2 KORINTH 7 - PATHIAN LEKHABU THIANGTHO (BSI)

¹ Suapi doitakte haw, zia thutiamte chu I nei ziak un, taksa leh thagau kisukbuakna zosia chu kisuthiangtho in, Pathian lau in thianthona ah bukim in um hitiu.

Kochuamte Gitlo Haisanna Ziak ah Paul Kipakna

² La lunggil un mun ei awt un; kuama diklo tak in ka bawl puau ah, kuama ka susia puau ah, kuama dawha’n ka bawl puau hi.

³ Nanghaw thiamlosakna ding ah ka gen ahi puai; thi leh thi khawm ah, dam leh dam khawm sap dingin ka lunggil un ka vop zing ui ti, tu’ma khan ka hun gensa ahi tai.

⁴ Ka hun kisuanpi ma ma hi; thamuanna’n ka dim ah, ka haksatna zosia inle kipakna’n ka dim ahi.

⁵ Makedonia ka tun unle taksa ah chawldamna him him ka nei puau in, langkhat langkhat ah sukgenthei in ka um un; pawlam in kidonate a um ah, sunglam in launate a um hi.

⁶ Himaleh, lungkete thamuanpa Pathian in, Tita hung ziak chun ei thamuan in,

⁷ ama hung ziak bep le hilo in, la lunglen dân uh, la kâ dan uh leh ka chung ah la phatchuamngai danteu ei hil in, nangmau ah a thamuanna chunle ei thamuan ta’n; chutichun, ka kipak zaw diak ta ahi.

⁸ Ka lekhathot khan hi’lungngai maleng ka kisik puai. (A lim in vang ka kisik ah, lekhathot khan a hi’lungngai hi ti ka het ziakin; ahi’n, chomcha bep ahi kha.)

⁹ Tu’hin hi’lungngai la hiziak uh hilo in, lungheina ding ah la lungngai ziak un ka kipak ta ahi zawi. Keimau ziak ah bangma la chân lona ding un, Pathian doigual ah hilungngai in la um tau hi.

¹⁰ Pathian doigual ah lungngaina chun hukhinna ding lungheina a sua in, kisik a um puai; khawvel lungngaina’n vang thina a sua zawi.

¹¹ En tiam un, Pathian doigual ah hi’lungngai ah la umnau chun bang gual ah titakna, kisukthianna, lungnatna, launa, lunglenna, phatchuam ngaina leh gawtnate nangmau ah siam ahi tam! Bangkim in zia thu ah chun la maw puau hi ti la hi’lang tau hi.

¹² Tichun, la kiang un lekha hun zik maleng, gitlona bawlpa ziak a hipua’n, a thuakpa ziak le ahi diak puai, ka chung ua la phatchuamngai ziau Pathian mit mu ah la kiang ua hiatsak a hitheina ding ahi zawi. Ziaziak hin, thamuan in ka um tau ahi.

¹³ Keimau thamuanna chung in, Tita kipakna ziak ma chunle ka kipak zaw diak ua; a lunggil la hi’hal tâk ziak un.

¹⁴ A kiang in bang lam lam ah le nang uh ka suannau in ka mualpho puau ah, la kiang ua ka gen zosiau kha a tak tak ahi ti Tita ka suannau hin a phawchian tai.

¹⁵ A thu la awi danteu, lau leh kithing kawm ah la lop danteu kha hia’n, a lunggil nangmau lam in a chêng zaw diak tai.

¹⁶ Ka hun muan takzet ziakin ka kipak hi.