2 LENGTE 10 - PATHIAN LEKHABU THIANGTHO (BSI)

Ahab Suante Thâgamna

¹ Tichun, Ahab in Samaria ah chapa sawmsagi a nei ah. Jehu chun leh, Ahab chapate enkolte kiang in a thot ah, zia gual hin a gen a,

² “La hotupau chate la umpi ngal un, chuleh la nop dan dan ua la mat thei ding uh kângtalaite leh sakolte, khawpi kulbâng ah ki-ûm leh gâlvante la nei un,

³ la hotupau chapate lak ah ting la sak pen uh chu têldok unla, a pa lalchutpha’n chutsak un; la lalpau Inkuante â dingin gâl hun bawl un,” ti in.

⁴ Himaleh, amau chu a lauthawng tau ah, “En tiam un, leng pani’nle a nan zaw lo uh ahi’n; ei uh bangti ding I hitau em?” a tiu a.

⁵ Tichun, lal In sung ah hotupente leh khawpi vaihawmte chun, upate leh nau enkolte chu tawh kithua in, Jehu kiang ah thu a thot tauah: “Kei uh hi la suakte ka hiu hi; la gen taphot bawl ing kau. Kuamacha leng dingin siam pua’ng kau; nang in pha lasak taphot bawl ziang in” ti in.

⁶ Chuleh, a lekhathot ding uh a zik kit ah, “Kei lam ah pang la hiuah, ka thu zawm ding ah kisa zo la hiu chun, la hotupa’u chapate luchang chu lau inla, jing leh tu’hun ah hin Jezreel ah ka kiang in hung un,” ti in. Tu’hin, lengpa chapa mi sawmsagite chu, khawpi ah hotute kiang in a um ua, amau chu khantona lam mawpua pang a hiu hi.

⁷ Lekhathot chu a mu phât un, lengpa chapa sawmsagite chu a man ua, a that tau ah; a luchangteu chu bawm ah thun in Jezreel ah a kiang in a thot tau hi.

⁸ Thangkote a kiang in a hung ua, “Lengpa chapate luchang chu a hun paw tau hi,” ti a hung hil phat un, ama chun, “Ziate chu kul kotpi bul ah chun mun ni in a siavum ua, jingkal chan umsak un,” a tia.

⁹ Jingkal ah a vapawt daw phatin, mipite kiang ah chun, “Nang uh mawna a um puai. Ka hotupa lang ah pang thilgûk bawl, ama that kha kei ka hi; himaleh, zia zozaipi hi kua thalup a hiu em?

¹⁰ Ziaziakchun, Lalpa chun Ahab Inkuan chungchâng ah a la gen, Lalpa thute chu pakhat chale lei tual ah ke’tha lo ding ahi, ti hi he tau in; Lalpa‘n a suak Elijah mang ah a la gen chu a bawl ta ahi,” a tia.

¹¹ Tichun, Jezreel ah Ahab Inkuan mi a um nalaite, a miliante, a gualte leh a thiampute zosia chu a that suak kêi ah, a suakcha khat le a um puau hi.

¹² Chun, a kipan ah, Samaria ah a chia tai. Lampi chun Belamchingte Beth-eked mun chu a tun phatin,

¹³ Jehu in Judah ah Lengpa Ahaziah chanaute a kituakpiah, a kiang un, “Kua la hiu em?” a tia. Amau chun a dawnhuu a, “Ahaziah suapite ka hiu ah, lengpa chapate leh lengnu chapate vethâ ding ah hung suk ka hiu,” a tiu a.

¹⁴ Ama chun, “A hing in man un,” a tia. Amau chu a hing in a man ua, Beth-eked kawkhûk ah chun a that gam tau ah; a leng un sawmli leh ni a hiu; a lak ua pakhat chale a suakcha a um puau hi.

¹⁵ Zia mun chu a nutsia phatin, Rekab chapa Jehonadab, ama lamtua ding ah hung chu a kimupi ah; ama chu chibai bûk in, a kiang in, “Ka lungthim nang â dingah a lamzang gual in, nang lungthim le kei â dingin a lamzang na em?” a tia. Jehonadab inle, “A lamzang hi,” a tia. Jehu chun, “Ahileh, la khut ei pia’n,” a tia. Tichun, a khut chu a vak pia ta’n. Jehu chun a kângtalai chung in a kaldawpi tai.

¹⁶ Ama chun, “Ei zui inla, Lalpa â ding ah ka phatchuamngai dan tak hi hun en in,” a tia. Tichun a kângtalai ah chun a chuansak tai.

