2 KHANGTHU 25 - PATHIAN LEKHABU THIANGTHO (BSI)

Judai Gam ah Amaziah Vaihawmna

¹ Amaziah chun kum sawmni leh nga ahi in vai a hawm pan a, Jerusalem khua chun kum sawmni leh kua sung vai a hawm hi. A nu min chu Jehoaddan ahi’n, Jerusalem khua mi ahi.

² A lunggil zosia’n zui lo maleh, Lalpa mit mu in lam dik a zui hi.

³ A lalna chu a sukdet zaw phatin, lengpa, a pa that ah a la pang a suakte chu a that a.

⁴ Mosi Dan Lekhabu ah, Lalpa thupiak, “Chate gitlona ziakin a pate chu thalup ngai hipua’n tin, nu leh pate gitlona ziakin a chateu le thalup ngai hipua’n au; mi tin chu amau gitlona ziak bep in a thi diu ahi,” ti zik ahi dungzui in, a chateu chu vang a that puai.

Edomte A Thalupna

⁵ Amaziah in Judai gam ah mipite chu a ko khawm ah, Judah phung leh Benjamin phung ah mite chu, a phunggui dungzui un, sang khat pawl, za khat pawl ti’n a khenjak ah, ziate chung ah hotu dingte chu a guat piak chiat a. Kum sawmni ah kipat a chung lamte zosia chu nuai thum a simdok ah; ziate chu gâldo ah pang thei, chei leh phaw mang thei ngen kitêldok a hiu hi.

⁶ Ziate bân ah chun, Israel gam ah mihat minthang le nuai khat zet chu dangka talent za khat in a goi hi.

⁷ Himaleh, Pathian in a kiang ah mi pakhat a hun sawl ah, a kiang in, “Aw lengpa, zia Ephraim suante hi Pathian in kithuapi lo ding ahi ziakin, Israel sepaite hi kizuisak dâ ziang in.

⁸ Nanghaw ngei vakuan unla, vado ziang un; hangsan tak in gâl chu do ziang in; achutiloleh, Pathian in la gâlte âng ah hun mualphosak mai ding ahi; Pathian in a nop leh a hun panpi thei in, a nop leh hun panpi lo ziang thei ahi ngâl ah,” ti’n a vagen a.

⁹ Amaziah in Pathian mi kiangah chun, “Aleh, Israel sepaite goina ding ah dangka talent za khat ka la piaksa chu bang law ding I hitau em leh?” ti’n a dong a. Pathian mi chun, “Lalpa‘n zia sâng ah tam zaw ma ma chu hun pia thei ahi,” ti’n a dawnhu a.

¹⁰ Ziaphatchun, Amaziah inle Ephraim sepai hung kuan zosia chu a khendan ah, a In lam chiat un a chiasak kit tai. Himaleh, Judah namte chung in a lungna ma ma tau ah, hachangthak tak in In lam a zuan kit tau hi.

¹¹ Amaziah chule a hung kihân sak ah, a sepaite chu a puidok ah; Chi Phâijawl lam in a chiau ah, Seir gam ah mite sîng khat a that gam tau hi.

¹² Judai gam ah sepaite chun midang sîng khat ma a hingmat un, ziate chu Sela khawpi kawl lêk in a pui to un, zia Sela kawl lêkah kipat chun a sawn thau ah, a tel a nên in a ke’lum tau hi.

¹³ Himaleh, Amaziah in gâldo ding ah a pui nop lo ziak ah a sawl kit sepaite chun, Judai gam le Samaria ah kipat Beth-horon tiang ah khawpi haw chu a la do malam un; khawpi sung ah mi sang thum a that un, gâl lâk le tam tak a la kipuak mang tau hi.

¹⁴ Edomte that zo ah Amaziah a hung kit phatin, Seir gam ah mite pathian haw chu a hun kipuak ah, a pathian dingin a koihe ah, a ho ah; chuleh, a kiang un kithoina thillatte le a lân tai.

¹⁵ Amaziah chung in Lalpa a lungna ta’n, a kiang in jawlnei pakhat a sawl ah, a kiang in zia gual hin thu a vagen a: “Bang ding ah nam dangte pathian, nangma khut ah bawn amau hukdok thei lo haw po chu ho ah kithêm lungdam mai mai la hiu em?” a vati’n.

