chu Babulon Lengpa Nebukadnezar a lal kum sawm leh kua’na a ti’n in, zia kum ma chun Babulon Lengpa vêng ah pang sepaite hotu, Nebuzaradan chu Jerusalem lam in a hung a;

⁹ Jerusalem ah In zosia, Lalpa In tawh, lal In tawh, a milianteu In haw zosia tawh le a hung hâltum sik sek tai.

¹⁰ Ziaphatchun, Lengpa vêng ah pang sepai hotu lawi ah um, Kaldai sepaite haw chun Jerusalem kulbâng zosia chu a hun phejak tau a.

¹¹ Ahi’n, zia khawpi mi a nutsia sunteu tawh, a jamjakna lam ua thi kha lo ah Babulon Lengpa â dingah a la kipethei zosia tawh, mipi vantangte lak ah a thibang sunte chu Lengpa vêng ah pang sepai hotu Nebuzaradan chun sal in a pui mang tai.

¹² Himaleh, Lengpa vêng ah pang sepai hotu chun, a gam ah michaga khenkhatte chu zia gam ah grep um sunte enkol ding leh a ga haw sûk ah pang dingin a nusia tai.

¹³ Chuleh, Lalpa In ah sum-eng khuamte, a bul kingakna haw tawh, sum-eng kuang haw tawh, Lalpa In ah a la um, Kaldai sepaite’n a la suksiat uh haw zosia chu a chomkhawm ua, Babulon lam in a paw tau hi.

¹⁴ Bêlte, lei luaknate, thaumei phita puan che’nate, gimtui hâlna kuangte, thik haikhawte, sum-eng ûm leh bêlte zosia, biakna van mat zosia chu a pawdok sik sek ua.

¹⁵ Mei koina kuangte, tui koina kuangte, sana ah kisiam thuamthil haw zosia, sana, dangkati thuam thilte leh dangka haw tawh, zia vêngtu sepai hotu chun a paw mang sik sek a.

¹⁶ Lalpa In ah mat ding ah Solomon in a la siam, khuam panite, kuangpi leh a tunna; zia sum-eng haw hi a bûk ah bûk sên lo khop ah tam ahi.

¹⁷ A khuam pakhat sândan chu tong sawm leh giat ahi; chunglam a bawkna sia chu sum-eng ngen ahi: zia a bawk chuamna sia chule tong thum a hi; zia a bawk chu khutthiam tak ah kijem, theibufaiga lim a kîmvêl ah kitiang a hia, ziate chule sum-eng ngen ah kibawl a hia: zia gual ma chun, a khuam pani’na zawk chule a kijemna pha takah kibawl ahi kit hi.

¹⁸ Lengpa veng ah pang sepai hotu chun thiampu lianpen pakhat, Seraiah tawh a nuai ah thiampu dang pakhat, Zephaniah tawh, kotkhak vêngte pathum tawh le a pui a:

¹⁹ khawpi sung ah mipite lak ah sepai hotu lian pakhat, lengpa vaihawm sepaite lak ah khawpi ah um mi panga leh, lekhazik hotu pen pakhat, a gam mite umdan chanchin he ma ma khat, zia bân ah chun khawpi mi pawsal sawmguk tawh, mi zia cheng chu a pui a:

²⁰ Tichun, vêngtu sepai hotu Nebuzaradan chun mi zia jat chu pui in thuamphua zia jat chu Riblah ah Babulon Lengpa kiang in a hun paw lut tai.

²¹ A tun phat un, Babulon Lengpa chun a mi puite chu a la that ah, Hamath gam ah Riblah mun ngei ah chun a la that sik sek tai. Zia gual tak ah chun Judah chu a gam ua kipat in puak daw in a um tau hi.

Gedaliah Judai Gam Awp ah Panna

²² Lengpa Nebukadnezar in a nutsia sunte, Judai gamah a la um nalai sunte â dingin Ahikam chapa, Shapham chapa Gedaliah chu a lal vaihawm ding un a tungdok a.

²³ Chuleh, sepai hotu zosia tawh, amau leh a sepaiteu tawh, Babulon Lengpa chun a vaihawm ding un Gedaliah a tundaw piak tai ti a hun het phat un, Mizpah ah Gedaliah kiang in a hung ua; ziate chu: Nethaniah chapa Ishmael, Kareah chapa Johanan leh Netophi mi Tishumatha chapa Jaazaniah leh, Maka mi chapa Jazaniah te hi a hiu a; ziate sia chu a sepaiteu sia tawh a kiang in a hung tau a.

²⁴ Gedaliah chu amau leh a sepaiteu ma-âng in a hung kitiam ah, a kiang un, “Kaldai mite nasêmah um ding hi lau kiu inla: zia gam ah hin chêng unla, Babulon Lengpa na hi sêm tau in; chutileh, nangmau haw â dingin phapen ding ahi,” a tia.

²⁵ Himaleh, tha sagi’na chun, Leng Inkuan ah mi Elishama chapa Nethaliah chapa, Ishmael chu a hung ah, pawsal sawm a hun puiah, Gedaliah chu a hung kidelpiu ah, a that ua, Mizpah ah Judah mi um khawmpite chu tawh, Kaldai mi a la um sunte zosia chule a that khawm sik sek tau hi.

²⁶ Ziaphatchun, mi zosia a lian a neu, a sepai hotuteu tawh Kaldaite a lau tâk ziak un, Aigupta lam in a hung sik sek tau hi.

²⁷ Chuleh, Judai gam ah Lengpa Jehoiakim sal ah a kimat nung, kum sawmthum leh sagi a hung tin kum, a tha sawm leh ni’na, ni sawmni leh sagi a hung tin ni chun, Babulon Lengpa Merodakh migilo chun ama leng a hung hi kum ah chun, Judai dam ah Lengpa Jehoiakim chu a suangkul ngakna kipat chun a hun thâdok tai.

²⁸ A kiang ah nunnem tak in thu a gen a; tichun, zia Babulon ah Lengte, a vaihawmpite chu a panmun sâng ua sangzaw chiat in a chutsak ta’n;

²⁹ a suangkul ngâkna puante chu a thendaw piak ah; a dam sung sia chu a ma-âng in ankuang khat a sawk khawmpi den tai.

³⁰ Tichun, a nisi’n law mu ding zat chu a dam sung sia ah dingin a ni a ni ah hisap in, nisi’n in a piak thaw zing tai; zia chu Lengpa sum leh pâi ah kipat in a pia tau hi.