2 KHANGTHU 5 - PATHIAN LEKHABU THIANGTHO (BSI)

¹ Tichun, Lalpa In ah sep leh bawl ding zosia chu Solomon in a zo thiang tai. A pa David in a la lat thiansa zosia chu Solomon in a la lut sik sek ah, Pathian Insung go thil lak ah chun dangka thik, sana leh ûm leh bêl zosia chu a koikhawm tai.

Tempul Sung ah Thuthung Thingkuang Laklutna

² Ziaphatchun Solomon in, Israel upate leh phung tin ah hotute leh Israel mipite lak ah a pu leh pateu dungzui ah phung u’pate zosia chu, David khawpi Zion ah kipat Lalpa thuthung thingkuang vapawdok dingin Jerusalem khua chun a ko khawm in,

³ Israel mipite zosia chu, a tha sagi’na a Kût bawl niu ah chun lengpa kiang in a hung khawm tau hi.

⁴ Israel upate zosia chu a hungkhawm phat un, Levite chun thuthung thingkuang chu a hun pawdok tau.

⁵ Thiampute leh Levite chun, zia thuthung thingkuang chu tawh, biakbûk sung ah ûm leh bêl thiangtho zosia chu tawh kikhopna puanbûk chu a hun pawdok ua.

⁶ Lengpa Solomon tawh, Israel mipite a kiang ah thuthung thingkuang ma-âng ah hung khawm zosia chun belam leh bawngchal, sim sên lo ding khop ah tam that in kithoina a bawl tau hi.

⁷ Ziaphatchun, thiampute chun Lalpa thuthung thingkuang chu a umna ding mun, mun thiangtho sunggil, mun thiangtho pen leh Cherubte tha jakpalna nuai ah chun a hun koi tau hi.

⁸ Thuthung thingkuang umna ding mun chu Cherubte chun a thau a jak khum ua; tichun, thuthung thingkuang tawh a jawnna mol haw lia dingin Cherubte chun a thau chu a chung in a jak pal ui.

⁹ A jawnna jawlte chu a sau ma ma ziakin, mun thiangtho pen ma-âng jawn ah, mun thiangtho pindan ah kipat chun a mongte chu a mu’phâk ah; himaleh, In pawlam ah kipat chun vang aki mupha puai; a jawlte chu tu’ni tiang hin zia mun ah chun a um den tai.

¹⁰ Zia thuthung thingkuang sung ah chun: Israel chate Aigupta gam ah kipat a hung pawt lai ua, Lalpa‘n amau tawh kikâl ah thuthung a siam, Horeb tâng ah Mosi’n suangpêk pani a la koite tilo ngal, a dang bangma a um puai.

¹¹ Mun thiangtho ah kipat thiampute a hung pawt daw phat ua chun, (zia tak ah thiampu umte zosia chu, amau pawl bîk ah kichuam bawlna umlo ah kilân thiangthosa a hiziak un;

¹² thiampute dan ah La sa pawlte: Asaph, Heman, Jeduthun leh a chateu leh a Inkuanteu zosia, puan malngat ah kithuam ah, vai khutbette, theilete leh lilute chawi kawm ah, mâichâm sualam kâi ah thiampu pengkul mutte za khat leh sawmni chu tawh a ding khawm ui.)

¹³ Pengkul mutte leh La sate mawpuakna chu: Lalpa pâkna leh kipak thugenna ding ah a thil githeiteu chu pakhat git gual ah hiat thei ding ah tumgit ahi, pengkul leh vai khutbette leh thil tumgit thei zosia tawh a awu hun sua in: “Ama a phat ziakin, a ngilneina chunle kumtuang a dai hi,” a tiu a; Ziaphatchun, Lalpa lopina sûmpi chun In chu a hun lua dim tai.

¹⁴ Tichun, Pathian In chu Lalpa lopina sûmpi’n a lua dim tâk ziakin, thiampute chunle na a sêm sêm thei ta puau hi.