2 KHANGTHU 7 - PATHIAN LEKHABU THIANGTHO (BSI)

Solomon in Tempul A Latna

¹ Solomon a pauchap zaw phatin van ah kipat in mei a hung ketha suk ah, halmang thillat tawh kithoinate chu a hun kâng tum tai; tichun, Lalpa lopina chun tempul a hun lua dim tai.

² Lalpa In sung ah Lalpa lopina’n a lua dim ziang phat ah chun, thiampute chu Lalpa In sung in a lut thei ta puau a.

³ Israel mipi zosia chun vanah kipat mei hung ketha leh, Lalpa lopina’n Tempul a hun chup ziang chu a mu phât un, dawdan chung ah lei tual si hial ah bokkhup in, Lalpa ho in a kiang ah zia gual hin kipak thu a gen tau a: “Ama a phat ziakin, a ngilneina’n le kumtuang a dai hi,” a tiu a.

⁴ Ziaphatchun, Lengpa tawh mipite zosia chun Lalpa kiang in kithoina a lân tau a.

⁵ Lengpa Solomon in, kithoina dingin bawngchal sîng ni leh sang ni tawh, belam nuai khat leh sîng ni a lân a. Zia gual ah chun lengpa tawh mipite zosia chun Pathian In latna chu a bawl tau a.

⁶ Thiampute chu a mun ding chiat un a ding un; Levite chunle Lalpa ma ah a thil githei tum dingteu chu a chawi chiat ua. Lengpa David in Lalpa choihoina dingah: “A ngilneina chun kumtuang a dai hi,” ti ah La a la guanggal dungzui in, amau tawh kimai ngat tua in, thiampute chun pengkul a hun mut tauah; ziaphatchun, Israel mipi zosia le a dingdok chiat tau hi.

⁷ Chuleh, Solomon in Lalpa In mai tual lailung chule a lân thiangtho ah; Solomon in sum-eng mâichâm a siamte chun a dawl lo ziakin, In mai tual lai chule a lân thiang ah; zia tak mun ah chun, hâlmang thillat, changbuang thillat leh kichamna thillat gancha thau haw chu a lân tau a.

⁸ Zia hun ah chun Solomon in Kût chu ni sagi sung a matpi ah; zia hun sungsia chu Israel mipi tam tak, Lebo-hamath ah kipat Aigupta gam ah Wadi tiang ah mite chunle a hung uap ui.

⁹ A leng un mâichâm latna ni sagi leh Kût ni sagi sung zet a mat tâk ziak un, a ni giat ni chun kikhopna gun tak a nei tau hi.

¹⁰ Lalpa‘n a phatna chu, David leh Solomon tawh a mipi Israelte zosia chung ah a taklat tâk ziakin, a tha sagi’na, a ni sawmni leh thum ni chun mipite chu kipak leh lungdam tak in a In lam chiat un a sawl kit tai.

¹¹ Zia gual chun Solomon in Lalpa In leh Lengpa In dingte chu a sa zo tai; Solomon in Lalpa In leh ama In, bawl ding a lungtup gual tak in a mualsua tai.

Solomon Kiang ah Pathian Kilâk Kitna

¹² Ziaphatchun, jan in Solomon kiang ah Lalpa a kilâk ah, zia gual hin a gen a: “La pauchapna chu ka he ta hen, zia mun hi ka kiangah kithoina mun hiding in ka guat chuam tai.

¹³ Van ka hun khâkbit ah gawtui a hung umlo hun a hem, a gam ne zo ding ah khaubepite thu ka hun piak a hem, ka mipite lak ah hipi ka hun lên sak phat leh,

¹⁴ ka min pu ka mipite a hung kingaitawm ua, a hung pauchap ua, ka mêl a hun hawl ua, a nun siatnau lampi a hun kiheisan phat ua leh, van ah kipat hun ngaitha’ng ka tin, a gitlonateu ngaidam in, a gam uh hi’dam kit ding ka hi.

¹⁵ Zia mun ah pauchapnate chu mu dingin ka mit hak ing ka tin, ka bil a la daw ding ka hi.

¹⁶ Kumkhua ka min a umna dingin zia tak mun hi ka la guat chuam ta’ngal ah; ka mit leh ka lungthim zia tak ah chun um den ta ding ahi.

¹⁷ Nangma la hileh, la pa David gual ah ka ma-âng ah la um zingah, ka thupiak dungzui ah ka thuguatte leh ka vaihawmna dante chu la vop zing chun,

¹⁸ la pa David kiang ah, Israelte chung ah vaihawm ah pang ding, suan leh pâk tasam pua’n la, tiah thuthung ka la siam dungzui in, la lenggam lalchutpha hi sudet ding ka hi,” a tia.

¹⁹ Himaleh, la ma-âng ah ka dan siamte leh ka thupiakte hi zui lo ah, pathian dangte na sêm ah la biak leh vang,

²⁰ ka gam hun piakna kipat hin hun botdok ing ka tin, ka min dingah ka sukthiantho zawsa zia In hi ka muphâk lo ah chawn mang ing ka tin, nam tinte lak ah thuching leh pauchângthiatna hung hita’n a.

²¹ Chuleh, zia In choisân ah um hile, a kiang hun haw kha tapo in lamdang sa tak in, bang ding ah Lalpa‘n zia gam leh zia In hi a hiti bawl lawm lawm ziang ahi tam! hun ti ta’n au.

²² Zia phat chuleh zia gual hin gen in au: Aigupta gam ah kipat a la puidokpa, a pu leh pateu Pathian, Lalpa chu nusia ah, pathian dangte zui ah, ho ah, a na a sep piak ziak un zia gual siatna hi a chung ua a tunsak ahi, hun ti ding a hiu, a ti nalai hi.