2 LENGTE 21 - PATHIAN LEKHABU THIANGTHO (BSI)

Judai Gam ah Manasseh Vaihawmna

¹ Manasseh chun vai a hun hawm pat lai ah chun kum sawm leh ni ah upa a hi bep nalai ah; tichun, Jerusalem ah chun kum sawmnga leh nga sung vai a hawm ah. A nu chu Hephzibah ahi.

² Ama hin Lalpa mit mu ah thil diklo tak a hun bawl ah, Israel chate lak ah kipat Lalpa‘n a la nawdawte umchan chu a la zui ta ahi.

³ Lengpa Ahab gual khan Baal biakna dingin mâichâm a tungding ah, dawikhuam a siam ah; van ah thil um zosia a hun biau ah, a na’teu chu a hun sêm tau ahi.

⁴ Lalpa In sung ah chun pathian dangte hona mâichâm a hun siam ah, Lalpa chun Jerusalem ah ka min umna ding ah ka ti ahi, a ti’na mun ah khan a koi tai.

⁵ Lalpa In pindan pani ah chun van ah thil umte biakna dingin mâichâm a koi dim ziang tai.

⁶ A chapa chu mei ah kithoina’n a mang ah, hunte a chansak ah, âisânte leh ho in a nei sek ah: Lalpa mit mu ah chun nunsiatna huaisia tak takte chu a hun bawldok ta’n, a lungnatna chu a hun chok puang tai.

⁷ David leh a chapa Solomon kiang ah Lalpa chun, “Jerusalem ah, zia In ah hin Israel nam zosia lak ah ka teldawna mun ngei ah hin, kumtuang dai dingin ka min umsak ding ka hi,” a ti’na mun ah, zia Insung ngei ah chun ama khutsuak milim, a suithawteu Asherah chu a hun koi tai.

⁸ “Zia mun chu, Israelte pu leh pate kiang ah ka la piaksa ahiziak in, zia gam ah kipat hin a keng uh suandawsak lo ding ka hi; a kiang ua thu ka piakte a zui zing ua, ka nasempa Mosi’n dan thu a piakte kha tawh kituak ah a khawsak laisiau chu umsak ding ka hi,” a ti’na mun kha a hia.

⁹ Himaleh, a ngaisak nuam ta puau a: Israel chate ma-âng ah Lalpa‘n a suksiat namte sâng ah gitlona huaisia zaw bawl dingin, Manasseh chun a puise zo sik sek tai.

¹⁰ Lalpa chun a suak jawlneite mang in thu a gen a, zia gual hin a gen a:

¹¹ “Judai gam ah Lengpa Manasseh chun gitlona thilbuak tak chu bawl in, Amor mite gitlona sâng ah le nasa zaw hial ah nunsiatna chu bawl in, Judate chu ama milim hosak in a gitlosak ta ahi;

¹² ziaziakchun, Lalpa, Israel Pathian chun zia gual hin a gen hi: ‘Ngai tiam u, Jerusalem leh Judah chung ah siatna huaisia tak hun tunsak ing ka tin, kuale zia thu a la he’kha tapo chu a nakhang langniu thawng kêk thei hial dingin tunsak ding ka hi,’ chuleh;

¹³ Jerusalem chung ah chun Samaria khua leh Ahab Inkuan telneng khai chu kaizan ing ka tin; mi pakhat in kuang a nawt gual mai in Jerusalem chu nawt ing ka tin, nawt lumlet in lekkhup mai ding ka hi.

¹⁴ Ka golua ding ah um, a thibang sunte chule taisan ing ka tin, a mêlmateu khut nuai ah chun silut malam ing ka tin; tichun, a mêlmateu â dingin gâlhingmat leh thalup ding bep hita’n au.

¹⁵ Amau haw chun, ka mit mu ngei ah chun thil gilo chu a bawl ua, ei chok lungso ua, a pu leh pateu hun lai ah Aigupta gam ah kipat a hung pawt ua kipat khan tu’ni tiang in a hâi thei nai diak puau hi,” a tia.

¹⁶ Zia lo chunle, Manasseh hin mi bangma suse lote thisan a sua tam ma ma ziang ah, Jerusalem langkhat lam ah kipat a langkhat lam tiang ah a sukdim masia a bawl ah, Judah a gitlosak le tongkhop lo in, Lalpa mit mu ngei ngei inle thil gilo chu a bawl pek nalai ngal ah, a tia.

¹⁷ Ahi’n, Manasseh nasep dangte leh a thilhi zosia tawh a gitlo bawlsiat zosia tawh, Judai gam ah lengte khangthu a kizik ta hilo a hem?

¹⁸ Tichun, Manasseh chu a pu leh pate kiang in a ipmu ta’n, ama In ûmna huang sung ngei ah chun a vui ua; zia chu Uzza huan kiti kha ahi; a chapa Amon in a thasâng in vai a hun hawm tai.

Judai Gam ah Amon Vaihawmna

¹⁹ Amon chun vai a hawm pat kum ah chun, kum sawmni leh ni ah upa a hita’n; tichun, Jerusalem ah kum ni a vaihawmah. A nu chu Jotbah ah um Haruz chanu, Meshullemeth ahi.

²⁰ Ama hinle Lalpa mit mu ah thil gilo chu, a pa Manasseh bawl gual gual in a hun bawlah.

²¹ Tichun, a pa nunchan chu zui in a hung khawsa pek ah, a pa’n a na a sep piak, a milimte na kha a hun sêmzom pek ah, ziate chu biak pen in a hun nei a.

²² Tichun, a pu leh pate Pathian, Lalpa chu a kihei mangsan tai; Lalpa lampi chu zui khâkna a nei ta him him puai.

²³ Zia lai ah chun, Amon suakte chun, ama chung thu ah chun vai chuam khat a hun sawmgu tau ah; zia dungzui ah chun, lengpa chu ama In lum ngei ah chun a hun that tau ahi.

²⁴ Ahi’n la, a gam mipite chun Lengpa Amon chung thu ah vaisawmgu zosiate chu a hun that kit ua; tichun, a gam mipi chun lengpa chapa Josiah chu ama thasâng ah leng dingin a hun pansak tau hi.

²⁵ Ahi’n, Amon nasep dangte leh thilhite chu Judai gam ah Lengte Chanchin Lekhabu chun a kizik ta hilo a hem?

²⁶ Ama chu a thi phatin, Uzza huan ah chun a vui tau hi; tichun, ama chapa Josiah chu a thasâng ah vaihawm in a hung pang tai.