2 KHANGTHU 4 - PATHIAN LEKHABU THIANGTHO (BSI)

Tempul ah Matchâkte Chu

¹ Sum-eng mâichâm, tong sawmni ah sau, tong sawmni ah lian leh tong sawm ah sâng pakhat a siam hi.

² Tuibêm, lian tak, a geikawl sau lam tong sawm, chuleh, a sândan le tong nga kisiam pakhatle a umah,

³ a tawlam le a geikawl gual in tong sawm gêl ah sau ah kibawl ahi.

⁴ Bawngchal sawm leh ni’n a puak gual un a kisiam ah; zia bawngchal pathumte chun mallam a ngau ah, pathum dangte chun tumlam a ngau ah, pathum dangte chun simlam a ngau ah, a dang pathum um nalaite chun sualam a ngau hi; ziate chung ah chun tuibêm chu a kikoi hi. Zia bawngchalte chu a kinungngattua chiat a hiu.

⁵ Zia chu tûk khat ah sâ ah kisiam, a geikawl chule no geikawl gual ah kisiam, lili pâk gual ah kisiam ahi; chuleh, tui bath sîng thum dawl ahi.

⁶ Chuleh, kisilna kuang le sawmkhat a siam ah; panga chu tempul changlam kâi in a koi ah, panga dangte chu tempul veilam kâi in a koi hi. Zia kuangte ah hin hâlmang thillat dingte chu a sawp diu ahi. Tuibêm ah tui chu vang thiampute kisilna ding ahi.

⁷ A siam ding dan tawh kituak tak in, thaumei tunna ding sawmkhatle, sana thiang ngen in a siam ah; ziate chu tempul sung, mallam kâi ah panga leh, simlam kâi ah panga a koi hi.

⁸ Chuleh, dawkan sawmkhat a siamte chule tempul sung, changlam kâi ah panga, veilam kâi ah panga a koi ah, ziazaw chun sana tuibêm za khat le a siam hi.

⁹ Thiampute pindan ding leh pindan lian a siam zaw in, a kikâl ua kotkhak dingte le a siam ah, zia chu sum-eng tui a luan khum hi.

¹⁰ Tuibêm chu tempul sim, sualam kâi kil in a koi hi.

¹¹ Huram chun belte, vutlua leh kisilna kuangte chu a siam ah, tichun, Pathian In ah matchâk dingte chu Lengpa Solomon â dingin Huram chun a hun siam zo tai.

¹² Sûtpi panite, belbute, sûtpi luzum ding panite leh, zia sûtpi luzum ding ah pani kisiamte khû dingte,

¹³ zia luzum khû ding ah kisiam ah chun, theibufai gapal tawhbang chu tian ni gêl ah kitiang in za li a siam ah; ziate chun sûtpi luzum khû chu a liau hi.

¹⁴ Tuibêm tunna ding a keng leh kisilna kuang le a siamah,

¹⁵ tuibêm pakhat kitunna dingin bawngchal sawm leh ni le a siam hi.

¹⁶ Tichun, Lalpa In ah matchâk ding belte, vutluate leh thikzum kikâte chu, sum-eng kihâl thiang tak mang in Huramabi chun Lengpa Solomon â ding a hun siam zo tai.

¹⁷ Ziate chu Jordan phâijawl ah Sukkoth tawh Zeredah kikâl ah, bêl lei mun ah chun lengpa chun a sung hi.

¹⁸ Solomon in ziate haw chu tam tak a siam ah, sum-eng kimang jat chule a te’ ah te’sên ding gual ahi puai.

¹⁹ Tichun, Solomon in Pathian In ah um ding, ûm leh bêl zosia chu a siam zo tai. Sana mâichâm, vaithum tianna ding dawkan leh,

²⁰ guatsa dungzui ah mun thiangtho sung lam salvâk ding, sana thiang ah kisiam thaumei leh a tunna dingte;

²¹ chuleh, pakchate, thaumeite leh belbu sana thiang ngen ah kisiamte chu tawh,

²² thaumeiphita chêtanna dingte, kuangte, thik haikhawte leh meiâm luakna dingte chule sana thiang ngen in a siam hi. Tempul lutna dingte chu: a sunggil lam mun thiang pen ah lutna ding kotkhakte leh tempul kotkhakte chule sana tui a luan khum hi.