2 KORINTH 1 - PATHIAN LEKHABU THIANGTHO (BSI)

Chibai Bûkna

¹ Paul, Pathian doigual ah Khrista Jesu sawlchâk leh, I suapiu Timothi chun, Korinth ah Pathian kochuamte leh Akaia gam ah mithiangtho zosiate kiang in:

² I Pau Pathian leh I Lalpau Jesu Khrista ah kipat hepina leh thamuanna chu nangmau ah um ta hen.

Paul Pauchapna leh Kipak thu Genna

³ I Lalpau Jesu Khrista Pa, hepina Pa leh thamuanna zosia Pathian chu pâk in um ta hen.

⁴ Kei un Pathian ah kipat thamuanna ka nei uh, zia thamuanna chu lunggim gentheite ka thamuan theina ding un, lunggim gentheina lak inle ama’n ei thamuan zing hi.

⁵ Khrista thokgimnate tam tak ka chan gual un, Khrista jal in thamuanna le tam tak ka chang ui.

⁶ Ka thokgim ua leh nangmau thamuanna ding leh hukdamna ding ahi’n; ka thamuan ua leh, kei uh thok gual ah la thok phat ua leh la het ua, la thamuanna ding uh ahi.

⁷ Chun, thokgimna chanpite la hi gual un, thamuanna chanpite le la hiu ti ka het un ka hun kineppinau a det tai.

⁸ Suapite haw, Asia ka tun ua ka thokgimnau kha la het uh ka dawi ui, ha’tak ah, thok zaw gual lo ah, hinle kinem lo khop ah ka thok uh kha.

⁹ Ahi, thi ding ah puandaw sa’n ka kingai tau a; himaleh, zia chu keimau leh keimau kimuang lo ah, mithite kaithopa Pathian ka muan zawkna ding uh ahi.

¹⁰ Ama’n zia gual thi lau umna lak ah kipat chun ei hukdok ta’n, ei hukdok zing in, ei hukdok kit jel in ah ti, ama chung ah kinepna ka nei uh ahi.

¹¹ Nang unle pauchapna’n ei panpiu in; tichun, mi tam takte pauchapna dawnhuna maljawlna piak ah ka um tak ua leh, keimau ziakin mi tam tak in kipak thu gen in au.

Paul in A Khualzinna Ding A Thulna

¹² Ka lung sung ua sia leh pha hetna dungzui ah ka suan uh chu zia hi ahi: Khawvel ah mite leh nangmau kiang ah hizaw diak in, taksa lam pilna hilo ah, Pathian thianthona leh titakna chun ka tawi uh ahi.

¹³ La sim ua la hetthei ding uh tilo ngal chu, thu dang la kiang un ka zik puau hi; zia thute chu a tawp tiang ah la het uh ka kinem ui.

¹⁴ Hiatthiamna tiang la nei tâk dungzui un, I Lalpau Jesu ni phat leh, ka hun kisuanpi gual un nang unle kei uh ei kisuanpi in lau.

¹⁵ Zia chu gingcha’n, la kiang ua hung masa leng ka ti’n, kipakna thua ni la neitheina ding un.

¹⁶ Makedonia gam ah ka chia phat leh, hun haw malam ah, Makedonia gam ah kipat ka hung kit phat leh le, hun haw malam kit ah, nanghaw’n Judea gam lam ah ei hung thak leu chin nuam ka hi.

¹⁷ Zia gual ah ka ngaitua lai ah chun ka lungthim detlo ahi em? Ahiloleh, “Ahi,” a hem, “Ahi puai,” a hem ti vêl vêl thei dingin khawvel mite gual ah ka lemguat mai a hem?

¹⁸ Himaleh, Pathian a ginum gual in, nangmau lam ah ka thuu chu, “Ahi,” ti tawh, “Ahi puai,” ti hilo ahi.

¹⁹ A ziak chu, Pathian Chapa Jesu Khrista, keima leh Silvana leh Timothi in la kiang ua a thu ka gen uh chu, “Ahi,” ti tawh, “Ahi puai,” a ti gêl gêl pua’n, ama ah chun thil zosia chu, “Ahi,” ti ahi zing hi.

²⁰ Pathian thutiamte zosia’n, ama ah chun, “Ahi,” ti a muu hi. Ziaziakchun Pathian lopina ding ah ama ziak ah, “Amen,” ti ahi zing hi.

²¹ Chun, Khrista keimau leh nangmau ah hidetpa leh keimau ei sawlpa chu Pathian ahi.

²² Ama chun ei tepte ah, I lung sung un khâmlawkna Thagau ei pia ta ahi.

²³ Ka hinna chung ah hin ei hetpi dingin Pathian ka ko hi, nang uh hun subuai dingin Korinth ah ka hung talo ahi.

²⁴ La ginnau chung ah thunei gua hilo in, la kipakna ding ua nang uh tawh sem khawm ka hi zawu hi; ginna’n la ding det ta ngal un.