2 LENGTE 20 - PATHIAN LEKHABU THIANGTHO (BSI)

Hezekiah Damlona leh Damkitna

¹ Zia hun lai ah chun, Hezekiah chu thi tavang hial ah damlo gim ma ma in a um ah. Amoz chapa jawlnei Isai a kiang ah hung in, zia gual hin a hung gen a: “Lalpa‘n zia gual hin a gen hi: ‘La In sung sutûp in, thiding la hi ta’ngal in; damdok talo ding la hi,’ ti’n,” a vagen a.

² Ziaphatchun, Hezekiah in bâng lam nga’n, Lalpa kiang in a pauchap a:

³ “Aw Lalpa, ka lungthim zosia ginum tak ah la mit mu ah ka umdan leh la mit mu ah thilpha bep ka bawl sek dante hi hezing in, ti’n ka hun ni hi,” a tia. Tichun, Hezekiah chu ha-kâ in a kap tai.

⁴ Isai in Lengpa In huang sung a khêlma chun, Isai kiang in Lalpa‘n thu a hun gen a:

⁵ “Kihei kit vak in chia inla, ka mite chung ah hotu Hezekiah kiang in zia gual hin vagen in: Lalpa, la pa David Pathian chun zia gual hin a gen hi: La pauchapna ka la he ta’n, la mitthi tuite le ka la mu tai; hun sudam kit ding ka hi; ni thum zaw tak leh Lalpa In ah chia to ding la hi.

⁶ La damsung kum sawm leh nga hun belap piak ding ka hi. Nangma leh zia khawpi hi Assuriate Lengpa khut ah kipat hukdok ing ka tin, zia khawpi hi keima ngei leh ka nasem David jal in veng bit ding ka hi, va ti’n,” ti’n a sawl a.

⁷ Isai chun, “Theichang ga bawk khat hun lau inla, nêksak unla, a uilut ah chun be’piak un,” a tia. Tichun, a hung dam kit tai.

⁸ Hezekiah in Isai kiang ah chun, “Lalpa‘n ei sudam ngei ding ahi ti tepte’na ding bang a um thei diam, a ni thum ni leh Lalpa In ah chun hang chia leng ka hethei ziang diam?” ti’n a dong a.

⁹ Isai chun, “Zia hi Lalpa ah kipat ah tepte’na la mu ding chu ahi, Lalpa chun thil a gen tâksa chu hun hi ngei ngei ding ahi ngal a: Aleh, nilîm liap hi kalbi sawm kimachawn leh la ti em, ahiloleh, kinungchawn zaw leh la ti em?” a tia.

¹⁰ Hezekiah chun a dawnhu ah, “Limliap a hung kum suk ding chu thil bailam tak ahi’n: Ahiloleh, zia limliap chu a nung lam in kalbi te’na sawm chan hung kinungtawl kit hen,” a tia.

¹¹ Tichun, jawlnei Isai chu Lalpa ma-âng ah chun a hung kiko ah: Tichun, zia limliap chu a nung lam in kalbi sawm chan a hung kinungtawl kit ah, Ahaz hunbî hetna tepte’na tiang chan in a hung kinungtawl tai.

Babulon ah Kipat Palaite

¹² Zia hun lai ah chun Babulon Lengpa Baladan chapa, Berodak-baladan chun thilpiak tawh lekhathot tawh a hun thot ah, ama chun Hezekiah damlo thute a la het ziak ah a hun thot ahi.

¹³ Hezekiah chun amau chu a la lop ma ma ah, a nei leh lam koi zosia, dangkate, sanate, a gimtui mantamte tawh, a sathau mantamte tawh, a galvan koikhawmna In zosia tawh, a go thil muthei zosia tawh: A In ah thil um zosia leh a gam sung ah thil um zosia chu a etsak lo pakhat chale umlo hial in Hezekiah chun a la etsak suak kêi a.

¹⁴ Ziazaw chun, Lengpa Hezekiah kiang in jawlnei Isai a hung ah, a kiang ah chun, “Zia mite hin bang a gen ua a hem? Khawi ah kipat nangma kiang ah hung ziang thei a hiu em?” ti’n a hung dong a. Ziaphat ah chun, Hezekiah chun, “Amau hi gam gamla tak ah kipat hung a hiu in, Babulon lam pek ah hung kipan a hiu,” ti’n a dawnhu a.

¹⁵ Jawlnei chun, “Aleh, la Insung ah khan bang bang a hung muu em?” ti’n a dong kit a. Hezekiah chun, “Ka In ah um zosia a mu suak kei ua: ka go thilte zosia hi a et lo uh pakhat chale a um puai,” ti’n a dawnhu tai.

¹⁶ Ziaphatchun, Isai chun Hezekiah kiang in, “Lalpa thu hi he ta’n.

¹⁷ A la ngai tiam in, a ni hung tung pai ding a hitai; zia hun tak chuleh, la In ah um zosia la pu leh pate’n tu’ni tiang ah a la kholkhawmsateu zosia chu Babulon lam ah puak mang ah um sik sek ding ei tai: bangmacha hun khêk piak pua’n au, Lalpa‘n a ti ahi.

¹⁸ La chapate lak ah hung piang dingte natiang in, nangma ah kipat pui mang in hung um intin uh; tichun, Babulon lengpa In ah chun mi tilge in um ta ding a hiu,” a tia.

¹⁹ Ziazaw chun Hezekiah chun Isai kiang in, “Lalpa thu la gen chu a pha ahi mai hi,” a tia. Tichun, zia gual hin a tia, “Ka dam sung hin thamuanna leh thutak um zing leh pha la sa pua a hem?” a tia.

Hezekiah Thi’na

²⁰ Ahi’n, Hezekiah nasep dangte leh a hatna chanchin haw tawh, dil pakhat a siam dan leh tuikul a bawlte tawh, khawpi sung ah tui a laklut dante kha Judai gam ah lengte khangthu ah kizik ta hilo a hem?

²¹ Tichun, Hezekiah chu a pu leh pate kiang ah a ipmu ta’n; a chapa Manasseh chu a thasâng in a hung pang tai.