2 LENGTE 17 - PATHIAN LEKHABU THIANGTHO (BSI)

Israel Gam ah Hoshea Vaihawmna

¹ Judai gam ah Lengpa Ahaz vaihawmna kum sawm leh ni tin kum in, Elah chapa Hoshea chu Samaria ah Israelte chung ah leng in a hung pangah, kum kua sung vaihawm in a pang man hi.

² Ahi’n, ama hin Lalpa mit muah thil diklo takte chu a hun bawl ah, ahi ziakin, a malam ah Israel lengte gual lawm lawm vang ahi puai.

³ Zia lai ah chun Assuria Lengpa Shalmaneser chu ama do dingin a hung kuan to ah, Hoshea chu a thunuai in a koi ziang ta’n, ziaphat ah chun thilpiakte chu a hun pia tai.

⁴ Ahi’n, Israelte Lengpa Hoshea chun dawha bawl in, Aigupta Lengpa So kiang in a guk in thu a thot ah; zia kipat chun Assuria Lengpa kiangah, leiman a piak sek chule a pia ta puai. Himaleh, Hoshea dawha chu a hetdaw phatin, suangkul in a khum tai.

Assuria Gam ah Israel Sal ah Puina

⁵ Ziazaw chun Assuria lengpa chun a gam zosia chu a hung bulu’ to ah, Samaria chu a hung tung in, kum thum sung chu a nuaisia tai.

⁶ Hoshea leng ahi kum kua ahi’na chun, Assuria lengpa chun Samaria chu a hun la, Israelte chu Assuria lam ah chun sal in a pui mang ah; Gozan luilian pâm ah Halah mun leh Habor mun leh Mede khawpite ah chun a umsak tai.

⁷ Zia gual chun, Israelte chun Aigupta gam ah Lengpa Pharaoh khut nuai ah pat puidokpa, Lalpa a Pathian chung un thil gilo a hun bawl kit ua; pathian dang a hun ho kit tau hi.

⁸ Israel lengte puakdaw kawm chawndan thak a jui tau hi.

⁹ Chuleh, Israelte chun a guk in Pathian doilo gual in thil diklo a bawl ua; amau â dingin khawpi kulnei leh gâlvênbûk tiang in thoimual a kibawl tau hi.

¹⁰ Thingbuk nuai leh tâng sâng sâng ah te chun milim siamkawm a kikoi chel chul ziang tau a.

¹¹ Thoimual tinte chun gimtuite chu a hun hâl ua, a ma-âng ua Lalpa‘n a la lakmang sate, khawvel mite thilhi dan zosia a hun hiu a, Lalpa lungnatna choktho ding thilte chu a hun bawl zaw tau hi.

¹² Lalpa‘n a kiang ua, “La bawl lo hial diu ahi,” a la ti’sa chu bawl in, a hapan ma ma ziang tau hi.

¹³ Lalpa chun, Israel leh Judah chung thu ah chun, jawlnei zosia leh thil mu lawk theite zosia chu mang in, “La umchan phaloteu chu kiheisan un la, la kiang ua ka hun sawl, ka suak jawlneite leh la pu la pateu kiang ah thu ka la piakte zosia dungzui in, ka dan siamte hi pha tak in hun zui tau in,” ti’n a hil zing tho hi.

¹⁴ Himaleh, a ngaisak nuam diak puau ah, Lalpa a Pathian uh zui lo in, a pu leh pa teu lochal gual gual in a kihilochal tau hi.

¹⁵ A pu leh pateu haw kiang ah thu a la thunte leh dan a la bawlte kha a kihiatlosak tei tei ua, milim siamkawm ho in thil diklo a bawl tau ah; Lalpa thupiak zui lo in a kîmvêl ua mite chawndan chu a zui zaw tau hi.

¹⁶ Tichun, Lalpa a Pathian uh thupiakte chu zui talo in, milim sunthaw bawngno lim pani leh dawikhuam a hun siam ua; van ah umte zosia a hun ho ua, Baal nâte a hun sêm tau hi.

¹⁷ Tichun, a chapateu leh a chanuteu chu mei a hun palthensak ua, âisân leh zuau thu ah mi thêmhatte a kawm ua, Lalpa mit mu ah thil phalo tak bawl dingin, amau leh amau a kizuak thanghuai tau hi.

¹⁸ Ziaziakchun, Lalpa chu Israel chung ah chun a lung a hung na ma ma ta’n, ama mit mu ngei ah chun amau chu a hun koimang ta’n; Judah namte tilo ngal chu pakhat chale khek a nei ta puai.

¹⁹ Judah chunle Lalpa a Pathian uh thupiakte chu zawm diak lo in, Israelte dan siamkawm chu a la zui zing tau hi.

²⁰ Ziaziakchun, Lalpa chun Israel nam zosia chu a pumnol ta’n, amau haw chu sukgenthei ah um dingin, ama mit mu ah kipat a kithial daw suak masiau, amau sugentheite khut ah chun a pedok tai.

