2 KORINTH 9 - PATHIAN LEKHABU THIANGTHO (BSI)

Jerusalem ah Gingtute â Ding ah Thilpiak

¹ Mi thiangthote â ding ah thilpiak thu vang la kiang un zik a ngai ta puai;

² la thatnop dan uh ka he ngal a. Zia thu ah chun, Akaia gam ah mite a kisakzawnau kum khat ahi tai ti’n, Makedonia mite kiang in ka hun suang sek a; la phatchuam ngainau chun a lak ua mi tam zaw te a hi’hal tai.

³ Himaleh, ka hun suanna chu bangmalo ahi lona dingin suapite ka hun sawl a; ka gen gual ah kisa zosa la la umtheina ding un.

⁴ Chutilochun, Makedonia gam ah mi khenkhat in ei zui in, kisa zo lo in hun mu leu, nang uh bep hilo in, kei uh le zia thu ah hin mualpho kha’ng kau.

⁵ Ziaziakchun, suapite hi la kiang ua hung masa’n, thilpiak la tiamsau kha a la siam khol dingin dot kûl in ka hiai. Pawng lâkpiak gual hilo ah, phal tak ah piak gual in kisa zosa la umna ding un.

⁶ Ka gen nop chu: A the’tawmte chun ât tawm intin, a the’tamte chun ât tam in au, ti hi ahi.

⁷ Mi zosia’n phal lo sa sa’n pawngchangsan ah piak ding ah ngai ah pia hilo in, lunggil ah a tup gual un pechiat uh hen; kipak tak ah pete chu Pathian in a kipakpi hi.

⁸ Pathian in a hepina bukim a hun vuk khum thei hi; tichun, bangkim a hun bepcha nei zing in, nasep pha zosia dingin hau thei in lau.

⁹ “A hawm jak ah, gentheite kiang in a pia’n, a dikna kumtuang in a um zing hi,” ti zik gual in.

¹⁰ A the’pa kiang ah a chi pepa leh nêk ding ah vaithum pepa chun la the’ ding uh thâichi chu pia’n, hi’pun piak intin, la dikna gau le hi’pun piak in a.

¹¹ Kiphalna zosia, keihaw ziak ah Pathian kiang ah kipak thu genna nei ding ah, bangkim ah suk-hausak ah um la hiu.

¹² Zia khawtuana nasep hi mithiangthote tâksapna awnghukna bep hilo in, Pathian kiang ah kipak thu genna tampi hi in, a luanglêt nalai hi.

¹³ Zia nasepna hin patep ah um in, Khrista chanchinpha ah la thugin uh la zui thuu leh, amau leh mi zosia â ding ah thilpiak ah la kiphal dan uh hin Pathian ahi’lopi hi.

¹⁴ Amau inle la chung ua Pathian hepina a nasat ziakin nang uh â ding ah pauchap in, a hun ngai ma mau hi.

¹⁵ A thilpiak gen sên gual lo ziakin, Pathian kiang in kipak thu um ta hen.