2 KHANGTHU 3 - PATHIAN LEKHABU THIANGTHO (BSI)

Solomon in Tempul A Sakna

¹ Jebus mi Ornan buphual jawl ah David in a la guanggalna mun, a pa David kiang ah Lalpa a la kilâkna mun ma ma Jerusalem khua Moriah tâng ah chun Solomon in Lalpa In ding sakdaw a hun gua’n,

² a vaihawm kum li’na, a tha ni’na leh a ni ni ni’ chun In sak ding chu a hun gaw tai.

³ Solomon in Pathian In dingah a sak guat chu zia gual hi ahi: te’na lui gual in, a dung lam chu tong sawmguk ahi’n, a vailam chu tong sawmni ahi.

⁴ A In mai lam ah hulliap ding chu a vai lua suak ah chia theng, tong sawmni ahi’n; a sândan chu tong za khat leh sawmni ahi. Chuleh, a sung lam chu sana thiang tui ah kiluankhum ahi.

⁵ Pindan lianpen bâng chu châkthing ngen leh sana thiang tui kiluan khum; chuleh, tûmbâk leh khaidiat lim ah kijem ngen ahi.

⁶ Suang mantam chi chuam chuam in zia In chu jem ahi. Zia sana kimangte chu Parvaim gam ah kila lut ahi.

⁷ Tichun, a In sak chu: a jawlte, a khuamte, a bângte leh a kotkhakte chu a leng ah sana thiang tui ah luan khum ahi; chuleh, a bâng zosia chun Cherub lim ngen a kikhuak dim hi.

⁸ Mun thiangtho pen chule a siam a: A dung lam leh a vailam kibang ah tong sawmni ah sau, tong sawmni ah lian ahi; zia mun sana tui luan khum ding ah chun sana thiang talent za guk a lut hi.

⁹ Thikkil dingin sana shekel sawmnga gik mat zaw ahi. Pindan chungnung chule sana tui ah luan khum ahi.

¹⁰ Mun Thiangtho pen ah chun Cherub lim pani kikhuak, sana tui kiluan khum a um hi.

¹¹ Cherubte thapal kizomtua chu tong sawmni a ting ah; pakhat tha sau dan mai mai chule tong nga ahi, zia chun a In bâng chu a sunpha’n, a tha langkhat chu tong nga sau ahi, zia chun Cherub dang tha langkhat chu a hun sun pha kit a;

¹² Cherub pakhat zawk tha, tong nga sau chun a In bâng langkhat lam a sun pha kitah, a langkhat lam chun Cherub pakhat tha langkhat chu a sun kit hi.

¹³ Zia Cherub panite tha kizom chu tong sawmni a ting ah; chuleh, zia Cherubte chu amau keng gêl in a dingdok ua, hulliap lam chu a nga gêl ui.

¹⁴ Solomon in a puanjak dingin puan a dum, a sandup leh a sandâng mang in puan malngat ngen in a siam ah. Chuleh, a chung un Cherubte lim le a siam chiat hi.

¹⁵ In mai ah um ding khuam pani, tong sawmthum leh nga sâng gêl a phu ah, a lubawk tong nga gêl a lêk un a siam a.

¹⁶ A lubawkte chu a khuam chu tawh khaidiat ah kikânden hileh kilawm tak in a bawl gêl ah; zia khaidiat ah chunle theibufai gapal, za khat kithil hileh kilawm le a siam hi.

¹⁷ Zia khuampi panite chu, Tempul mai changlam kâi ah pakhat leh, veilam kâi ah pakhat a phuah; changlam kâi ah khuampi min ding ah chun Jakin a sak ah; veilam kâi ah khuampi min ding ah chun Boaz a sak hi.