2 LENGTE 11 - PATHIAN LEKHABU THIANGTHO (BSI)

Judah Gam ah Athaliah Vaihawmna

¹ Ahaziah nu, Athaliah in a chapa a thi tai ti a het phat in, leng Inkuan mite zosia chu a hun that pan tai.

² Himaleh, Lengpa Joram chanu, Ahaziah suapinu Jehosheba chun Ahaziah chapa Joash chu a puiah, lengpa chate tha ding ah umte lakah kipat chun a la gudok ta’n; ama tawh a enkolnu chu lupna pindan pakhat in a koi tai. Zia gual ah chun Athaliah ah kipat in a sêl mang ah, tha in a um ta puai;

³ amanu kiang ah chun kum guk a um ah, Lalpa In ah chun sêlgûk in a um ah, Athaliah in gam chung ah vai a hawm hi.

Jehoiada in Naupang Joash Sathaunu’

⁴ Himaleh, a kum sagi na’n Jehoiada in Karit mite tawh a vengtute sepai hotute chu a ko khawm ah, ama kiang ah Lalpa In ah chun a hungkhawm tau a. Amau tawh thuthung a siam ah, Lalpa In ah chun kitiamna a neisak in; ziazaw chun lengpa chapa chu a musak tau a.

⁵ A kiang un thu a pia, “Zia hi la hi dingdan uh ahi: la lak un se’thum sua se’khat te’n, Sabbath ni’n lengpa In veng sek unla,

⁶ chuleh a se’thum sua se’khat dangte chun Sur kulkotkhak veng inla tiu in, a se’thum sua se’khat dangte chu vengtute nung lam ah kul kotkhak in um unla; zia gual chun Invêngtu ah la pan diu ahi.

⁷ Chuleh, la lak ua pawl nite, sabbath ni ah vêngtu ding zosia te’n, Lalpa In chu la vên diu ahi.

⁸ Mitin in, gâlvan choisa’n lengpa chu ûm kîmvêl in la tiu in; la kiang uh hun nai taphot chu la thalup mai diu ahi. Lengpa chu a vâkvêlna zosia ah la zui zing ding uh ahi,” a tia.

⁹ Sepai hotute chun thiampu Jehoiada thupiak dungzui in a bawl tau ah; mi tin in a sepaiteu sabbath ni ah awl dingte tawh, sabbath ni ah hung kuan dingte sia chu a hun pui ua, thiampu Jehoiada kiang in a hung tau a.

¹⁰ Thiampu chun Lalpa In ah kikoi, Lengpa David cheite leh phawte chu sepai hotute kiang in a pedok a;

¹¹ vêngtute chun khut ah gâlvante a kichoi chiat ua, lengpa chu ning tin ah vêng dingin, In mallam kâi ah kipat simlam kâi tiang, mâichâm tawh In kîmvêl ah te chun a ding tau hi.

¹² Ziazaw chun lengpa chapa chu a hun puidok ah, thuthung chu a hun pia ta’n; ama chu lengpa ahi ti a puangjak ua, sathau a nu’ tau hi.

Athaliah Thi’na

¹³ Athaliah In vêngtute leh mipite husa git chu a het phat in, mipite kiang ah chun Lalpa In sung in a hung lut ta’n;

¹⁴ a en ah, a thil hi’dan sek gual un, lengpa chu khuam kiang ah chun a ding ah, lengpa kiang in sepai hotute leh pengkul mûtte a ding ua, a gam ah mipi zosia kipak tak mai in a um ua, pengkulte a mût tau a. Athaliah chun a puante a hun botthêk ah, “Dawha! Dawha!” ti’n a hung kiko tai.

¹⁵ Ziaphatchun, thiampu Jehoiada in sepaite chung ah um sepai hotute kiang ah chun thu a pia, “Amanu chu sepaite kikâl in hun puidok unla, ama zui taphot chemjam in that un,” a tia. Thiampu chun, “Lalpa In ah amanu chu thalup ding ahi puai,” a ti ziakin ahi.

¹⁶ Tichun, a chung in khut a tha tau ah; amanu chu lengpa In ah sakolte lutna ah chun a lut theng ah, chun zia tak ah chun thalup in a um tai.

¹⁷ Jehoiada chun, Lalpa leh lengpa, chuleh mipite kikâl in leng ahi’na ding thuthung a bawl ta’n, amau chu Lalpa mite ahi’na ding un.

¹⁸ Ziazaw chun, gam sungah mipite zosia Baal In ah a vachiauah, a suchim tauah; a mâichâmte leh a milimte chu a khen tel dik dek ua, chuleh, Baal thiampu Mattan chu mâichâmte ma-âng in a that tau hi. Thiampu chun Lalpa In ah vêngtu dingte a koi tai.

¹⁹ Sepai hotute, Karit mite, vêngtute leh gam sung ah mipite zosia chu a pui ah; chun lengpa chu Lalpa In ah kipat in a hun puidok ua, vêngtute kotpi hun hawtheng in lengpa In tiang in a hung kizawt tau hi. Ama chu lengte lalchutpha ah chun a kichu tai.

²⁰ Tichun, gam sung ah mipite zosia chu a lim ma ma tauah; lengpa In ah Athaliah a thalup zaw phat un khawpi chu a thip tai.

²¹ A hung vaihawm pat lai in Jehoash chu kum sagi ah upa ahi.