2 KHANGTHU 20 - PATHIAN LEKHABU THIANGTHO (BSI)

Sualam ah Kipat Mêlmate

¹ Zia nung ah chun Moabte, Ammonte leh Meunte lakah khenkhat chu Jehoshaphat do dingin a hung kuan tau a.

² Thangkote chun zia thu chu Jehoshaphat a hung hil un: “Edom gam ah tuisuagiat gâl lam ah kipat mi tam tak nangma do dingin a hungkhawm un; tu’hin Hazazor-tamar mun a hung tung tau hi,” a hung tiu a.

³ Jehoshaphat chu a lau ma ma ziang ta’n; Lalpa a hun hawl phatin Judai gam pumpi anngawl ah pauchap ding thu a hun puang tai.

⁴ Judah mipite chu Lalpa lung lam hawl in a hung khawm tau ah; Judai gam ah khawpi zosia kipat in Lalpa lung lam hawl dingin a hung khawm tau hi.

Jehoshaphat Pauchapna leh Gâl Zaw’na

⁵ Jehoshaphat chu Jerusalem khua’ Lalpa In ah vaihawmna pindan thak ah chun, Judah mipite zosia mai ah chun a hung dingdokah;

⁶ zia gual hin a hun genah: “Aw Lalpa, ka pu leh pateu Pathian, van ah Pathian hilo la hem? Khawvel ah nam tinte lenggam zosia chung ah vaihawm hilo la hem? Nangma khut ah thilhitheina leh hatna zo ding kuama a um puau hi.

⁷ Aw ka Pathian uh, nang in zia gam ah a la chêngsate chu la mipi Israelte ma-âng ah nawdaw piak in, la gualpa Abraham suan leh pakte’n kumkhua a lua ding ua la piak hilo a hem?

⁸ A sung ah chêng in, la min in mun thiangtho le a sung in a sa zo tau in, amau in,

⁹ ‘Siatna ka chung ua hung tung ah, chemjam a hem, gawtna a hem, natpi a hem leh kialpi a hem a hung um phat leh, zia In ah hin la ma-âng ah hung ding ing ka tiu in, zia In ah hin la min a um ngâl a; lungdong ah ka hun ko phat ua leh ei la ngaitha’n la ei hukdok in,’ a tiu in.

¹⁰ Tu’hin en in, Aigupta gam ah kipat Israel chate a hung pawt daw lai un a do ua, a sukchimit ding uh la la phal lo–Ammonte, Moabte leh Seir tâng ah chêngte hi,

¹¹ ka lua ding ua lei piakna gam ah kipat ei nawdok dingin a hung kuan tau hilam.

¹² Aw, ka Pathian uh, amau chung ah hin vai hun hawm lo ding la hem? Ei hung do mipi tam tak haw hi ka dozaw theina ding un hatna bangma ka nei puau hi. Bang pen bawl ding a hem ti le ka hepuau in, nang bep ka hun etthâk mai uh la hi tai,” ti’n a pauchap a.

¹³ Zia hun sung ah chun Judai gam ah mipi zosia chu a chateu, a jiteu leh a tuteu tawh Lalpa ma ah chun a ding chil chel ziang tau a.

¹⁴ Zia lai tak ah chun mipi kikhawmte lak ah mi pakhat, Asaph suan ah Levi mi, Mattania chapa, Jeiel chapa, Benaiah chapa, Zekhariah chapa Jahaziel chung in Lalpa thagau a hung chu ta maiah.

¹⁵ Ama chun, “Ngai un, aw Judai gam ah mite leh Jerusalem khua chêngte leh Lengpa Jehoshaphat: Lalpa‘n zia gual hin la kiang un thu a hun gen ta ahi: Zia mipi tam takte hi lau kiu inla, lungdong diak kiu in; kidona hi nanghaw â a hipua’n, Pathian â a hizaw ngâl a.

¹⁶ Jing leh amau do dingin kipan un; amau le Ziz kaltona lam in hung kuan ding a hiu; Jeruel gamthip phâkma, phâicham tawp lam ah kisitua ding la hiu.

¹⁷ Aw, Judai gam leh Jerusalem khua mite haw, zia kidona hin nanghaw la pan uh ngai pua’n ah; la panmun chiat un ding chil chel un la, nanghaw â ding ah Lalpa‘n a hun zaw piak dan chu en mai un! Lau kiu in la, lungdong ziang kiu in; jing leh gâldo dingin kuandok un la, Lalpa‘n hun kithuapi ding ahi,” ti’n a gen a.

¹⁸ Ziaphatchun, Lalpa chu ho in Jehoshaphat in lei tual si hial in a bokkhup ah; tichun, Judah mipi zosia leh Jerusalem khua chêngte zosia chule Lalpa âng in a bokkhup chiat tau hi.

¹⁹ Chuleh, Levi suan lak ah Kohath leh Korah chate chu Israelte Pathian chawihoi ah aw a ngai thei pen sua in a hung dingdok chiat tau a.

