2 KHANGTHU 22 - PATHIAN LEKHABU THIANGTHO (BSI)

Ahaziah Vaihawmna

¹ Jerusalem khua chêngte chun a neupen Ahaziah chu a go a luasak tau ah; a chapa lianzaw te zosia chu Arabte tawh pang khawm sepai honte chun a la that gam tau a. Tichun Jehoram chapa Ahaziah chun Judai gam ah leng ah pang in vai a hawm tai.

² Ahaziah chu a lal kum in kum sawmli leh ni mi ahi; Jerusalem khua’n kum khat vai a hawm hi. A nu min chu Athaliah ahi’n, ama chu Omri tunu ahi.

³ A nu chu nunsiat dan nunmu pen ah pang ahiziak in, ama’nle Ahabte Inkuan dung chu a sûn hi.

⁴ Ahab Inkuante bawl dungzui in Lalpa mit mu ah thil phalo ngen a bawl ah; a pa thi’nung in Ahab Inkuante chu siatna ding lampi kawkmute ngen in a pang tau hi.

⁵ A thuhilnau chu a mat ziakin, Ramoth-gilead ah Aram khua’ Lengpa Hazael vado, Israelte Lengpa Ahab chapa Jehoram chule a vapanpi hial a. Aram mite chun Jehoram chu a hun kâpliam tau a;

⁶ Aramte Lengpa Hazael a vado’na Ramah khua a valiamna sukdamna ding ngaitua in, Jezreel khua’n a kile’kit a. Chuleh, Ahab chapa Jehoram damlo entha dingin Judai gam ah Lengpa Jehoram chapa Ahaziah chu Jezreel khua’n a chia suk tai.

⁷ Himaleh, Jehoram entha a chia phat leh, Ahaziah in siatna a tuak ding chu Pathian in a la guanggal sa ahi. Zia mun chu a tun phatin, Jehoram tawh kiton in Nimshi chapa Jehu mu dingin a chiauah, Jehu chu Ahab Inkuante sumangthai dingah Lalpa‘n a la guatsa chu ahi’n.

⁸ Ahabte Inkuan chung thu ah siatna tung ding haw Jehu in a la ngaitua kâl in, Judai gam ah vaihawm pawl lawi khat tawh Ahaziah nasem ah pang, Ahaziah suapipa chate chu a la that tai.

⁹ Ahaziah chule a hawl ah, ama chu Samaria khua kisêl lai chu a matdaw phat un, Jehu kiang in a hun pui un, a that tai. A vui un, “Ama hi a lungthim zosia ah Lalpa hawl sek Jehoshaphat tupa ahi,” a tiu a. Tichun, Ahaziah Inkuan chu lenggam ah vaihawm ding pakhatle a um ta puau hi.

Athaliah in Lalchutpha A Luana

¹⁰ Ahaziah nu Athaliah in a chapa chu a thi tai ti a het phat in, Judah Inkuan ah lengpa In sung mi zosia that gam dingin a kipan tai.

¹¹ Himaleh, lengpa chanu Jehoshabeath chun Ahaziah chapa Joash chu, lengpa thalup ah um ding haw lak ah kipat in a la gudok ah; zia nausen chu a donnu tawh lupna pindan in a la sêlgu ta’n. Tichun, Lengpa Jehoram chanu, thiampu Jehoiada ji Jehoshabeath chu Ahaziah suapinu a hiziak in, Athaliah in a thalup lo dingin a la sêlgu ta’n;

¹² chuleh, Athaliah vaihawmna kum guk sung chu Pathian In sungah a kiang un a kisêl den tai.