2 KHANGTHU 2 - PATHIAN LEKHABU THIANGTHO (BSI)

Tempul Sa Ding ah Solomon Kiguanggalna

¹ Solomon in Lalpa min ah Tempul pakhat leh, ama chênna ding leng In pakhat sa dingin thupukna a siam tai.

² Solomon in nasêm ding mi sîngsagi leh suangsêk thiam mi sîng giat chu, a enkol ding ah hotu sang thum leh za guk chu tawh thingtâng gam in a gawi tai.

³ Solomon in Tura gam ah Lengpa Huram kiang ah mi sawl in, “Ka pa David in a chênna ding In a sakna dingin sidar thing la hun pia ta hen.

⁴ Tu’hin Lalpa ka Pathian min in In sakdaw ka gua’n; zia chu Lalpa ka Pathian un Israelte’n kumkhua ka mat ding ua ei la guat piak, a kiang ah gimtui hâl ah, vaithum a tian ah lat zingna ding, jing leh nitâk si’n ah hâlmang thillat bawlna ding, sabbath ni si’n, tha thak ni si’n leh Kût nite haw ah, a kiangah ka lattheina ding uh ahi.

⁵ Ka Pathian uh hi pathian dang zosia sâng ah chungnung zaw ahi gual ma in, a In ding ah ka sak ding chule thupi tak hi ding ahi.

⁶ Himaleh, ama chu van leh van sâng pen inle a dawl lo ahiziak in, a chênna In ding chu kua’n sathei ding a hem? Ama chêntheina ding In chu kei tawhbang bep hin sathei laizang pua’ng ka tin, a kiangah kithoinate latna ding mun bep a hilo ngâl leh?

⁷ Ziaziakchun, tu’hin Judai gam leh Jerusalem khua ka pa David in mi khutthiam a la neisate kithuapi a: Sana, dangka thik, sum-eng, thik leh puan sandup leh a dum leh a zia chuam chuam leh thil khuak thiamte ei hun sawl piak inla;

⁸ Lebanon ah sidar thingte, châk thingte leh algam thingte haw le ei hun thot lechin ka ti ahi; la nasêmte kha Lebanon ah thingte ât dan a thiam ui ti ka la hetsa ahi.

⁹ Ka nasêmte leh nang nasêmte chu kithua in, thing tam tak ei bawl piak leu ka ti ahi; ka In sak guat hi thupi tak leh lamdang tak hiding ahi ngâl a.

¹⁰ Thingtan ah pang la nasêmte kiang ah chun gehu bu hekbuansa te’na kor sîng ni tawh, barli bu tê’na kor sîng ni tawh, uain thawl bath sîng ni tawh, sathau thawl bath sîng ni le pia’ng ka,” ti in.

¹¹ Ziaphatchun, Tura Lengpa Huram chun Solomon kiang in lekha a thot a: “Lalpa‘n a mipite a lungsiat ziakin a chung ua leng ah pang dingin nang chu a hun guat ahi,” a tia.

¹² Huram chun zia gual hinle a gen nalai a: Israelte Lalpa Pathian, lei leh van siampa leh Lengpa David kiang ah chapa pil tak leh hiatthiamna leh chitna leh hetna pia, Lalpa â ding ah Tempul leh ama â ding leng In sak ding pepa chu chawihoi in um hen.

¹³ Mi khutthiam leh hiatthiamna nei Huramabi hi ka hun sawl ngâl hi;

¹⁴ a pa chu Tura mi himaleh, a nu chu Dan suan ah numei pakhat chapa ahi. Ama hi sana, dangka thik, sum-eng, thik, suang leh thing leh puan sandup leh a dum leh puan malngat bawl dan kizil thiam tak ahi’n; chuleh, I dawi dan dan ah khuak thei leh chi chuam chuam bawl thiam ahi; ama tawh ka hotupa, la pa David mi khutthiamte chu tawh kithua ding in ka hun sawl hi.

¹⁵ Ka hotupa’n gehu bu, barli, sathau leh uain piak ding la tite kha, la nasêm mi dangte kiang in a la pia ziang inla;

¹⁶ Lebanon ah thing la dawi zosia chu hun sat piak ing ka tiu in; Joppa khua tiang in hun tawl suk piak ing ka tiu in, Jerusalem lam in a la kipuakdaw maileu chin, ti in.

¹⁷ Ziaphatchun, Solomon in Israelte gam sung ah nam dang um jat chu, a pa David in a la sim zaw nung in a hun sim pan kit ah; a lak ua gam dang mi chêng zosia chu nuai khat sîng nga sang thum leh za guk a hiu hi.

¹⁸ A lak ua sîng sagite chu nasêm vantang ding, sîng giatte chu tânggam ah suang sek ding; chuleh, sang thum leh za gukte chu nasêmte enkol dingin a guat tai.