²⁰ A jing ah chun ma tak ah tho in Tekoa gamthip lam in a chiauah; a kipatdaw ding phat un Jehoshaphat chu hung dingdok in, zia gual hin a hun gen a: “Aw Judah mipite leh Jerusalem khua chêngte haw, ka thugen hi ngai tiam un! Lalpa la Pathian uh chu ging un; chutileh, phudet in um bep ding la hiu; a jawlneite hile gingcha tau in,” ti’n a gen a.

²¹ Mipite kiang ah thu a gen zaw phatin, nibîk poimaw ah a kithuamna ding uh a siampiakte chu kithuam ah, Lalpa pâkna La sa ding ah a la guatdawsate chu hung kipan in; “Aw, Lalpa kiang ah kipak thu gen un, a ngilneina chun kumtuang a dai ngâlah,” ti’n sepaite âng ah chun a chiau a.

²² Lalpa chawihoi ah La a hun sak phat un, Judai gam do ding ah hung kuan Ammonte, Moabte leh Seir tânggam ah mite chu a la lamchân dingin Lalpa‘n mi a la guat ah; ziate chun a gâlteu chu a that gam tau hi.

²³ Ammonte leh Moabte chun Seir Tânggam ah chêngte chu a thâgam masiau a do tau ah; chuleh, Seir-te a thâgam zaw phat un, amau leh amau a kithat tua sau sau ziang tau hi.

²⁴ Judai gam ah mite chu gamthip ah gâlvên buksâng a hung tun phat un, mipite umna lam chu a vak thîl ua leh, pakhat chale suakcha lo ah mithiluang kizam tek tuk haw chu a mu tau hi.

²⁵ Jehoshaphat tawh a mipite chu gâllâk thil chom khawm dingah a hung phat un, gancha hon tam tak tawh, van, nîk leh puan leh suangmantamte chu a puakkhop chiat un a kilâk tau a. Gâllâk thil a tam bêk ziakin, a chomkhawmna’n le ni thum sung a lut hi.

²⁶ A ni li tin ni chun Berakah Phâijawl in a kikhawm un, Lalpa a chawihoi tau a; ziaziakchun, tu’ni tiang hin zia mun chu Berakah Phâijawl, a ti den tau hi.

²⁷ Lalpa‘n a gâlteu a zaw piak tâk ziak ah kipak ma ma in, Judah mipite leh Jerusalem khua mipite chu, Jehoshaphat tawh Jerusalem khaw lam zuan in a hung kit tau hi.

²⁸ A tingtangteu leh a guipekteu chi chuam chuam tawh, a pengkulteu tawh Jerusalem khua’ Lalpa In chu a hung tung tau a.

²⁹ Israelte mêlmate zosia Lalpa‘n do piak ahi ti a het ziak un, a kîmvêl ua lenggam zosiate chun Pathian launa a hun nei chiat tau hi.

³⁰ Pathian in a kîmvêl ua gam zosia’ kipat gâlmuanna a piak tâk ziakin, Jehoshaphat gam sung chu thamuang tak in a um tai.

Jehoshaphat Vaihawm Tawpna

³¹ Zia gual ah chun Jehoshaphat in Judai gam ah chun vai a hawm a. Kum sawmthum leh nga a tin in vai a hawm pan ah; Jerusalem khua’n kum sawmni leh nga vai a hawm hi. A nu chu Shilhi chanu Azuba ahi.

³² Ama’n a pa Asa nunchan chu pêtsan lo in a zui zing ah, Lalpa mit mu ah diklo him him a bawl puai.

³³ Ahi’n la, thoimualte chu vang a subei thiang nai puai; chuleh, a mipite chunle a pu leh pateu Pathian lam chu a nga sik sek diak puau hi.

³⁴ Tu’hin, Jehoshaphat sepdaw leh bawldaw dang dangte chu, a masa pen ah kipat a tawp tiang in, Israel Lengte Chanchin kizikna Lekhabu, Hanani chapa Jehu khangthu zikna lekhabu chun a kizik lut sik sek hi.

³⁵ Zia nung ah chun Judai gam ah Lengpa Jehoshaphat hin, mi nunsia tak Israelte Lengpa Ahazia chu a la kikhut zoppi kha ta mai hi.

³⁶ Tarshish lam ah chia ding Long a siam khawm un; Ezion-geber ah chun long a siam khawm tau hi.

³⁷ Ziaphatchun, Maresha khua Dodavalu chapa Eliezer chun Jehoshaphat chung ah thil hung tung ding haw chu zia gual hin a gen tai: “Ahazia tawh la kithua ziak un, Lalpa‘n la thilbawlteu chu hun susia ding ahi,” a ti tai. Tichun, a long siamdawteu chu a sia sik sek ah, Tarshish lam in a chia thei ta puai.