2 KHANGTHU 34 - PATHIAN LEKHABU THIANGTHO (BSI)

Josiah Vaihawmna

¹ Kum giat mi ahi in Josiah chun vai a hun hawm pan a; Jerusalem ah chun kum sawmthum leh khat sung vai a hawm hi.

² Lalpa mit mu ah thil dik a bawl ah, David lampi a zui hi; tichun, changlam a hem, veilam a hem in a pêt mang puai.

³ Kum giat bep mi ahi ah, naupang cha ahi in vai a hawm pan ah, a pu David gual in a Pathian lung lam chu a hawl ah; a lal kum sawm leh ni’na chun Judai gam leh Jerusalem khua chun thoimualte, dawikhuamte leh milim kisiam haw chu a subei thiang zo tai.

⁴ Ama thu’n Baal hona mâichâmte chu a susiau ah; milim hona mâichâm a chung lam ah um haw chule a hun kai chim tau hi. Dawikhuamte leh milim sunthaw leh kikhuak ah kibawlte chule a khen chim ah; ziate chu a gawtbuang ah, ziate kiang ah kithoina a la bawl sekte haw thân lak ah chun a gawtbuangte chu a the’ tai.

⁵ Ama chun a thiamputeu gu haw chule a mâichâmteu chung ah chun a hâlvâm a; tichun, Judai gam leh Jerusalem khua chu a hi’thiangtho tai.

⁶ Zia gual tho ah chun Manasseh, Ephraim, Simeon leh Naphtali gam tiang in, a kîm leh kiang ah a chimsa haw natiang in a bawlpha kit a;

⁷ mâichâmte chu susia’n, a dawikhuamteu leh a milimteu haw chu a gawt buangah, Israel gam sung zosia ah gimtui hâlna mâichâmte chu a susia dik dek tai. Ziazaw chun, Jerusalem khaw lam in a kile’kit tai.

Dan Lekhabu Mudawna

⁸ A vaihawmna kum sawm leh giat tin kum ah chun, a gam sung leh Pathian In a suthiang zo ta’n; Azaliah chapa Shaphan tawh, khawpi awppa Maaseiah tawh, thil tepte ah pang sek Joash, Joahaz chapa chu Lalpa a Pathian In siampha dingin a sawl a.

⁹ Amau cheng chu thiampu lal Hilkiah kiang in a hung un, kotkhak vêng ah pang sek Levite chun Manasseh leh Ephraim mite lak leh, Israel mi a um nalai sunte lak leh, Judah mipi leh Benjamin nam ah mite zosia leh Jerusalem khua chêngte lak ah kipat in; Pathian In siamphatna ding ah a tuak khawmteu chule a piau a.

¹⁰ Zia thawlawmte chu Lalpa In bawlna sep enkolte khut ah chun a pedok un; Lalpa In siampha pawlte chunle zia sum chu In siamphatna ding leh tundin kitna dingin a mangcha tau hi.

¹¹ Judai gam ah lengte a la suksiatsa haw zosia bawlphat kitna ding in, thing bawl thiamte’n a In thing ding a siamna ding leh, suang sêk thiamte’n suang a chawkna ding ua a mat ding un a pedok tau a.

¹² Mipite chun ginum tak in na a sêm chiat tau a. Ziate nasepna chu enkai dingin Levi phung ah mi ma ma, Merari chate lak ah Jahath leh Obadiah tawh, Kohath chate lakah Zekhariah leh Meshullam chu a guatdok tau a. Levi chite lak ah thil githei tum thiam ngen haw chu,

¹³ thil gik pawte enkâi ding leh, nasep tincheng entha ding ah guatdaw a hiu ah; chuleh, Levi phung ah mi khenkhatte chu lekha zik ding, vaihawm ding leh kotkhak vêng ding ah guat a hiu hi.

¹⁴ Lalpa In ah sum hung kichawikhawmte chu a hun lakdaw phat un, thiampu Hilkiah chun Lalpa Dan Lekhabu, Mosi kiang ah piak ah um chule a mudok a.

¹⁵ Hilkiah chun lekha zikpa Shaphan kiang in, “Lalpa In sung ah Dan Lekhabu ka mudok tai,” ti’n a gen ah; chuleh, Hilkiah chun zia Dan Lekhabu chu Shaphan kiang in a pedok a.

¹⁶ Shaphan in zia Lekhabu chu lengpa kiang in a pesawn ah; lengpa kiang in zia gual hin a gen a: “La suakte chun ngansia ah a um gual chiat un na chu a sêm tau in;

¹⁷ Lalpa In sung ah paisa chule a chomdok thiang un, sepkolte khut ah pedok in, zia chu nasemte khut in a pesawn ui,” ti’n a hil a.

