2 LENGTE 16 - PATHIAN LEKHABU THIANGTHO (BSI)

Judai Gam ah Ahaz Vaihawmna

¹ Remaliah chapa Pekah vaihawm sung kum sawm leh sagi a ti’n kum ah chun Judai gam ah Leng Jotham chapa Ahaz chu vaihawm in a hung pang hi.

² Ahaz chu kum sawmni ah upa ahi in vaihawm in a pang panah, Jerusalem ah kum sawm leh guk sung vaihawm in a pang hi. Himaleh, ama hi a pu David gualah khan Lalpa a Pathian mit mu ah thilpha a bawl puai.

³ Ahi’n, Israel lengte umdan a zui ah, ziaziakchun, Israel chate lakah kipat ah Lalpa‘n a nawdawsa namte thanhuaina dungzui in, a chapa ngei chu mei in a chia thensak hi.

⁴ Tichun, thoimualte, tâng chungte leh thinghing buk nuaite chun a kithawi sek ua, gimtuite le a hâl sek ui.

⁵ Zia nung ah chun Aram ah Lengpa Rezin leh Israel ah Lengpa Remaliah chapa Pekah chu Jerusalem bulu ding ah hung kuan to in, Ahaz chu a hun ûm ua, ahiziak in, a man kha puau hi.

⁶ Zia hun lai ah chun Aram ah Lengpa Rezin chun Elath gam chu Aram gam belapna dingin a la, Elath ah kipat in Judate chu a hun nawdok ah, Elath ah chun Aram mite chu a hung kitawl lut ua, zia tak ah chun tu’ni tiang in a chêng tau hi.

⁷ Ziaphatchun, Ahaz chun Assuria ah Lengpa Tiglath-pilesar kiangah chun thangko ding mi a sawlah, a kiang in, “Keima la suak leh la chapa hi ei do dingin Israel lengpa leh Aram lengpa chu a hung kuan tauah, ziaziakchun, amau khut ah kipat ei hukdok dingin hung kuan in,” a vatisak a.

⁸ Chun, Ahaz chun, Lalpa In ah sana leh dangka umte chu a la’n, chuleh Lalpa In ah a go um haw chu tawh a ladok ah, Assuria lengpa kiang ah thilpiak dingin a thot tai.

⁹ Ziaphatchun, Assuria lengpa chun, a thildot chu a la ngaithâk piak ah; tichun Assuria lengpa chu Damaska do dingin a kuan to ah, a va lâk piak ah, a mite chu Kir lam ah sal in a pui piak ah, Rezin chu a that tai.

¹⁰ Chun, Lengpa Ahaz chu Assuria lengpa Tiglath-pilesar chu a la dawn ding in a chia ah, zia takah chun Damaska ah um mâichâm pakhat chu a mu; tichun, Ahaz chun thiampu Uriah kiangah chun zia mâichâm chu a bawl dan a etton dingin a thot tai.

¹¹ Tichun, thiampu Uriah chunle, zia mâichâm, Lengpa Ahaz in Damaska ah kipat a thot gual gual ah chun a la bawldok ah, Damaska ah kipat Lengpa Ahaz a hung tun kit masang ah chun a la bawl zo tai.

¹² Damaska ah kipat ah lengpa chu a hung tun phatin lengpa chun zia mâichâm chu a mu; tichun lengpa chun zia mâichâm chu a vanai ah, a chung ah chun thillat chu a la’n ngal a.

¹³ Tichun, a hâlman thillat chu a hun hâl ah, thâi thillat tawh a koi ah, a dawn ding thillat chu a chungah a sung ah, chamna thillat thisan chu, zia mâichâm chungah chun a hun the’ ah, a hâl tai.

¹⁴ Ziazaw chun sum-eng mâichâm chu a valadok ah, zia chu In mai lam ah, Lalpa In leh mâichâm kikâl ah, Lalpa ma um chu ahi’n, tichun, mâichâm umna a mallam pangah chun a hun koi a.

¹⁵ Lengpa Ahaz chun, thiampu Uriah kiang ah chun, “Zia mâichâm lian chung ah hin zing lam hâlman thillatte tawh, nitâk lam thâi thillatte tawh, lengpa hâlman thillatte, thâi thillatte tawh; a gam ah mite hâlman thillatte leh, a thâi thillatteu tawh, a dawnthei thillatteu zosia chu lân inla; tichun, hâlman thillat thisan zosia leh, kithoina thisan zosia chu a chung in the’ in, chuleh, zia sum-eng mâichâm hi ahileh keima’n thil kul ka dotsekna ding chu hiding ahi,” ti in thu a pia tai.

¹⁶ Lengpa Ahaz thupiak gual in, thiampu Uriah chun a hun bawl zel hi.

¹⁷ Chun, lengpa Ahaz chun, a kingakna mong chu a hun tan ah, a kisil sekna mun uh chu a hun chawndok ah, chun, sum-eng bawngchal lim nuai ah kuang um chu a ladok ah, suangsêk kilem chung lam ah chun a koi ta’n.

¹⁸ Tichun, In sung ah chawlni’ um chuamna ding ah a bawl uh tawh, a pawlam ah lengpa hung lutna ding a bawl uh chu Lalpa In ah kipatah chun Assuria lengpa lungdamna dingin a hun hei danglam tau hi.

¹⁹ Ahi’n, Ahaz thil hi leh a nasep dangte chu Judah Lengte Chanchin kizikna Lekhabu a kizik ta hilo a hem?

²⁰ Tichun, Ahaz chu a pu leh a pate kiang in a ipmu ta’n, David khawpi, a pu leh pate thânah chun vui in a um ta’n; chun a chapa Hezekiah chu ama thasâng ah vaihawm in a pang tai.