2 KHANGTHU 28 - PATHIAN LEKHABU THIANGTHO (BSI)

Judai Gam ah Ahaz Vaihawmna

¹ Ahaz chu kum sawmni a ti’n in vai a hawm pan ah; Jerusalem ah chun kum sawm leh guk vai a hawm hi. A pu David gual in Lalpa mit mu ah thilpha a bawl pua’n;

² Israelte gam ah lengte umchan a zui hi. Baal limte natiang a la bawl a;

³ Hinnom chapa Phâicham ah kithoinate bawl in, Israel mipite ma-âng ah a la um, Lalpa‘n a la nawdaw piak namte’n ki’dak um tak a la bawlteu chu bawl in, a chapate le a la lân tai.

⁴ Tângvûm leh thingbuk nuai tincheng ah chun, thoimualte, kithoina leh thillatte a la bawl ta mai hi.

Aramte leh Israelte’n Judai Gam A Do-nau

⁵ Ziaziakchun, Lalpa a Pathian in Aram mite lengpa khut in a pedok ta’n; amau chun a zo un, a mipi tam takte chule Damaska khua lam ah sal in a pui mang zo tau hi. Ama chule Israelte lengpa khut ah piakdaw ahi’tâk ziakin, mi tam tak chu a that gam tau hi.

⁶ A pu leh pateu Pathian, Lalpa a la nutsia tâk ziak un, Remaliah chapa Pekah chun ni khat sung bep in, Judai gam ah sepai hat leh hangsan ngen nuai khat leh sîng ni hial a that tai.

⁷ Chuleh, Ephraim phung ah mi hangsan Zikhri chun lengpa chapa Maaseiah leh lengpa In sung ah hotu pen Azrikam tawh, lengpa nuai ah thunei pen Elkanah cheng hile a that tai.

Oded Thupuaklut

⁸ Israel mipite chun a chanauteu lak ah numei, tangval leh nungak kigawm nuai ni hial ah tam chu sal in a man tau ah; chuleh, gâl lâkle tam tak lâkpiak in, Samaria khua lam a hun paw tung tau hi.

⁹ Himaleh, a lak un Lalpa jawlnei pakhat a um ah, a min chu Oded ahi. Ama chu Samaria khawpi lam ah sepai hungte lamtua dingin a chia ah, a kiang un, “Judai gam ah mite chung ah Lalpa la pu leh pateu Pathian a lungnat ziakin, a hun zaw sak ta hen; himaleh, nang un thangtawm takah la thâgam thawmgit un van a thawng ta ahi.

¹⁰ Tu’hin, nanghaw’n Judai gam mipite leh Jerusalem khua mite hi, a numei a pawsal kidang lo ah suak leh sal in mat la gaw nalai sêt un. Himaleh, Lalpa la Pathian uh chung ah gitlona bawl belap bep la hipuau ah a hem?

¹¹ Tu’hin ka thu hi ngai un, la chung ua Lalpa lungna ahi tâk ziakin, la suapiteu sal ah la hun mat zosiau hi sawl kit tau in,” ti’n a gen a.

¹² Zia bep chule hilo in, Ephraim phung ah luchang deu deu, Johanan chapa Azariah, Meshillemoth chapa Berekiah, Shallum chapa Jehizkiah tawh Hadlai chapa Amasa cheng hi, galdona lam ah kipat hung kile’kitte nialkãl in a hung dingdok un;

¹³ a kiang un zia gual hin a gen tau a: “Sal ah la matteu hi hun puilût kiu in, thil phalo bawl ah I gitlonau belap ding leh Lalpa chung ah I mawnau belap gaw bep la hiu hi. I bawsiatnau a huaisia tawk ma ma ta’n, Israelte chung ah thangtawmna huaisia tak a um ta’ngal in,” a tiu a.

¹⁴ Tichun, sepai hangsante chun a salmat leh a gallâkteu chu milian leh lalte leh mipi kikhawmte kiang ah chun a nusia tau a.

¹⁵ A chung ah mi palite hi a hung kipan un, salmat ah um te chu a pui un, gal lâk haw chun nîk leh puan neilote chu a thuam un; puan a silsak un, kengtawdap busak in nêk leh dawn a piau ah, sathau a nuu’ ah; chuleh, a lak ua a chau diakte chu sabiltung ah chuansak in, a chanauteu kiang lam, tûmthing khawpi, Jeriko ah chun a hun pui tau a. Ziaphatchun, amau chu Samaria khua lam in a chia kit tau hi.

Assuriate’n Judah Mite Panpi Nuam lo

¹⁶ Zia hun ah chun, Lengpa Ahaz in Assuriate panpi’na don in palai a sawlah.

¹⁷ Edomte chun Judai gam hung do kit in, a hungzo tau ah, sal in a pui mang tau hi;

¹⁸ khawpite chu a la buluu ah, Beth-shemesh, Aijalon, Geereth, Soko leh a khawpelteu tawh, Timnah leh a khawpelte tawh, Gimzo leh a khawpelte zosia chu a la la zo tauah; tichun, zia khuate ah hin a la chêng den tau hi.

¹⁹ Judai gam ah Lengpa Ahaz in Judai gam ah mite chu Lalpa chung ah a ginum lo uh khawk a sak lo ziakin, Lalpa chun Judai gam chu a la suniam ta ahi.

²⁰ Tichun, Assuriate Lengpa Tiglath-pileser chu a panpi ding hi malak sâng in, a do dingin a hung kuan ta’n, a tawden ta ahi.

²¹ Assuriate Lengpa kiang ah Sia piak dingin Ahaz chun Lalpa In hi’n, lengpa In hileh, a milian leh lalte In zosia chu a suam ta’n; himaleh, zia haw zosia chule bangma kham ahi nai diak puai.

Ahaz Nungtolna leh Thi’na

²² Zia Lengpa Ahaz ma ma hi, a hung lungdon siat phat inle Lalpa lam in a ginum lo zaw sêm a;

²³ ama a la nuaisia Damaska mite pathian haw kiang in kithoina a bawl ah, ama chun, “Aram lengte pathian haw chun amau a panpi ziakin, keile ei panpi thei khâk leh a kiang in kithoina lân ing ka,” a ti’n. Himaleh, ziate chu ama leh Judah mi zosia â ding ah siatna bep a suak tai.

²⁴ Ahaz chun Pathian In sung ah ûm leh bêl zosia a lakhawm ah, a khen gawp dik dek tai. Lalpa In kotkhak haw le a khâk sik sek ah, Jerusalem khua kiltin ah chun mâichâm a siam tai.

²⁵ A pu leh pateu Pathian, Lalpa lungnatna choktho dingin Judai gam ah khawpi zosia chun, gam dang pathiante kiang ah thillatna dingin thoimualte a siamdok tai.

²⁶ Tu’hin, a thilbawl leh umchan dang haw chu, a masa pen ah kipat a tawp tiang in, Judai gam leh Israel gam ah Lengte Chanchin zikna Lekhabu chun zik lut suak ahi.

²⁷ Ahaz chu a pu leh pate kiang in a ipmu ta’n, Jerusalem khawpi chun a vui tau a; Israel lengte kivuina thân ah chun vang a vui puau hi. A chapa Hezekiah chun a thasâng in vai a hawm tai.