2 KHANGTHU 23 - PATHIAN LEKHABU THIANGTHO (BSI)

Athaliah Chung ah Kiphin Guatna

¹ A kum sagi’na chun Jehoiada thangtawm in sepai hotu lian pangate tawh kihotuak in, thuthung a siam tau a; zia sepai hotu liante chu: Jehoram chapa Azariah, Jehohaman chapa Ishmael, Obed chapa Azariah, Adaiah chapa Maaseiah leh Zikhri chapa Elishaphat a hiu.

² Judai gam pumpi chuan suak in, Judai gam ah khawpi zosia ah kipat, Levi Inkuante leh Israel Inkuan ah puitute chu a leng un Jerusalem khua’n a hun pui khawm a.

³ Mipi hung khawmte chun Pathian In sung ah chun Lengpa tawh thuthung a siam tau a. Jehoiada chun a kiang un: “Zia hin lengpa chapa a um hi! David suan ah mite chun vai a hawm diu ahi, ti Lalpa‘n thutiam a la bawl dungzui in, ama hi vaihawmsak hitiu.

⁴ Zia gual hin la bawl diu ahi: Sabbath ni’ nasêm ding ah thiampute leh Levite lak ah se’thum sua a se’khatte chu kotkhak vêng in pang un la,

⁵ a se’khat dangte chu lengpa In ngak in pang unla, a se’khatte chu kul kotkhak ngak in pang un; mipi dang zosia chu Lalpa In huang sung ah lut uh hen;

⁶ Lalpa In sung ah nasêm ah pang sek thiampute leh Levite tilo ngâl, kuama dang lutsak kiu in; thiampute leh Levite hi vang a thiangthosa a hiziak un lut thei intin uh, midang zosia hin vang pawlam ah Lalpa thupiak chu a zui diu ahi.

⁷ Levite chun a khut ua gâlvan chawi chiat in lengpa chu ûm kîmvêl in tiu in; In sung ah lut taphot chu thalup ngâl hi’n au. Lengpa chu a chiana lam lam ah la zui ziang diu ahi,” ti’n a gen a.

Joash Leng ah Tundawna

⁸ Levite leh Judah mipi zosia chun thiampu Jehoiada thupiak dungzui in a bawl chiat tau a; tichun, sabbath ni’ nasêm dingte tawh a kichawl dam dingte chu a leng un amau pawl chiat ah hotute chun a hun pui khawm tau ah; thiampu Jehoiada chun a pêl dingte chule a la pêlsak diak puau hi.

⁹ Thiampu Jehoiada chun Lengpa David gâlvan cheicha leh phawlian leh a neu, Pathian Insung ah kikoikhawm haw chu sepai hotu liante kiang in a hun pedok a;

¹⁰ mipite zosia chu lengpa vêng bit dingin, a khut ua gâlvan choisak chiat in, In mai lam ah kipat a tomlam tiang in, mâichâm leh In chu a ûm kîmvêlsak ta’n.

¹¹ Ziaphatchun, lengpa chapa chu a hun puidok ah, lallukhuk a khuk sak ah, thuthung chu a hun pia tai; Leng hiding in a puang tau ah, Jehoiada leh a chate chun sathau a nu’ tau a; tichun, “Lengpa Damsawt hen!” ti’n a kiko chiat tau hi.

Athaliah Thi’na

¹² Athaliah in mipi tai lumlet leh lengpa choihoina husa a het phat in, Lalpa In sung ah mipite kiang in a vachia a;

¹³ a et leh, kotkhak bul, sûtpi bul ah sepai hotu liante leh pengkul mutte lak ah lengpa ding chu a mu ta’n; chuleh, a gam sung ah mipi zosia kipak tak ah pengkul mutte leh La sate’n lengpa lawm ah thil gihawi chitin tawh kithuate chu a mu tai. Athaliah in a puan a botthêk ah, “Kidawha bawlna! Kidawha bawlna!” ti’n a kiko a.

¹⁴ Ziaphatchun, thiampu Jehoiada chun sepaite chung ah thunei sepai hotute chu a hun puidok ah, a kiang un, “Sepaite lak ah kipat in hun puidok unla, ama zui taphot chule chemjam ah satlup ding a hiu,” ti’n a hun gen a. Chuleh, thiampu (Jehoiada) chun: “Lalpa In sung ah hin vang that kiu in,” ti a la gensa ahi.

¹⁵ Tichun, a man tau ah, Sakol Kotpi lam ah kipat lengpa In zotna lam in a pui un, zia tak ah chun a that tau hi.

¹⁶ Jehoiada chun mipite tawh lengpa chu a leng ua Lalpa mipite hi chiat dingin thuthung a siam tai.

¹⁷ Ziaphatchun, mipite chu Baal biakna In ah chia in a vasuchim tau ah; a mâichâmte leh a milimte chu a khenbuang dim dem un, Baal mâichâm ah nasêm, a thiampuu Mattan chule mâichâm ma-âng ah chun a that tau hi.

¹⁸ Jehoiada chun Mosi Dan lekhabu kizik dungzui in, lim takah La sa kawm ah David in Lalpa In ah Lalpa kiang ah hâlmang thilpiak lân ding ah a la guatsa, Levi thiampute mapuina sêm dingin, David in thu a la piak gual ah Lalpa In veng dingte chule a guat tai.

¹⁹ Lalpa In sung ah mi thiang lo kuama a lutlona ding ua vêng dingin, kotkhak bul tin ah chun a vêng dingte chu a koi tai.

²⁰ Chuleh, sepai hotu liante, a mi liante leh mipite chung ah vaihawmte chu tawh, a gam sung ah mipi zosia chu kitonsak in, Lalpa In ah lengpa chu puidok in, lengpa Inpi tiang in kotkhak chungnung ah kipat chun a puidok tau a. Lengpa chu lalchutpha’n a kichutsak tau hi.

²¹ Tichun, chemjam ah Athaliah a satlup ua kipat in, a gam sung ah mipi zosia chu a kipak ma mau ah, khawpi sung chule gâl muang tak in a um tai.