2 KHANGTHU 6 - PATHIAN LEKHABU THIANGTHO (BSI)

Tempul Latna

¹ Ziaphatchun, Solomon in zia gual hin a gen ah: “Lalpa chun, thimpi lak ah chun chêng ing ka, a la ti hen;

² himaleh, kumkhua la chênna dingin In thupi tak ka hun sak piak hi,” ti in.

³ Ziaphatchun, lengpa chu a kihei ah, Israel mipi zosia chu a kiangah a din khawm lai tak un, Israel mipi hung khawm zosia chu mal a jawl ah;

⁴ a kiang un zia gual hin a gen ah: “Israelte Pathian, Lalpa chu pâk in um hen la, ama’n ka pa David kiang ah a la kikam tiam in:

⁵ ‘Aigupta gam ah kipat ka mipi ka puidaw ni’ kipat in, Israel phung tin lak ah khoima tak hile ka min umna ding ah In sakna dingin ka la têl ngai pua’n; ka mi Israelte chung ah hotu dingle kuama ka la têl ngai diak puai;

⁶ ahi’n, ka min umna dingin Jerusalem khua hi ka la têl ta hen, ka mi Israelte chung ah vaihawm dinginle David hi ka la têl ta ahi,’ ti ah a la genpa, ama khut ma ma ah hun guitunsakpa min hi pâk in um ta hen.

⁷ Ka pa David khan Israelte Pathian, Lalpa min ah In sak ding kha a la ngaitua ta’n;

⁸ himaleh, Lalpa chun ka pa David kiang in, ‘Ka min ah In sak ding dan la ngaitua hi pha ka sa ahi;

⁹ ahi’n la, nang in vang zia In chu sa pua’n la tin, nang ah kipat hung piang ding la chapa chun ka min ding ah In chu ei sak piak ding ahi,’ a la ti tai.

¹⁰ Lalpa‘n a thugen chu tu’hin a guitunsak ta’n; Lalpa thutiam dungzui in ka pa David go chu lua in, Israelte lalchutpha’n ka kichu ta’n; chuleh, Israelte Pathian, Lalpa min umna dingin chu ka la sa ta ahi.

¹¹ Zia tak ah chun, Israel mipite kiang ah a la tiam, Lalpa thuthung thingkuang chule ka koilut ta ahi,” a ti tai.

Tempul Latna’ Solomon Pauchapna

¹² Ziaphatchun, Solomon chu Lalpa mâichâm kiang ah Israel mipi hung khawm zosiate mu ah chun a hung dingdok ah, a khutbânte chu a jak a.

¹³ Solomon in sum-eng dawdan pakhat a siam, a dung tong nga, a vailam le tong nga leh tong thum ah sâng, Tempul huang sung ah chun a koi ah; zia chung ah chun a dingdok ah. Israel mipi kikhawm zosiate mit mu ah chun khupdin in, van lam in a khutbânte chu a jakdok a:

¹⁴ Aw Lalpa, Israelte Pathian! Lei leh van ah nangma gual Pathian dang him him a um pua’n, a lungthim zosiau ah nangma hun zui la suakte chung ah hin, la thuthung supiting in la hepi sek a;

¹⁵ la suakpa, ka pa David kiang in la thutiam chu la la guitun ta hen; ahi ngut hi, la kam ah la la gendawsa chu tu’ni hin la khut in la pitinsak tai.

¹⁶ Aw Lalpa, Israelte Pathian! La suakpa, ka pa David kiang in, La chate chun nangma gual ah ka lampite chingthei tak ah a zui ua, a lampiteu a zuikhial lo ua leh, nangma golua ah Israelte lalchutpha kichu ding mi tasam lo ding la hi, ti ah la la thutiamsa kha vopdet zing inla;

¹⁷ ziaziakchun, Aw Lalpa, Israelte Pathian! La suak David kiang ah la thutiamna paukamte chu sukpitin in um ta hen!

¹⁸ Himaleh, nang Pathian hi, lei chung ah mihingte lak ah hin la hung chêng tak tak na diam? Van leh van sângpen inle a hun dawl lo la hiziak in, zia ka In sak hi nang â dingin a neuna ding e!

¹⁹ Aw Lalpa ka Pathian, la suakpa dotna leh pauchapna hi a la ngaitha’n la, la suakpa pauchapna leh ka dotna hi ei ngaisak inla;

²⁰ zia In lam hi nga’ la suak pauchapna hi la ngaithâk theina dingin, la min umna ding ah la tiamna mun lam hi a sûn a jan in hun nga zing in.

²¹ Chuleh, zia mun lam hi la ngat ah, la suakpa leh la mipi Israelte a hung pauchap phat ua leh, a dotnau dawnhu dingin a la ngaitha sek in; van ah la umna kipat in hun dawnhu sek inla, a la ngaitha piak inla, ngaidam sek in.

