2 KHANGTHU 27 - PATHIAN LEKHABU THIANGTHO (BSI)

Judai Gam ah Jotham Vaihawmna

¹ Jotham chu kum sawmni leh nga a tin in vaihawm in a pang pan a; Jerusalem khua chun kum sawm leh guk sung vai a hawm hi. A nu chu Zadok chanu Jerushah ahi.

² A pa Uzziah gual in Lalpa mittung in thilpha a bawl ah, a pa gual in vang Lalpa tempul sung in a lut puai. Himaleh, a mipite chun vang thil mantheilo tak ah bawl uh chu a chîng zing nalai ui.

³ Lalpa In ah mallam kotpi a siam ah, Ophel kulbâng lam ah chun thil tam tak le a bawl hi.

⁴ Zia bep chule hilo in, Judai tânggamte ah chun khawpite a siamdok ah, gammâng ah chunle kul leh gâlven bukte le a bawl hi.

⁵ Ammon lengpa a do ah, a zo ngâl hi. Ammonte chun zia kum sung ma ma chun dangka talent za khat tawh, gehu bu kor sîng khat tawh, barli bu kor sîng khat a piau hi. A kum ni’na leh a kum thumna tiang in zia gual chun Ammonte chun a pezui nalai ui.

⁶ Lalpa a Pathian ma-âng ah a lampite a suktup ziakin, Jotham chu a hung hat deu deu tai.

⁷ Tu’hin, Jotham nasep thilbawl zosia leh a gâl bawlnate tawh, a um dan zosia natiang in, Israel leh Judai gam ah Lengte Chanchin kizikna Lekhabu chun zik lut ahi.

⁸ Kum sawmni leh nga a ti’n ah vaihawm pan in, Jerusalem khua’n kum sawm leh guk sung vai a hawm hi.

⁹ Jotham chu a pu leh pate kiang in a ipmu ta’n; David khawpi chun a vui tau a; tichun, a chapa Ahaz in a thasâng in vai a hawm tai.