¹⁷ Samaria a hung tun phatin, Elijah kiang ah Lalpa‘n a gen dungzui ah khan; Ahab mi Samaria ah um nalai zosia chu a that suak ta’n, Lalpa‘n Elijah mang ah a la gen dungzui ah khan a nuaichimit sik sek tai.

Baal Ho-te Thâgamna

¹⁸ Ziaphatchun, Jehu in mipite chu a ko khawm ah, a kiang un, “Ahab in Baal na neucha bep a la sêm in; himaleh, Jehu in a tam zaw sep piak ding ahi,” a tia.

¹⁹ Ziaziakchun, “Baal jawlneite zosia ka kiang ah hun sawl un, Baal ho-te zosia tawh a thiampute zosia le, a hung pang lo taphot chu a hing umlo ding a hiu,” a tia. Himaleh, Jehu chun Baal ho-te a suksiat theina ding ah a dawha bawl ahi.

²⁰ Jehu chun, “Baal â ding ah kikhopna poimaw tak hi hun suthiangtho tau in,” ti’n thu a pia, zia thu chu a puangjak tau a.

²¹ Jehu chun Israel gam pumpi’n thu a than suak ah; Baal ho-te zosia chu a hung khawm ua, a hung lo pakhat chale a um ta puau hi. Baal tempul sung ah chun a lut ua, Baal tempul Insung zosia chu a lua dim tau hi.

²² Kicheina lam enkolpa kiangah chun, “Baal ho-te zosia â ding puanâk chualte kha hun ladok in,” a tia. Tichun puanâk chualte chu a hun lakdaw piak tai.

²³ Ziaphatchun, Jehu chun Rekab chapa Jehonadab tawh Baal tempul sung in a lut tau a; Baal ho-te kiang ah chun, “La lak ua hin Baal ho-te tilo ngal, Lalpa ho a um kha tawl em hung kihawldok un,” a tia.

²⁴ Ziazaw chun, kithoinate leh hâlmang thillatte a hun la’n pan tau a. Tu’hin, Jehu in pawlam ah mi sawmgiat a koisa ahi’n; a kiang un, “La khut ua ka hun piakdawsate hi pakhat ziang le a suakcha la umsak ua leh ama hinna mansua hiding ahi,” a la ti’sa ahi.

²⁵ Hâlmang thillat a piak zaw phat ah chun, Jehu in a vengtute kiang leh hotute kiang in, “Hung lut un la hung that un; kuamacha suachâk sak kiu in,” a tia. Tichun, chemjam in a sat lum tau a. A vengtute leh hotute chun a sepdok zel ua, ziazaw chun, Baal tempul ah Insawng ah chun a lut tau hi.

²⁶ Baal tempul sungah um sek milim chu a hun pawdok ua, a hâl tum tau a.

²⁷ Ziazaw chun, Baal milim chu a hun khen chim ua, Baal tempul chu a hun susia tauah, tu’ni tiang in ekthakna’n a mang den tau hi.

²⁸ Zia gual ah chun Jehu in Israel gam ah kipat in Baal a subei tai.

²⁹ Himaleh, Jehu chun Nebat chapa Jeroboam in Israel a gitlosakna–Bethel leh Dan ah sana bawngno ho-nate chu a haisan diak puai.

³⁰ Zia gual tak ah Ahab Inkuante chung ah la bawl tâk ziakin, a khang li’na la chapate chun Israel lalchutpha hun lua ding a hiu, a tia.

³¹ Himaleh, Jehu in a lungthim zosia ah, Lalpa, Israel Pathian dante chu zui dingin a pilvâng pua’n; Jeroboam gitlona, Israelte puk sekna chu a kiheisan diak puai.

Jehu Thi’na

³² Zia hun lai ah chun, Lalpa chun Israel gam khenkhatte chu a hun khentha pan ta’n. Hazael in Israel gam chu a la to zel tai:

³³ Jordan ah kipat sualam, Gilead gam, Gad mite, Reuben mite, leh Manasseh mite gam zosia, Aroer ah kipat, zia chu Arnon Lui tuamvel ahi’n, ziate chu Gilead leh Bashan a hiu.

³⁴ Tichun, Jehu nasep dangte leh a thil hi zosia leh a thil hi’theidan zosia, ziate chu Israel lengte khangthu ah a kizik ta hilo a hem?

³⁵ Tichun Jehu chu a pu leh pate kiang in a ipmu ta’n, Samaria ah a vui tau hi. A chapa Jehoahaz a thasâng in a hung pang tai.

³⁶ Jehu in Samaria ah Israel chung ah vai a hawm sung chu kum sawmni leh giat ahi.