¹⁸ Lekha zikpa Shaphan chun lengpa kiang in, “Thiampu Hilkiah in zia lekhabu hi ei pia ahi,” a tia. Shaphan in zia lekhabu chu lengpa kiang ah ngai tak in a simdok a.

¹⁹ Lengpa chun Dan thute chu a het phat in a puante chu a botthêk tai.

²⁰ Ziaphatchun, lengpa chun Hilkiah, Shaphan chapa Ahikam, Mikah chapa Abdon, Lekha zikpa Shaphan tawh lengpa suak Asaiah kiang in thu a pia:

²¹ “Zia Dan Lekhabu kizikte hi I pu leh pateu in a la zui tâk lo ziak un, I chung un Lalpa lungnatna huaisia tak chu a la tung ta hen; chiau inla, zia Lekhabu kimudok thute dungzui ah, keima leh Israel leh Judai gam ah um nalai sunte chungchâng hi, Lalpa kiang ah ei vadawp piak tiam un,” ti’n a sawl tai.

Thiampu Huldah A Dotnau

²² Tichun, Hilkiah tawh lengpa’n a mi sawlteu chu jawlnei Huldah kiang in a vachiau ah; ama chu Shallum ji ahi’n, a pawsal chu Hasrah chapa Tokhath chapa, tempul ah nîk leh puan enkol ah pang sek ahi’n (Jerusalem khua chênna mun Pani’na chu chêng ahi;) zia nu kiang ah chun zia thu chu a vagen tau a.

²³ Ama chun a kiang un, “Israelte Pathian, Lalpa chun zia gual hin a gen hi: Ka kiang ah hun sawlpa kiang ah chun zia gual hin vagen un;

²⁴ Lalpa‘n zia gual hin a gen hi, va tiu in: Zia mun leh a sung ah chêngte chung hin siatna leh hânsia lawna zosia, Judai gam ah lengpa kiang ah kisimdok lekhabu kizikte haw zosia chu, hun tunsak him him ding ka hi.

²⁵ Keima ei kiheimangsan in, pathian dangte kiang ah kithoina a lat ziak un, amau khut nasepte ah chun ei choklungnau ah; ziaziakchun, zia mun ah hin ka lungnatna buntha’ng ka tin, zia chu phelmit zaw hipua’n a.

²⁶ Himaleh, Judai gam ah lengpa, Lalpa kiang ah zia thu chu dawp ding ah hun sawlpa kiang ah chun, zia gual hin vahil un: Lalpa, Israelte Pathian chun zia gual hin a gen hi: La thu hiatte chung thu ah khan zia gual hin a gen hi;

²⁷ zia mun thu leh a sung ah chêngte chung thu kigen haw la het ah, Pathian âng ah kisik leh kingainiam tak ah la umna ziakin, ka ma-âng ah la puante botthêk ah, la hung kâ tâk ziakin, ke’nle la ni’na chu ka la ngaitha tai, Lalpa‘n a tii.

²⁸ Zia mun leh a sung ah chêngte chung ah siatna ka hun tunsak dingte chu la mit ah mu man lo dingin, nang chu vang la pu leh pate kiang in hun chawl damsak ta’ng ka tin, thamuang tak in la thân ah sial in um ta’n la, a tii, ti hil un,” a tia. Zia thu chu lengpa kiang in a hil kit tau hi.

Thuthung Siamthak Kitna

²⁹ Tichun, lengpa chun Judai gam leh Jerusalem ah upa haw chu a ko khawm a.

³⁰ Lengpa chu Judai gam ah mipite tawh, Jerusalem ah chêngte zosia chu tawh, thiampute leh Levi mite leh mipi zosia, a lian a neute tawh Lalpa In ah chun a chia to tau a; amau haw zosia het dingin, Lalpa In ah a mudawu Thuthung Lekhabu thute chu a simdok ta’n.

³¹ Lengpa chu ama munin a ding ah, Lalpa thu zui ding leh, a thupiakte vopdet ah, a thuthungte leh a dan thuguatte chu a lungthim zosia leh a thagau zosia ah zui ding leh, zia lekhabu kizik dungzui ah thuthungte chu bawl vek dingin, Lalpa kiang ah chun thuthung a hun bawl tai.

³² Ziaphatchun, zia thute dungzui ah pang dingin, Jerusalem khua mi a hung pang zosia tawh, Benjamin phung ah kipat a hung pang zosia chu a kitiamsak tai. Jerusalem khua chêngte chun, a pu leh pateu Pathian, Pathian thuthung dungzui ah chun a bawl tau hi.

³³ Josiah chun, Israelte gam sung zosia ah kipat chun thil ki’dak um zosia chu a chomdok thiang suak ta’n; chuleh, Israel gam sung ah mi zosia chu, Lalpa a Pathian bep uh a ho sak tai. Ama dam sung sia chu, a pu leh pateu Lalpa Pathian chu a kiheisan ta puau hi.