2 LENGTE 19 - PATHIAN LEKHABU THIANGTHO (BSI)

Hezekiah in Isai A Dotna

¹ Lengpa Hezekiah chun zia thu chu a het phat in, a puante a bot thêk ah, saidip puan a sil ah, Lalpa In ah chun a lut ngal tai.

² A Inkuan lak ah thuneitu Eliakim chu tawh, dan lam ah mithiam Shebnah tawh, thiampute lak ah upate tawh, saidip puan sil kawm in, Amoz chapa jawlnei Isai kiang in a sawl a.

³ Amau chun a kiang in, “Hezekiah chun zia gual hin a ti ahi: Tu’hun hi lungkhamna hun chu ahi tai; vauna leh demsiatna ka tuak ahi: naupangte hung pianna ding chu a hita hen; himaleh, a piansakna ding in hatna bangmacha a um ta puai.

⁴ Lalpa la Pathian chun Rabshakeh thugente kha a la he ngei intin, Pathian hing simmaw leh hânsia law ding ah Assuria lengpa’n a hun sawlpa thugen kha, Pathian in he ngei ding a hia; nutsia ah um sunte â ding ah hin la pauchapna chu hun habawl ta’n,” a tia.

⁵ Hezekiah sawlchâkte chu Isai kiang in a hung tau a.

⁶ Isai chun a kiang un, “La hotupau kiang ah chun zia gual hin gen un la, Lalpa chun zia gual hin a ti ahi: Thu la hiatte chu launa’n nei him him kin la, Assuria lengpa suakte’n ei demsiatnau chule khawksa him him kin.

⁷ A la ngai leu chin, ama chung ah chun thigua hun hânsak ing ka tin, thuthang khat hun hia’n tin, zia tak chuleh ama gam lam ah chun chia kit ta’n a; himaleh, ama gam sung ngei ah chun chemjam ah pûk nalai ding ahi, ti’n,” a tia.

Senakherib in A Vauna

⁸ Rabshakeh chu a chia kit phatin, Assuria lengpa chun Libnah khua a la sim lai tak a vatuak kha ta’n: Lakish ah kipat ah chun a kipandok hi ti a hiatsa him a hia.

⁹ Ama chun Ethiopia Lengpa Tirhakah a la gennau, “Nangma do ding in a hung kipandok tai,” a tiu chu a la he ta’n. Zia chu a het phat in, Hezekiah kiang in mi pakhat a thu tut dingin a sawl ah, zia gual hin a vagensak a:

¹⁰ Judai gam ah Lengpa Hezekiah kiang in zia gual hin gen in, “La Pathian la kingakna chun Jerusalem chu Assuria lengpa khut nuai in puk lo ding ahi a ti chu taksang kin.

¹¹ Ngai un, Assuria Lengte chun a gam zosiau susia sik sek ah a bawldanteu kha la he ngal a; nang hile hun hukdok diak ding a hem?

¹² Ka pu leh pate’n a suksiatsau namte, Gozante, Harante, Rezephte, Telesar ah um Eden chate haw khale a hukdok thei pathian a um ua a hem?

¹³ Hammath lengte, Arphad lengte, Sapharva-im khawpi ah lengte, Hena leh Ivah te haw kha khawiah um a hitau em?” ti’n thu a thot tai.

Hezekiah Pauchapna

¹⁴ Hezekiah chun zia a mi sawl ah kipat chun zia lekhathot chu a la mu phât in a sim a: Tichun, Hezekiah chu Lalpa In ah a chia to ah, Lalpa ma ah chun a kiphâniam tai.

¹⁵ Hezekiah chu Lalpa kiang in a pauchap ah, zia gual hin a gen a: “Aw Lalpa, Israel Pathian, cherubte chung ah Lalchutpha chupa, Nangma hi Pathian chu la hia, nang bep chu la hi lei ah lenggam zosia chung ah vaihawmpa chu: Nang in van leh lei hi la siam ahi ngal a.

¹⁶ Aw Lalpa, la nakhang chu keima lam in hun daw inla, ei hun ngaitâk piak inla; aw Lalpa, la mit chun ei hun en inla, pha tak in ei hun en tiam in: Pathian hing simmaw ding ah mi hun sawl Senakherib hun thugente hi a leng in la he sik sek ngal a.

¹⁷ A dik tak ah gen in, Aw Lalpa, Assuria lengpa hin namte leh gamte chu a susia ngut sek ngei hi;

¹⁸ a pathian teu chu mei in a hâl tum piak sek ah; ziate chu pathian titâkle a hipaw him ua, mihing khutsuak, thing leh suang haw po a hiu hi.

¹⁹ Ziaziakchun tu’hin, aw Lalpa ka Pathian, lei chung zosia hin nangma bep hi Pathian la hi dan a hun hiattheina ding un, zia mipa khut ah kipat hin ei hukdok ta’n,” a tia.

