2 LENGTE 14 - PATHIAN LEKHABU THIANGTHO (BSI)

Judah ah Amaziah Vaihawmna

¹ Israel ah Joahaz chapa Lengpa Joash kum ni’na’n, Judah ah Joash chapa Lengpa Amaziah vaihawm in a pang a.

² Ama chun vai a hun hawm pat lai in kum sawmni leh nga’ upa ahi’n, Jerusalem ah kum sawm leh kua vai a hawm hi. A nu chu Jerusalem ah um Jehoaddin ahi.

³ Ama chun Lalpa mit muah thilpha chu a bawl ah, ahi’n la a suanpa David gual ahi puai; thil zosia a pa Joash in a bawl gual in a bawl hi.

⁴ Himaleh, thoimualte chu phiatnâm ahi puau ah; mipite’n thoimualte ah chun kithoina leh thillatte a bawl zing nalai ui.

⁵ A khut ah leng thilhitheina det tak a hung um phatin, a pa leng a la that lum a suakte chu a hun that lum tai.

⁶ Himaleh, tualthatte chate chuvâng a thatlum puai; Mosi dan ah kizik dungjui in Lalpa‘n zia gual hin thu a la pia ta’n: “Chate ziakin pate chu thalup ding ahi puau, pate ziak inle chate chu thalup ding ahi diak puau hi; himaleh, mi tin amau gitlona ziak chiat un thalup ding a hiu,” ti in.

⁷ Tichun, Phâijang ah chun Edom mite sîng khat a that ah, Sela chu kidona’n a la tai; zia chu Jokthe-el tin a min a sak in, tu’ni tiang ah a min ahi den tai.

⁸ Ziaphatchun, Israel ah Jehu chapa, Jehoahaz chapa Lengpa Jehoash kiang in Amaziah in thupawtute a sawl ah, a kiangin, “Hung in, kimu tua hi ti,” a tia.

⁹ Israel ah Lengpa Jehoash chun Judah ah Lengpa Amaziah kiang in thu a thot ah, “Lebanon ah lingbuk pakhat hin sidar thing kiang in mi a sawl ah, ‘La chanu chu ka chapa ji dingin ei pia’n,’ a ti’n; himaleh Lebanon ah sahâng pakhat a hung in, lingbuk chu a chuan chil malam tai.

¹⁰ Edom chu la zo ziang ngut ta’n, la ngaitua na’n a hun suk-hat la hi. La lopina chu huntawk sa’n la, In ah um hiat hiat in; nang, Judah tawh la pukkhawmna ding bep ua bang ziak ah buaina ding kihawldaw gua la hem?” a tia.

¹¹ Himaleh Amaziah in a ngaisak pua’n. Tichun Israel ah Lengpa Jehoash a kuan to ah; Judah Beth-shemesh ah chun Judah Lengpa Amaziah tawh a kido tau hi.

¹² Israel in Judah chu a zo ta’n; mi zosia In lam in a jam tau hi.

¹³ Israel ah Lengpa Jehoash in Beth-shemesh ah chun Ahaziah chapa, Jehoash chapa, Judah ah Lengpa Amaziah chu a man ta’n; Jerusalem ah a hungah, a kulbâng chu Ephraim Kotpi ah kipat a langkhat Kotpi tiang, tong za li kikâl chu a suchim tai.

¹⁴ Sana leh dangka zosia, chuleh Lalpa In leh lengpa In ah go koikhawmna ûm leh bêl kimupha zosia chu a kilak ta’n, a mi matte a pui ah; Samaria ah a kile’kit tai.

¹⁵ Tichun, Jehoash nasep dangte zosia, a hatdan, chuleh Judah Lengpa Lekhabu a kizik ta hilo a hem?

¹⁶ Jehoash chu a pu leh pate kiang in a ipmu ta’n, Samaria ah Israel lengte thân in a vui tau hi; chun, a chapa Jeroboam chu a thasâng in a hung pang tai.

¹⁷ Israel ah Jehoahaz chapa Lengpa Jehoash thi’nung in Judah ah Joash chapa Lengpa Amaziah chu kum sawm leh nga a dam nalai hi.

¹⁸ Tichun, Amaziah thilhi dangte zosia, ziate chu Judah Lengte Chanchin Lekhabu ah a kizik ta hilo a hem?

¹⁹ Ama do dingin Jerusalem ah vai a sawm guu ah, Lakhish in a jam tai. Himaleh, a nung in Lakhish ah mi a sawl ua, zia chun a that tau hi.

²⁰ Ama chu sakol in a hun puau ah; a pu leh pate kiang in David khawpi ah a vui tau hi.

²¹ Judah mipite zosia chun Azariah, kum sawm leh guk ah upa chu a hun pui ua, a pa thasângah leng dingin a siam tau hi.

²² Lengpa Amaziah chu a pu leh pate kiang ah a kivui nung in, ama chun Elath a siamthak kit ah, Judah sung in a la lut kit tai.

Israel ah Jeroboam 2na Vaihawmna

²³ Ziazaw chun, Israel ah Joash chapa, Leng Jeroboam in Samaria ah vai a hun hawm panah; kum sawmli leh pakhat vai a hawm hi.

²⁴ Lalpa mit mu ah thil phalo a bawl ta’n; Nebat chapa Jeroboam gitlonate, Israel a gitlona lampi chu a nusia puai.

²⁵ Lalpa Israel Pathian in, a suak, Gath-hepher ah um jawlnei Jonah, Amittai chapa mang ah a la gensa dungzui in, Israel gamgi chu Lebo-hamath ah kipat Arabah Tuipi lam tiang in a la kit tai.

²⁶ Lalpa‘n Israel thokgim zia chu a huaisia ma ma tai ti a mu ziakin; kuamacha, suak hi’n suak lo hi taleu, a suakcha a um ta puau ah, Israel panpi ding a um ta puau hi.

²⁷ Himaleh, Lalpa chun Israel min chu van nuai ah kipat sumang ding ahi ti’n a gen pua’n; tichun, amau chu Joash chapa Jeroboam khut in a hukdok tai.

²⁸ Tichun, Jeroboam nasep dangte zosia, a thilhi zosiate tawh, a hatdan leh, a galdo dan, chuleh Judah in a laksa Damaska leh Hamatha chu Israel â ding ah a lak kitdan, ziate chu Israel lengte Chanchin Lekhabu a kizik ta hilo a hem?

²⁹ Jeroboam chu a pu leh pate Israel lengte kiang in a ipmu ta’n; a chapa Zekariah a thasâng in a hung pang tai.