2 KHANGTHU 19 - PATHIAN LEKHABU THIANGTHO (BSI)

¹ Judai gam ah Lengpa Jehoshaphat chu bit tak in Jerusalem khua a In lam a hung tung kit tai.

² Hanani chapa Jehu, thiamgau chu ama mu dingin a chia ah, Lengpa Jehoshaphat kiangah chun, “Mi nunsiapa panpi in, Lalpa mu nuamlote chu ngaina zing nalai ding la hem? Zia gual ah la um ziak ah chun, la chung ah Lalpa hachang thak ding ahi.

³ Zia gual chu hitamaleh, gam sung ah dawikhuamte la suksiat ziak leh, la lunggil tak ah Pathian lam la ngat ziakin, nangma ah chun phatna khat a um tho tho hi,” ti’n a gen a.

Jehoshaphat in gam sung A Siamphatna

⁴ Jehoshaphat chu Jerusalem khua’n a chêng ah; Beer-sheba khua kipat Ephraim tânggam tiang in a mipite lak in gam a fang ah, a mipite chu a pu leh pateu Pathian, Lalpa kiang lam in a hun pui khawm kit a.

⁵ Judai gam ah khawpi kul nei zosia ah vaihawm dingte a guat chiat ah; amau chun a umnau khawpi chiat ah maw a puau a;

⁶ zia vaihawm ding ah a guatte kiangah chun, “La mawpuaknau hi ngaitua phau in, mihing thasâng ah vaihawm hilo in, Lalpa thasâng ah vaihawm ah pang la hiu ti ngaitua zing unla; ama chun la vaihawmnau ah hun umpi zing ahi.

⁷ Tu’hin, Lalpa chu lau zing un; Lalpa I Pathian un doichuam a nei pua’n, golgûkna le la lo ahi ziakin, dik tak in thu tan sek unla, la mawpuaknau hi ngaikhawk ma mau in,” ti’n a hil a.

⁸ Zia bep chule hilo in, Jehoshaphat chun Jerusalem khua chunle, Lalpa â ding leh thubuai ngaitua dingin, Levite lak ah khenkhat leh thiampute tawh, Israel Inkuan tin ah hotute chule a guat ah. Amau chun Jerusalem ah umna mun a nei chiat ui.

⁹ Zia gual hin amau chu thu a pia’n: “Zia gual ah hin la bawl diu ahi: Lalpa lau kawm zing in, ginum tak leh la lungthim zosiau in sêm unla;

¹⁰ la chanaute kua a hem khat a khawpiu ah kipat thubuai thisan sua’na a hem, dan leh thupiak lam thu a hem, thu guat leh dan thuthung lam thu ahi chun, Lalpa chung ah thil diklo tak ah a bawl lona ding leh, amau leh a chanauteu chung ah hachang thakna a hung tun lona ding in hil sek un. Zia gual ah chun bawl leu chin, bawlkhial ah ngaw ah umlo ding la hiu.

¹¹ Ngai un, thiampu lal Amariah chu Lalpa lam thu ah la hotu ding un a um hi; chuleh, lengpa thusuak lam zosia ah Judai gam-ukpa dingin Ishmael chapa Zebadiah a um hi; chuleh, Levite chule la hotu ding un a um ui. Hangsan tak in ngaituau inla, mi phate kiang in Lalpa chu um zing ta hen!” ti’n a gen a.