²⁰ Ziaphatchun, Amoz chapa Isai chun Hezekiah kiang in, “Lalpa Israel Pathian chun zia gual hin a gen hi, Assuria Lengpa Sennakherib do’na ding ah ka kiang ah la pauchap ziak ah hin;

²¹ Lalpa‘n ama chung thuah a gen chu zia hi ahi; Zion chanu nungak thiangtho chun a hun musitah, simmaw tak mai in a hun nuisan ta’n; Jerusalem chanu chun, la nung lam ah a luu a hun thin khum ta ahi.

²² La demsiat ah, a êng êng ah la ho kha kua a hem? Kua dodâlna la aw khati sân sak la hia, Israel Mithiangtho dodâlna ah la bawl ahi kha lam.

²³ La suakte mang in Lalpa chu la engho ah, zia gual hin la ti ahi: ‘Ka sakol kângtalai honpi tawh, tângsâng tak chung lam ah khan ka hung to in, Lebanon gamgil lam pek ah khan hung ding ka hem; zia tak ah chun sidar thing sâng cha cha phuk ing ka tin, la châk thing itchak ma mateu kha hung phuk dingin; a gam tawp lam leiphatna gammâng tiang in, hung lut ding ka hi,’ a tia.

²⁴ Tuikul ding ka chaw piakah, gam dang tui ka hun dawn sak ta’n; keima kengtaw ngei ah ka chotna mun ah, Aigupta lui lian tuite chu hun sukkang piak ding ka hi,

²⁵ malai pek ah keima’n ka geltuaksa, la dinmun hi; tuanah tâng ah keima guatlawksate, ahi lam helo la hem? Tu’hin zia tiang pi’hin ka hun pui tung ta’n, khawpi kul det tak suchim ah, a kulpi siatna kisiavumte chu tawh.

²⁶ Ziaziakchun a sung ah umte chu, hatna neucha bep nei in a um ua, amau chu lungdong leh mualpho sek a hiu kha: tichun, loulai hampa tawh bang mai in, hampa hing mai mai gual leh, Inchung ah hampa kekte gual mai leh, a khandaw ma’ mangthai kitte gual mai la hiu.

²⁷ Himaleh, keima’n la dindaw leh la chut, la lut la pawt leh ka chungah, la lungnat dante le ka he sik sek hi.

²⁸ Ka chung ah la lungnat ziakin, la kam hawithaw tak chu ka nakhang in a lut ah, ziaziakchun, la nak ah chun, ka ngakuai ka hun thun ta’n, la mûk ah chun kam kaina ka hun bul piak hi, tichun, la hung kipatna lam ah khan, hun nung kai kit ding ka hi,” a tia.

²⁹ Chuleh, zia hi nang â dingin tepte’na hi’n a: Tu’kum chu bu a likek ga ne’n la tiu in, a kum ni’na leh a sel kit ga hun ne’n la tiu in: a kum thumna leh chu bu chi chu tu’ ta’n la tiu in, ât in la tiu in, grepte chu hun phu in la tiu in, a ga ne ta’n lau.

³⁰ Zia tak chuleh, Judah Inkuan ah mi a suakcha sunte chun zung hun tha suk kit intiu in, a lek lam ua chun ga hun sua in au.

³¹ Jerusalem ah kipat chun a thibang sun chu tawh, Zion tâng ah kipat suakcha sunte chu pawtdok ta’n au: sepai honte Lalpa phatchuam ngaina chun zia chu hun bawl ding ahi.

³² Ziaziakchun, Lalpa chun Assuria lengpa chung thu ah chun, zia gual hin a gen hi: “Ama chu zia khawpi ah hin hung lut pua’n tin, a thalpi le hun kâp pua’n ah, a phawte le hun paw lut pua’n tin, a do dingin hung kitiang diak pua’n au.

³³ A hungna lampi ma ma chun kile’kit intin, zia khawpi ah hin hung lut paw mawng mawng inah, Lalpa‘n a ti ahi.

³⁴ Keima ziakin zia khawpi hi, keima ngei in humbit ing ka tin; ka suak David jal ah chun humbit ding ka hi, a tii,” ti’n a gen a.

Sennakherib Thi’na

³⁵ Zia jan ma ma’ chun, Lalpa vansawlchâk a hung ah, Assuria mite kikulna mun ah sepaite nuai khat leh sîng giat leh sang nga a that ah; jingkal khawvak phatin, a thisa ngen a la hitau hi.

³⁶ Ziaphatchun, Assuria Lengpa Sennakherib chu a kipan ah, a chia ta’n; a nung lam ah a kile’kit veng veng ah, Nineveh khua’ chun a va chêngden tai.

³⁷ Chuleh, a pathian Nisrokh biakna In ah a pathian ho ah a um lai in, a chapate Adramelekh tawh Sharezer chun chemjam in a vathat ua; zia phat ah chun, amau chu Ararat gam lam in a jam mang tau hi: tichun, a chapa Esarhadon chu ama thasâng ah vaihawm in a hung pang tai.