2 LENGTE 1 - PATHIAN LEKHABU THIANGTHO (BSI)

Elijah in Ahaziah a Limsak lona

¹ Ahab thi’nung in Moab chu Israelte kãl in a hel ta’n.

² Ahaziah chu a pindan chungnung ah kipat a ketha’n, a liam in a kipuk tai; tichun, thupawte a sawl ah, a kiang un, “Chiau in, Ekron pathian, Baal-zebub kiang in, zia ka liamna kipat hin ka damdok diam ti vadong un,” a tia.

³ Himaleh, Lalpa vansawlchâk in Tishbi mi Elijah kiang in, “Kipan inla, Samaria lengpa thupawtute lamtua dingin vachia in, a kiang un, ‘Israel ah Pathian a um pua a hem, Ekron pathian Baal-zebub kiang ah thudong ding ah la chia ziang uh?’ ti’n vagen in.

⁴ Ziaziakchun, tu’hin Lalpa‘n zia gual hin a gen hi, ‘Jalkhun la zotsa chu nusia ta pua’n la tin, thi ngei ngei ding la hi,’ ti’n vagen in,” a tia. Tichun, Elijah chu a chia tai.

⁵ Thangkote chu lengpa kiang in a kile’kit tau ah, ama chun a kiang un, “Bangziak ah hung vaikit la hiu em?” a tia.

⁶ Amau chun a dawnhuu ah, “Ei la lamtua dingin mi pakhat a hung ah, ka kiang un, ‘A hun sawlpa lengpa kiang in kile’kit unla, a kiang in: Lalpa‘n zia gual hin a gen hi: Israel ah Pathian a um pua a hem, Ekron pathian, Baal-zebub kiang ah thudong ding ah mi la sawl ziang hi? Ziaziakchun, la zotsa jalkhun chu nusia ta pua’n la, thi ngei ngei ding la hi,’ a tii,” a tiu a.

⁷ A kiang un, “Nang uh lamtua ding ah hung ah zia gual thute hung gen chu kua tawhbang mi ahi em?” a tia.

⁸ Amau chun a dawnhuu a, “Mi mul hau tak, a kawng ah savun kawnggâk kigâk ahi,” a tiu a. Ama chun, “Tishbi mi Elijah ahi chu,” a tia.

⁹ Ziaphatchun, lengpa’n mi sawmnga chung ah hotu pakhat chu a mi sawmngate tawh a kiangah a sawl a. Tâng pakhat chung ah kichu Elijah kiang ah chun a vachia to ah, a kiang in, “Aw Pathian mi, lengpa chun, ‘Hung suk in,’ a tii,” a tia.

¹⁰ Himaleh, Elijah chun sawmnga chung ah hotupa chu a dawnhu ah, “Kei Pathian mi ka hi chun, van ah kipat meikuang hung suk hen la, nang tawh la thuaihuai sawmngate chu mei in hun kâng tum hen,” a tia. Tichun, van ah kipat in meikuang a hung suk ah, ama tawh a thuaihuai sawmngate chu a kâng tum tai.

¹¹ Lengpa chun sawmnga chung ah hotu dang pakhat, a mi sawmngate tawh a sawl kit a. A chia to ah, a kiang in, “Aw Pathian mi, zia hi lengpa thupiak ahi: kin tak in hung suk in!” a tia.

¹² Himaleh, Elijah chun a kiang in, “Kei Pathian mi ka hi chun, van ah kipat meikuang hung suk hen la, nang tawh la thuaihuai sawmngate chu hun kângtum hen,” ti’n a dawnhu a. Tichun, van ah kipat in Pathian meikuang a hung suk ah, ama tawh a sawmngate chu a kângtum tai.

¹³ Lengpa chun a pathumna dingin sawmnga chung ah hotupa chu a thuaihuai sawmngate tawh a sawl kit a. Tichun, sawmnga chung ah hotu pathumna pa chu a chia to ah, Elijah ma-âng ah khupdin in, a kiang in hitin a don ah, “Aw Pathian mi, lungsiat tak in ka hinna hi tawh, zia la suakte sawmnga hinna hi la mit mu ah lûl tak hi hen.

¹⁴ En tia, van ah kipat meikuang a hung suk in, mi sawmnga chung ah hotu masa panite kha a sawmngateu kha tawh a kângtum zo tau; himaleh, tu’hin ka hinna hi la mit mu in lûl tak hi hen,” a tia.

¹⁵ Ziaphatchun Lalpa vansawlchâk in Elijah kiang in, “Ama chu tawh kiton suk un; ama chu kicha kin,” a tia. Tichun, a kipan ah, ama chu tawh lengpa kiang in a chia suk a,

¹⁶ a kiang in, “Lalpa‘n zia gual hin a gen hi: Ekron pathian Baal-zebub kiang ah thu dot la guat chu Pathian umlo a hita a hem? Ziaziakchun, la zotsa Jalkhun chu nusia ta pua’n la, thi ngei ngei ding la hi,” a ti tai.

Ahaziah Thi’na

¹⁷ Tichun, Lalpa thu Elijah in a gen dungzui in a thi tai. Ahaziah chun chapa a neilo ziakin, Judai gam ah Lengpa Jehoshaphat chapa Jehoram in kum ni a vaihawm kum in, a suapi Ahaziah thasâng ah leng in a hung pang tai.

¹⁸ Tu’hin, Ahaziah thil hi, a nasep dangte zosia tawh, ziate chu Israel Lengte Chanchin Lekhabu ah a kizik ta hilo a hem?