2 KHANGTHU 21 - PATHIAN LEKHABU THIANGTHO (BSI)

Jehoram Vaihawmna

¹ Jehoshaphat chu a pu leh pate kiang ah chawldam dingah a chia phatin, David khawpi chun a pu leh pate kiang in a vui tau hi; a chapa Jehoram in a go a lua tai.

² Jehoshaphat chapa, a suapite chu: Azariah, Jehiel, Zekhariah, Azariah, Mikael leh Shephatiah a hiuah, a leng un Judai gam ah Lengpa Jehoshaphat chate ngen a hiu hi.

³ A pau chun a chate kiang in go tam tak a hawm ah; dangkate, sana leh go thil tam tak tawh Judai gam ah kulpi nei khawpite chule a chan sak chiat ah; a lenggam vaihawmna chu vang Jehoram khut in a koi hi; ama chu a chapa upa pen ahiziak in.

⁴ Jehoram in a pa lalchutpha a hun lua ah, a hung det do phat ah chun a suapi pawsalte chu a leng un chemjam in a satlum sik sek ah; Israel milian khenkhat le a that khawm tai.

⁵ Jehoram in vai a hawm lim ah chun kum sawmthum leh ni mi bep a hi’n; Jerusalem khua chun kum giat bep vai a hawm hi.

⁶ A ji chu Ahab chanu ahiziak in, Ahab Inkuan dung a sûn ah, Israelte lengte haw sulnung a zui hi. Tichun, Lalpa mit mu ah thil phalo lam ngen a bawl tai.

⁷ Himaleh, David kiangah thuthung a siam ziak leh, ama leh a suante tiang ah vaihawm ah pang zing ding a la tiam tâk ziakin, Lalpa‘n David Inkuan chu a sumangthai ziang nuam tadi puai.

Edomte Kiphinna

⁸ Jehoram leng ah a pan sung in, Judai gam ah vai hawm khum nuam lo in, Edom mite a hung kiphin tau ah; tichun, amau â ding leng a chuam a kisiam tau hi.

⁹ Ziaphatchun, Jehoram inle a sepai hotute tawh a kângtalai sepai zosia pui ah do dingin a kipan tauah. Ama leh a kângtalai sepaite zosia a la ûm kîmvêl suak ta Edomte chu jan kâl in a hun do pan tau a.

¹⁰ Ziaziakchun, Judah mite’n a chung ua vai a hawm uh a lungawi lo ziak un, Edomte chu tu’ni tiang hin a kiphin den tau hi. A pu leh pate Pathian, Lalpa chu a kiheisan tâk ziak un, zia hun ah chun Libnah khua mite chun a lalna paithâk gua’n a hung kiphin tau hi.

Elijah Lekhathot

¹¹ Zia bep chule hilo in, Judai tânggam ah chun thoimualte a siam ah, Jerusalem khua chêngte chu thanghuai tak in a pui chavai ah; tichun, Judai gam ah mipite chu a pui mang tai.

¹² Jawlnei Elijah ah kipat in lekhathot a hung tung ah, zia gual hin a kizik a: “La pu David Pathian, Lalpa chun zia gual hin a gen hi: La pa Jehoshaphat dung la sûn pua’n, Judai gam ah Lengpa Asa dungle sûn diak lo in,

¹³ Israel gam ah lengte dung sûn zaw’n, Ahab in Israel mipite siatna lam zuan ah a pui mang gual in, nang inle Judah mipite leh Jerusalem khua mite la pui mang ziak leh, nangma sâng ah phazaw ngen la suapite, la pa suan leh pâkte ngen la thâ gam tâk ziakin,

¹⁴ ngai in, Lalpa chun la mipite, la chate, la jite leh la ganchate leh la nei la lam zosia hîpi’n hun gawt intin;

¹⁵ nang inle gilnatna huaisia tak hun nei in la tin, zia natna ziakah chun nisi’n in la gil chu a them a them ah a pawt bei tiang in, tui ah luangkang ding la hi, a tii,” ti’n a zik hi.

¹⁶ Ethiopiate kiangah um, Philistin leh Arabte chu Jehoram do ding in Lalpa‘n a hun choktho ta’n.

¹⁷ Judai gam do in a hung kuan tau a; tichun, lengpa nei thil zosia, a chapate leh a jite zosia, a chapa naupang pen Jehoahaz tilo sia chu a pawmang tau hi.

Jehoram Damlona leh Thi’na

¹⁸ Ziazaw chun, Lalpa‘n sukdam kit theilo gil natna’n a hun gawt tai.

¹⁹ Kum ni zaw in a natna a khawksia deu deu ah, a thok zaw lo phatin a thi tai. A mipite chun a pateu sûnna meipi a sêm gual un mei a sêm ta puau hi.

²⁰ A vaihawm lim ah khan kum sawmthum leh ni mi ahi’n; Jerusalem khua’n kum giat sung vai a hawm hi. Ama ngaina khat chale umlo in a thi tai. David khawpi chun a vui sam un, lengte thân vang a chang zo puai.