2 KORINTH 5 - PATHIAN LEKHABU THIANGTHO (BSI)

¹ I umnau lei ah In hi suksiat himaleh, van ah In, khut ah sak lo kumtuang ah um ding Pathian sak chu I nei ui ti I he ngal un.

² Van ah In chu silthua nuam in, zia In ah hin thûm leh mâu in I um un;

³ zia gual ah chun sil leu hing ngawnchang in um puai tiu.

⁴ Zia In ah I um sung un puakgik pua’n thûm leh mâu in I um un; sil lo ah um I nop ziak uh a hipua’n, silthua ah I um nop ziak uh ahi; a thithei hi hinna’n a valzaw theina dingin.

⁵ Zia ding ah ei siampa chu Pathian ahi’n, ama chun khâmlawkna Thagau ei pia tai.

⁶ Chutichun, taksa I um lai sia Lalpa kiang in I um puau hi, ti hia’n, muang tak in I um zing sek uh ahi.

⁷ Muthei ah chia lo in, ginna’n I chia zawu ahi.

⁸ Muang tak in I um un, taksa ah umlo in, Lalpa kiang in I um nuam zawu ahi.

⁹ Ziaziakchun, zia taksa hin um in, umlo leu hing, ama kipakna mi hiding chu I tuppen diu ahi.

¹⁰ Mi zosia’n taksa I thilhite, a sia a pha, I hi gual gual un I mu chiat theina ding un, Khrista vaihawmna chutpha man kilâk chiat ding I hiu.

Kichamna Nasep

¹¹ Chutichun, Lalpa launa châng hia’n, mihingte chu ka jawl sek un, Pathian het in ka um un, nang unle lei hetchian uh ka kinem ui.

¹² La kiang ua kigenpha kit ka hi puau ah, lunggil hilo ah, dinmun bep suangte chu la dawnhu theina ding un, kei uh lam ah la suan ding uh ka gen uh ahi.

¹³ Ka ngol uh leh Pathian â ding ahi’n, ka pil uh leh nang uh â ding ahi.

¹⁴ Khrista hepina chun ei sawl him him hi; mi zosia sik ah mi pakhat a thi tâk ziakin, mi zosia a thi tau hi, ka tiu ahi.

¹⁵ A hingte chu amau â ding ah a hin lo ua, a sik ua thi’ thokitpa â ding ah a hin zawkna ding un mi zosia sik in a thi tai.

¹⁶ Chutichun, tu’kipat hin taksa lam in kuama ka he ta puau hi; Khrista chu taksa lam in a la he ta leng unle, tun vang ka he ta puau hi.

¹⁷ Zaziakchun, kuale Khrista ah a um chun thilsiam thak a hung hi tai; thil luite chu a bei ta’n, en tiam un, thil zosia a hung thak kit tai.

¹⁸ Zia zosia hi Pathian ah kipat ahi’n; ama’n Khrista ziakin ama tawh kicham in ei siam ah, kichamna nasepna ei pia ta ahi.

¹⁹ Pathian in Khrista ah chun khawvel hi ama tawh kicham in a siam ah, a hi’khelnateu chu amau kãl ah guat lo in, kichamna nasepna ei vopsak tai.

²⁰ Pathian in keimau mang ah a hun chial ziakin, Khrista palai chu ka hitau hi; ziaziakchun, Khrista thasâng in ka hun don la hiu: Pathian tawh kicham tau in.

²¹ Ama ah chun Pathian dikna I hi’theina ding un, gitlo him him helo chu Pathian in ei uh ziak in gilo in a siam tai.