¹⁶ Himaleh, zia thu a gen zing lai ah chun lengpa’n zia gual hin a hun dawnhu a: “Nang phiangsan hi lengpa lemguat piak ding ah kuan a hun guat ua a hem? Thip hiat hiat mai in! Bang ding ah hun that mai ding ka hi em?” a ti’n. Ziaphatchun, jawlnei chule a thip ah; chomkhat zaw in, “Zia gual ah ka hun thuhilna la ngaisak lo ah, zia tawhbang la bawl ziak hin, Pathian in hun susia ding ahi ti ka hia’i,” ti’n a hun gen a.

Israelte’n Judai Gam A Nuaisianau

¹⁷ Ziaphatchun, Judai gam ah Lengpa amaziah chun a mipilte a dong ah; tichun, Israelte Lengpa Jehu chapa, Jehoahaz chapa Joash kiang in mi a sawl un, a kiang ah chun, “Hung inla, kido hitiu,” a vatiu a.

¹⁸ Israelte Lengpa Joash chun Judai gam ah Lengpa Amaziah kiang in zia gual hin a thuthâk a: “Lebanon tâng ah lingbuk pakhat in Lebanon tâng ah sidar thingkung kiang in, ‘La chanu kha ka chapa ji dingin ei pia’n,’ a ti hen; himaleh, Lebanon tâng ah gamsa pakhat a hung pawtdok ah, lingbuk chu a chuan pêk ta mai in.

¹⁹ Nang in kiletsak tak in, ‘Ngai in, Edom chu ka nuaisia tai,’ la ti hen. Tu’hin vang In ah kium hiat hiat mai ta’n aw; bang ding ah nangma leh Judah mipi zosia pukkhawmna ding bep ah kichok chok ding la hem?” ti’n a vagen sak tai.

²⁰ Himaleh, Amaziah chun a la ngaisak nuam puai. Edom mite pathian a dot ziak ah amau chu a mêlmateu khut ua piakdaw ding chu, Pathian dawi dan ahi tâk ziakin.

²¹ Tichun, Israelte Lengpa Joash chu a kuandok ah, Judai gam ah Lengpa Amaziah chu tawh, Judai gam ah Beth-shemesh mun ah chun a kido tau hi.

²² Judai gam mite chu Israelte’n a zo tau ah; a leng un In lam in a jamsia tau hi.

²³ Israelte Lengpa Joash chun Judai gam ah Lengpa Amaziah chu a man ta’n; ama chu Ahaziah chapa, Joash chapa ahi; Jerusalem khua lam in a hun pui ah, Jerusalem khawpi kulpi chu Ephraim kotpi kipat A Ning Kotpi tiang, tong za li hial chu a khênchim tau a.

²⁴ Pathian In sung ah sana leh dangka zosia tawh, ûm leh bêl zosia chu tawh Obed-edom pum in a kipuak mang tau a. Lengpa In ah a go khol khawm zosia tawh sal ah mat dingin a pui mang tau hi; tichun, Samaria gam lam in a kile’kit tau hi.

Amaziah Thi’na

²⁵ Judai gam ah Joash chapa leng Amaziah chu Israelte Lengpa Jehoahaz chapa Joash thi’nung in kum sawm leh nga a dam nalai a.

²⁶ Tu’hin, Amaziah thilbawl dang dang haw le, a masa pen ah kipat a nunung pen tiang in, Judai gam leh Israel gam ah Lengte Chanchin kizikna Lekhabu chun kimchang tak ah ziklut hinalo a hem?

²⁷ Amaziah in Lalpa a kiheisan ah kipat in Jerusalem khua chun ama a gûk ah thalup gaw pawl a hung um tau a; tichun, Lakhish lam in a jam mang tai. Himaleh, Lakhish lam ah ama delzui ding a kisawl un, zia tak ah chun a vathat tau hi.

²⁸ A luang chu sakol in a hun puau ah, a pu leh pateu kiang ah David khawpi chun a vui tau hi.