²¹ Israelte chu David Inkuan ah pat hisiat ahi’phat un, Nebat chapa Jeroboam leng dingin a hun tungdok ua; tichun, Jeroboam chun Israelte chu Lalpa zui lo dingin a naw ah, gitlona huaisia tak in a kipe tau hi.

²² Israel mipite chun Jeroboam in gitlona lampi a zui gual gual chu a zui zing ua; ziate kipat chun a kihei mang puau hi.

²³ A suak jawlneite mang ah a la gen taksa gual in, Israel chu Lalpa‘n ama mit mu ah a chawn mang ah. Zia ziak tak ah chun Israel chu a gam ua kipat in Assuria lam ah pui mang in, tu’ni tiang hin a um zing tau ahi.

Samaria Gam ah Assuriate chênna

²⁴ Apharva-im ah kipatte chun mi a pui khawm ah, Israel chate umna mun, Samaria khawpite chun Israelte thasâng in a umsak ta’n; Samaria gam thilte chu chang in a khawpite chun a chêng tau hi.

²⁵ Zia mun ah a chêntîl lai ua chun, Lalpa a ho puau ah; ziaziakchun, khenkhat chu a hun that tau hi.

²⁶ Ziaphatchun, Assuria lengpa kiang in zia gual hin a vatiu ah; “Nang in la chawn mang namte leh Samaria khawpite ah la umsakte hin, a gam pathian dan hi a hepuau ah; ziaziakchun, a lak ua sakeibaknei a hun sawl ah, amau haw chu a hun that tau ahi; zia chu a gam pathian dan chu a het lo ziak uh ahi,” a tiu a.

²⁷ Ziaphatchun, Assuria lengpa chun thu a hun pia, “Zia gam mi la pui uh thiampu pakhat sawl unla; ama chu vachêng hen la, a gam pathian dan chu vahil hen,” a hun tia.

²⁸ Tichun, Samaria ah kipat a puidawteu lakah thiampu pakhat chu a hung a, Bethel in a hung chêngah, zia mi chun Lalpa a kichak dan ding uh chu a hun zilsak tai.

²⁹ Himaleh, namtin chun Samaria mite siamsa, amau Pathiante a kinei chiat ua, thoimual ah pathian hona In ah chun a kikoi chiat ui. Namtin in a chênna khawpiu ah a kinei chiat uh ahi.

³⁰ Babulon mite chun Sukkoth-benoth a siam ua, Kuth mite chun Nergal a siam ua, Hamath mite chun Ashima a kisiam ui,

³¹ pathiante, Adrammelekh leh Anammelekh kiang ah chun a chateu hâlman thillat in a hâllum sek uh ahi.

³² A Lalpa ki’chak dan uh chu zia gual hi ahi: A thoimual In ua thillântu ding leh, thoimual ah thiampu dingte chu amau lak ah kipat in a guat sek uh ahi.

³³ A gam ua kipat a hun puakmang uh a nam dan uh ahiziak in, Lalpa chu lau ma ma ziangleu le amau pathiante nasep tawh a thua tei tei sek ui.

³⁴ Tu’ni tiang ah hinle, zia dan lui chu a zui nalai ua; Lalpa le a ho puau ah, Israel min a la putsakna pen uh Jakob kiang ah Lalpa thupiakte leh dante le a zui tak tak diak puau hi.

³⁵ Lalpa chun, amau tawh kikâl in thuthung a la bawl ah, zia gual hin thu a la pia’i, “Zia pathian dangte chu la ki’chak diu a hipua’n, a ma-âng ua le la bawkhup diak lo diu ahi; chuleh, a nau le la sep diak lo diu a hia, a kiang ua thillatte la lat lo hial diu ahi;

³⁶ himaleh, Aigupta gam ah kipat a khut thahât leh thilhitheina nasa tak ah hun puidokpa Lalpa chu la ki’châk ua, ama chu la ho ua, ama kiang bep ah la thillatteu chu la lat zawk diu ahi.

³⁷ Nangmau â ding ah dan kiguanggal, dan thuthung kisiamte, vaihawmna dan, chuleh dan thupiak kizikte hi, bangtik lai ah le la zui ding ua kibawl ahiziak in, pathian dangte chu la ho lo diu ahi.

³⁸ Nangmau tawh I kâl ua thuthung ka thunte hi la hetmil lo hial diu chu a hia; pathian dangte le la ho lo hial diu ahi.

³⁹ Ahi’n, Lalpa la Pathian uh bep chu la ho ding uh chu a hia; tichun, ama chun la mêlmateu zosia khut ah kipat chun hun hukdok ding ahi,” ti’n a la hil hi.

⁴⁰ Zia gual ah a hil nung ah chunle a thu chu a ngaitha nuam diak puau ah, nidang ah a hi’dan ngai gual un a bawl zing nalai ui.

⁴¹ Ahi’n, zia namte Pathian lau dan chule zia gual chu a hia, a milim siam kawm uh chu a na a sep piak ua; a chateu leh a tuteu hawnle a zui pek ua; tu’ni tiang hin a pu leh pateu hi’dan dan ah chun ahi zing nalai ui.