2 KHANGTHU 8 - PATHIAN LEKHABU THIANGTHO (BSI)

Solomon Thilbawl Dang Dangte

¹ Kum sawmni sung in Solomon in, Lalpa In ding tawh ama chênna In ding chu a sa zo a;

² Huram in khawpi a la piakdawte zosia le siampha kit in, Israel mipite chu a chênsak hi.

³ Chuleh, Hamath-zobah do in Solomon a kuan ah, a vazo ngalah.

⁴ Gamthip ah Tadmor khua a phudok ah, zia ban ah chun Hamath khua thil koikhawmna ding zosia chule a bawl zo hi.

⁵ Zia ban ah chun Beth-horon saknung leh Beth-horon thangnung chule tung ding zo in, khawpite chu kulbâng, kotpi leh thikjawlte’n a ûm kimvel in;

⁶ chuleh, Jerusalem, Lebanon leh a gam sung pumpi chun Solomon in bawl ding a lungtup zosia, thil koikhawmna dingte, a sakol kângtalai koikhawmna dingte leh a sepaite umna mun dingte chu, Solomon in Baalath leh mun dang dang ah chun a siam zo tai.

⁷ Israel mi hilo a la um nalai, Hit mite, Amor mite, Periz mite, Hiv mite leh Jebus mite zosia chu,

⁸ a gam sungah a cha a nau, a suan a pâkteu Israelte’n a la thâlup bang zosiau chu, Solomon in suak nasêm dingin a mang ta’n, tu’ni tiang hin a pang den tau ahi.

⁹ Israel mite chu vang Solomon in kuama suak nasêm in a mang puai; sepai dingte, sepai hotu dingte, sakol sepai ding leh sakol sepai hotu dingin a mang bep hi.

¹⁰ Mipite chung ah thuneina sâng tak nei ah hotu pang, Lengpa Solomon in za ni leh sawmnga a nei hi.

¹¹ Solomon in, “Lalpa thuthung thingkuang in a haw khâkna mun zosia hi a zek thiangtho ahiziak in, ka ji chu Israelte Lengpa David In ah chun a chên lo ding ahi,” a ti ziakin, Solomon in Pharaoh chanu chu David khawpi sung ah kipat puidok in, a chênna dingin chuam a sak piakah chun a chênsak tai.

¹² Ziaphatchun, Solomon in hulliap mai lam ah Lalpa mâichâm a siam ah chun Mosi thupiak dungzui in,

¹³ ni si’n ah lat ding bituk dungzui in, sabbath ni, thathak ni, kût hunbî nei, kum khat sung ah thawipanglo kût thumvei, hapta kût, bawkcha kût nite leh hâlmang thillatna chu a lân tai.

¹⁴ Chuleh, a pa David in a la guat dungzui in, thiampute sep ding haw chu a pawl pawl in a guat piakah; Levite chule pâkna La sa ding pawl, nisi’n ah thiampute mawpuakna dungzui ah pang dingte leh, kul kotkhak chuam chuam veng dingte chule a pawl pawl in a guat ah; zia gual ah chu bawl dingin Pathian mi David chun thu a la pia ta him ahi.

¹⁵ Thiampute hi’n, Levite hileu lengpa thupiak chu, sum leh pâi lam thu natiang in kuama’n a ngaisak lo ngam puau hi.

¹⁶ Tichun, Lalpa In a sak lim ua kipat a tawp tiang un, Solomon in a la guanggal dungzui chet chet in, Lalpa In chu sak zaw a hung hi tai.

¹⁷ Ziaphatchun, Solomon chu Edom gam, tuisuagiat pâm ah Ezion-geber leh Eloth lam in a chia tai.

¹⁸ Huram in a suakte lakah tuisuagiat hethiamte chu a longteu tawh a sawl ah. Solomon suakte tawh Ophir lam in a chiau ah; zia gam ah sana chu talent za li leh sawmnga a va puau ah; ziate chu Lengpa Solomon kiang in a hun tut sek tau hi.