2 LENGTE 24 - PATHIAN LEKHABU THIANGTHO (BSI)

Judai Gam Mêlmate’n A Tawdennau

¹ Jehoiakim hun sung ah chun, Babulon Lengpa Nebukadnezar chu a hung kuan ah, ama chu sal in a man ah, kum thum sung chu a tânsak a: zia nung ah chun ama chu a hung kiphin kit a.

² Lalpa‘n a suak jawlneite mang ah thu a la gen gual khan, Judai gam susia dingin, Kaldai sepai pawl, Aramte sepai pawl, Moab sepai pawl, Ammon chate sepai pawl tawh ama bulu dingin Lalpa ngei chun a hun sawl a.

³ Zia chu Manasseh gitlo ziak ah, Lalpa chun Judah mipite a etthâk zingna kipat chawn mang dingah thu a la piaksa chu a hung guitung ta ngei ahi;

⁴ chuleh, mi bangma suse lo thisan chu a sua a; mi bangma suse lote thisan chu Jerusalem lam ah a dimsak tâk ziakin; zia chu Lalpa‘n a ngaidam nuam ta puai.

⁵ Ahi’n, Jehoiakim nasep dangte leh a thilhite zosia chu Judai gam ah Lengte Khangthu ah chun a kizik ta hilo a hem?

⁶ Tichun, Jehoiakim chu a pu leh pate kiang in a ipmu ta’n; tichun, a chapa Jehoiakhin chun a thasâng in vai a hun hawm tai.

⁷ Babulon Lengpa chun Aigupta lui ah kipat Euphrates lui chanah Aigupta Lengpa thuneina gam chu a lâkpiak tâk ziakin, zia nung sia chu Aigupta Lengpa chu a gam ah kipat in a hung pawtdok kit ta puai.

Jehoiakhin Vaihawmna leh Saltânna

⁸ Jehoiakhin chun vai a hawm pat kum ah chun, ama chu kum sawm leh giat ah upa a hia; Jerusalem ah chun tha thum sung vai a hawm ah. A nu chu Jerusalem ah um, Elnathan chanu Neshushta ahi.

⁹ Ama chunle a pu leh pate thilhi dan a zui ziakin Lalpa mit mu in thil diklo takte chu a bawl a.

¹⁰ Zia hun lai ah chun Babulon Lengpa Nebukadnezar sepaite chun Jerusalem bulu dingin a hung kuan to ua; tichun, zia khawpi chu a hun sim tau a.

¹¹ Tichun, Babulon Lengpa Nebukadnezar chu khawpi do ding ah chun a hung kuan ah, a sepaite chun a lâkpiak tau hi.

¹² Ziaphatchun, Judai gam ah Lengpa Jehoiakhin chu, Babulon Lengpa kiang ah chun, ama tawh, a nu tawh, a suakte tawh, a khawnbawlte tawh, a vaihawmna, kum giat a ti’n kum ah chun Jehoiakhin chu a pui mang tai.

Jerusalem Pûkna

¹³ Tichun, Lalpa‘n a la gensa gual ah khan, Israelte Lengpa Solomon in a la siam, Lalpa biak in Tempul ah sana ûm leh bêl zosia tawh, lengpa In ah go um zosia tawh a hun pawdok sik sek ua, a khen nawi dim dem tau a.

¹⁴ Tichun, Jerusalem ah mi zosiate, lal chi zosiate, mihat minthang zosiate, mi themthiam leh thiksêkte haw tawh, a gam ah migenthei pen pente tilo sia, kuama hawi lo in, mi sîng khat chu sal in a pui mang tai.

¹⁵ Tichun, Jehoiakhin chu Babulon lam ah pui mang in a hung um ta’n; lengpa ji tawh, lengpa nu tawh, a miliante tawh, a gam ah mihatte tawh, a leng un Jerusalem ah kipat Babulon lam ah pui mang in a um suak tau hi.

¹⁶ Tichun, mihat ngen le sang sagi hial a hiu a; mi themthiam haw tawh thiksêkte lawi chu sang khat a hiu a; chutia, mihat ngen leh galdo hat ngen haw chule Babulon Lengpa chun Babulon lam ah chun sal in a la pui tai.

¹⁷ Zia nung ah chun Babulon Lengpa chun Jehoiakhin paneu, Mattaniah chu ama thasâng ah leng in a pansak ah; a min chu Zedekiah ti’n a then piak tai.

Judai Gam ah Zedekiah Vaihawmna

¹⁸ Zedekiah chun vai a hawm pat kum ah chun, kum sawmni leh khat ah upa ahi tai; Jerusalem ah kum sawm leh khat sung vai a hawmah. A nu chu Libnah ah um, Jeremiah chanu Hamutal ahi.

¹⁹ Ama hinle Jehoiakim thil hi’dante kha a etton pek ziakin, Lalpa mit mu ah chun thil diklo tak in a hun bawl kit a.

²⁰ Ziaziakchun, Lalpa lungnatna chu Jerusalem chung ah leh Judah chung ah chun a hung tung ah, a etthâkna kipat a nawdaw masia chu a tawp thei ta pua; tichun, zia Zedekiah chule Babulon Lengpa chung ah chun a hung kiphin pai ngal tai.