2 KHANGTHU 33 - PATHIAN LEKHABU THIANGTHO (BSI)

Manasseh Vaihawmna

¹ Manasseh chu kum sawm leh ni ahi in vai a hawm pan ah; Jerusalem khua’n kum sawmni leh nga sung vai a hawm hi.

² Nidang lai ah a la chêngsa, nam tinte’n thil ki’dak um tak a la bawl ziak un Israelte ma-âng ah Lalpa‘n a nawdawte gual khan, Lalpa mit mu in thil ki’dak um takte a hun bawl kit tau a.

³ A pa Hezekiah in a la suksiat thoimualte hun siampha kit in, Baal ho’na mâichâmte le siam in, dawikhuamte phu kit in, van lam thilte hun ho in, ziate na chu a hun sep piak kit zaw ta mai hi.

⁴ Lalpa‘n a la gensa, “Jerusalem ah chun ka min a um zing ding ahi,” a la ti’na mun, Lalpa In ah chun pathian dang mâichâm a hun siam kit a.

⁵ Chuleh, Lalpa In huang te ni ah chun van lam thilte hona dingin mâichâm a hun siam a.

⁶ Hinnom Chapa Phâijawl ah chun ama chapa ngei le mei lak ah kithoina’n a la chia thensak ah; chuleh, dawi bawl, mitvaidawi, âisân, thitha ho’na leh thitha tawh kijawlna haw le a hun bawl a. Lalpa mit mu ah thil phalo khawk tak tak leh a choklungna thei tak takte a hun bawl tai.

⁷ A milim siam haw chu Pathian In ah chun a koi ah, zia mun thu ah hin Pathian in David leh a chapa Solomon kiang ah khan zia gual hin a la gen ta’ngal a: “Israel nam zosia lak ah kipat ka têlchuam, Jerusalem khua zia In ah hi’n kumkhua’n ka min koi ding ka hi’n;

⁸ amau chun a zui ding ua thu ka piak zosia, ka dan thute, chawndan pha leh Mosi khut ah ka thupiakte chu a zui nâk ua ahi chun, la pu leh pateu ka la piakna gam ah kipat hin, Israelte keng chu suan dawsak lo ding ka hi,” a ti’sa kha ahi’n.

⁹ Tichun, Manasseh in Judah mipite leh Jerusalem khua’ chêngte chu a la pui khial ta’n, Israel mipite ma ah Lalpa‘n a la sukmangthaite sâng inle thil phalo a la bawl zaw hial tau hi.

Gitlona Haisan Nung ah Manasseh Tundin Kitna

¹⁰ Manasseh leh a mipite kiang in Lalpa‘n thu gen maleh, amau chun a ngaisak nuam puau hi.

¹¹ Ziaziakchun, Assuria lengpa sepaite hotu haw chu Lalpa‘n hun sawl in, Manasseh chu man in thikkhau lingnei leh kol busak in, Babulon khua lam in a pui mang tau hi.

¹² Lungngaina huaisia tak a tuak phatin, a pu leh pate Pathian, Lalpa kiang ah kingainiam tak in a doisakna a don tai.

¹³ A pauchap ah, Pathian in a dotna a hia, a thûmna a dawnhu a; tichun, a leng gam Jerusalem lam in a hun tungding kit tai. Ziaphatchun, Manasseh in Lalpa chu Pathian tak tak a hinai ti a hun he tai.

¹⁴ Zia nungah chun, David khawpi pawlam ah Gihon tumlam phâijawl ah kipat Sanga Kotpi tiang in kulpi chu a hun siampha kit ah; Ophel mun chule sâng tak in kul in a hun ûm kîmvêl suak tai. Chuleh, Judai gam ah khawpi kul nei zosia ah chun a vêng ding sepai hotute a koi suak tai.

¹⁵ Lalpa In sung ah kipat chun gam dangte pathian leh milim haw zosia chu a ladok ah; chuleh, Lalpa In umna tâng leh Jerusalem khua a mâichâm siam zosia chule khawpi pawlam in a paidok sik sek tai.

¹⁶ Lalpa mâichâm a siam kit ah, zia chung ah chun kichamna leh kipak thu genna ding ah kithoinate chu a lân kit ah; chuleh, Judai gam ah mipite chu Israelte Pathian, Lalpa na sêm dingin thu a pia tai.

¹⁷ Mipite chun thoimualte ah chun kithawi sek maleu le, Lalpa a Pathian kiang bep un a lân sek tau hi.

Manasseh Thi’na

¹⁸ Tu’hin, Manasseh thilbawl zosia: a Pathian kiang ah a pauchapna hileh, Israelte Pathian, Lalpa min ah thiamgau in a kiangah a thugente haw zosia chu, Israel Lengte chanchin zikna lekhabu chun zik lut in a um tai.

¹⁹ A pauchapna, Pathian in a thildot a dawnhu dan, a gitlona zosia leh a ginum lo dante, a thoimual siamna munte, dawikhuam a bawlte leh a milim siamte leh a kingainiam ma’ a thilbawl zosia chu, thiamgau in a thil tepte’na lekhabu chun a la zik lut suak ta ahi.

²⁰ Tichun, Manasseh chu a pu leh pate kiang in a ipmu ta’n, ama In ah chun a vui tau hi. Ama chapa Amon in a thasâng in vai a hawm tai.

Amon Vaihawmna leh A Thi’na

²¹ Amon in vai a hawm pat kum ah chun, ama chu kum sawmni leh ni ah upa a hi’n; Jerusalem ah chun kum ni sung vai a hawm hi.

²² A pa Manasseh bawl dan gual tho in Lalpa mit mu ah thil phalo takte chu a bawl hi. Amon chun a pa Manasseh in a la bawlsa, milimte zosia kiang ah chun kithoinate lân in, a nau a sep piak hi.

²³ A pa Manasseh a la kingainiam gual ah umlo in, Amon chu Lalpa âng in a kingainiam nuam pua’n; zia Amon hin vang thil a bawlsual lian zaw deu deu hi.

²⁴ A suakte ma ma’n ama thâna ding a ngaituau ah, ama In sung ah chun a that tau hi.

²⁵ Himaleh, a gam mipite chun, Lengpa Amon tha ding dan ngaitua ah pang zosiate chu a that gam tau ah; tichun, a gam mipite chun a chapa Josiah chu a thasâng ah vaihawm dingin a siam tau hi.