²² Kua a hem khat in midang chung ah thil a bawlkhial ah, zia In ah la mâichâm bul ah kihaksial ding leh kitiamna nei ding ah a hung phat leh,

²³ van ah kipat in a la ngaitha’n la, migilo chu a gitlona dungzui in thiamlo chansak inla, midik chu a dikna dungzui in thiamchansak in, la suakte chung in vai hun hawm sek in.

²⁴ Chuleh, la mipi Israelte hin la chung ah thil a hi’khial ziak ua, a mêlmateu tawden ah a um phat ua, la kiang lam a hun ngat phat ua, la min a panpiu ah, zia In ah hi pauchap ah, thil a hung dot phat ua leh,

²⁵ van ah kipat in hun ngaitha’n la, la mipi Israelte hi’khialna chu ngaidam inla, a pu leh pateu ah kipat a chênna ding ua piak la tiamna gam ah hin pui tung kit in.

²⁶ La chung ah thil a hi’khial ziak ua van kotkhak a hung kikhâk ah, gua a hung zuk lo phat leh, zia mun lam hi nga’ a hung pauchap ua, la min a hun ko ua, la gawtna ziak ah a gitlonau a hun haisan phat ua leh,

²⁷ van ah kipat in a la ngaitha’n la, a chiana ding uh lampi dik chu kawkmu in, la suakte leh la mipi Israelte gitlona chu ngaidam inla, la mite hi a gochan ding ua la piakna gam ah hin gua hun zuksak kit in.

²⁸ Gam ah kial a tun ah, hisiate a hung lên ah, thâichi hikte a lênah, khauphak leh lung a hung punah, mêlmate’n khua haw a hung sim ua; chuleh, natna leh hivei sia a hung lên phat leh;

²⁹ mimal kua a hem khat hihen la, la mipi Israelte lak ah kua hiziang ta leh a hung pauchap ua, a hivei ziak leh a lungkham ziak ua zia In lam hi nga, a khutbânteu jakdok ah a hung pauchap phat ua leh,

³⁰ la umna van ah kipat in hun ngaitha’n la, ngaidam inla, a lungthim dungzui chiat un dawnhu in; nangma bep in mihing lungthim ngaituana la he ngal a.

³¹ Tichun, ka pu leh pateu kiang ah la la piakna gam ah, hing leh dam ah a um sungsiau, nangma lau leh la lampite zui ah a hintheina ding un.

³² Zia gual ma chun, gam dang mi, la mi Israelte lak ah mi hi khel lo, la min lopi ziak leh la khut hat tak leh la khutbân jakna ziak ah gamla tak ah kipat hungte chunle, zia In lam hi nga’ a hung pauchap phat ua leh,

³³ nang in la umna van ah kipat in a la ngaitha’n la, nam dangte’n le a hun ko phat ua leh, a lungthim dungzui chiat un a la dawnhu sek in; tichun, la mipi Israelte’n a hun lau gual ua lei chung ah mi zosia’n la min a hun het ua, a hun lau theina ding un leh; zia In ka sak hin la min chu pu ahi ti a hiattheina ding un.

³⁴ Chuleh, la mipite hin a mêlmateu chu nangma sawl dungzui ah a vado sek ua, la khawpi têlchuam leh la min ah In ka la sakdaw lam nga’ hi, la kiang ah a hung pauchap phat ua leh,

³⁵ nang in a pauchapnau leh a dotnau chu van ah kipat in a la dawnhu inla, zaw’na pesek in.

³⁶ Chuleh, la chung ah thil a bawlkhial phat ua leh, (kuama thil bawlkhial lo umlo ahi ziakin) a chung ua la lungnat ah, a gâlteu khut ah la piakdaw ah, a gamla hi’n, a nai tuam hiziang leh sal ah pui mang ah a hung um khâk ua leh le,

³⁷ a saltânnau gam ah a hung kingaitua dawu ah, kisik ah, ka la gilo tau in, diklo tak leh nunsia tak in ka la um tau hi, a tiu a;

³⁸ a saltânnau gam ah a lungthim leh a ngaituana zosiau ah kisik ah, a pu leh pateu kiangah la piakna gam leh, nangma’n la têlchuam zia khawpi leh la min ah ka In sak lam hun nga’ a hung pauchap phat ua leh,

³⁹ a pauchapnau leh a dotnateu chu nang in la umna van ah kipat in a la ngaitha’n la, zaw’na pesek inla, la chung ah a la bawlkhial ta la mite chu ngaidam sek in.

⁴⁰ Tu’hin, Aw ka Pathian, zia mun ah kipat pauchapnate chu mu dingin la mit hak inla, ngaisak tak in la bille a ladaw sek in.

⁴¹ Tu’hin, Aw Lalpa Pathian, nang leh la hatna thuthung thingkuang hi tawh, la umna mun ah kipat in hung thodok ta’n. Aw Lalpa Pathian, la thiampute chu, hukdamna puan in kithuam tau hen; la mi ginumte chu, la phatna ziakin lim tau hen!

⁴² Aw Lalpa Pathian, la sathaunu’ hi pâm pai kin. La suak David â ding ah la ngilneina hi, hezing in, ti in.