2 KORINTH 6 - PATHIAN LEKHABU THIANGTHO (BSI)

Pathian Nasemtu Ginumna

¹ Pathian hepina chu phatchuampi lo ah chang la hilona ding un, ama seppite hin in ka hun ni’ la hiu.

² Ama chun, “Hun kipak um ah ka hun ngaitha zing in, hukdamna ni’n ka hun panpi hi,” a ti ngal a. Ngai tiam un tu’ hi hun kipak um chu ahi’n, ngai tiam un tu’hi hukdamna ni chu ahi!

³ Ka nasepnau hi dem ah a um lona ding in kuama pûklawna ding him him ka bawl puau hi.

⁴ Pathian nasemte gual in bangkim ah mi mit tung in ka um zawu a, nasa tak ah kukãlna, haksatna, tâksapna leh lunggimna ah te,

⁵ vokna, suangkultânna, buaina, sepgimna, i-mutlona leh anngawlna ah te;

⁶ thianthona, hetna, dawtheina, chitna, Thagau Thiangtho leh hepina tak tak ah te;

⁷ thutakna leh Pathian thilhitheinate chu nei in, changlam leh veilam ah dikna gâlvan ah kivan in;

⁸ mi choihoina leh ja lona ah te, mi gensiat leh gen phat in, mithêmte gual ah bawl in ka um un, midik tak hingal in;

⁹ mi hetkham lo gual in, minthang tak ngal in; thi vâng vâng gual in, ngai tiam un, ka hing ngal un; gawtna thuak gual in, tha ah um diak lo in;

¹⁰ lungngai gual in, himaleh kipak zingin; genthei gual in, himaleh mi tam tak hihausa ngal in; bangma neilo gual in, himaleh bangkim nei bukim ngal in ka um zawu hi.

¹¹ Korinth mite haw, la kiang un kichian tak ah gen in, ka lungthim uh ka hi’lian ui.

¹² Ka hun ngainatnau hin hun tawk a nei pua’n, nang uh lam bep ahi.

¹³ Chate kiang ah gen gual in ka hun hil la hiu: La lungthim uh hong lian un.

Pathian Hing Tempul Chu

¹⁴ Ginglote tawh kituak takin ngawngkol bât khawm kiu in; dikna leh diklona’n bang a hem kivopna a nei uh? Ahiloleh, thim leh vâk in bang kipawlna a hem a nei uh?

¹⁵ Khrista leh Belial inle bang a hem a chan khawm uh? Ahiloleh, gingtu leh ginglo in bang a hem a chankhawm uh?

¹⁶ Milimte leh Pathian biak inle bang a hem kituakna a nei uh? Ei uh chu Pathian hing biak In I hingal un: Pathian chun: “Amau ah chun chêng in, a lak un vâkvêl ing ka tin, a Pathian uh hi’ng ka tin, amau le ka mite hi’n au.

¹⁷ Ziaziakchun, a lak ua kipat hung pawt unla, a chuam in um un, Lalpa‘n a tii. Thilbuak him him khoi kiu in, chutichun, hun lop ta’ng ka tin;

¹⁸ nang uh dingin Pa hi’ng ka tin, nang uh le kei â dingin chanu chapate hi’n lau; Lalpa bangkim hi’thei chun a tii,”