2 KHANGTHU 18 - PATHIAN LEKHABU THIANGTHO (BSI)

Mikaiah in Lawsapna Ding A Genlawk

¹ Tu’hin, Jehoshaphat chu nasa tak ah hausa leh ja’um in a hung um ta’n; tichun, Ahab tawh kichenpol ding thuthung a hun siam tau hi.

² Kum bang a hem jat zaw in Samaria gam ah Ahab kiang in a hang chia suk a. Jehoshaphat tawh a lawite nêkkhawmpi dingin Ahab in belam leh bawngchal tam tak that in ankuang a siamah; chuleh, Ramoth-gilead vadopi dingin Ahab in a chial a.

³ Israelte Lengpa Ahab in Judai gam ah Lengpa Jehoshaphat kiang ah chun, “Ramoth-gilead lei hung do pi diam?” ti’n a chialah. Ama chunle, “Kei leh nang, ka mite leh la mite chu pumkhat I hiu hilam. Gâl chu do khawm ding I hi puau em!” ti’n a dawnhu a.

⁴ Himaleh, Jehoshaphat chun Israelte Lengpa kiangah chun, “Lalpa‘n bang a ti ngai em dong phot le hin la maw,” ti’n a gen a.

⁵ Tichun, Israelte Lengpa chun jawlneite chu a ko khawm ah, mi za li a hung khawm tau ah; a kiang un, “Ramoth-gilead do ah vakuan to ding I hiu em, kuan lo ding?” ti’n a dong a. Amau chunle, “Kuan to in, lengpa khut ah Pathian in hun pia ding ahi ngâl a,” ti’n a dawnhu tau a.

⁶ Himaleh, Jehoshaphat in, “Aleh, ziate tilo hi Lalpa jawlnei dang dot thei um talo a hiu em,” ti’n a dong a.

⁷ Israelte Lengpa chun Jehoshaphat kiang in, “Lalpa thu dot thei ding jawlnei dang pakhat a um nalai hi, ama chu Imlah chapa Mikaiah a hi. Ahi’n, ama hin ka chung ah thil phalo tung ding lam bep a gen sek in, ka lung lam mawng mawng a gen nop lo ziakin, ama chu ka mu nuam puai,” ti’n a dawnhu a. Jehoshaphat in, “Lengpa, zia gual chun gen kin,” ti’n a dawnhu a.

⁸ Ziaphatchun, Israelte lengpa chun sepai hotu pakhat a ko ah, a kiang in, “Chia inla, Imlah chapa Mikaiah kha kin tak in vapui in,” a tia.

⁹ Zia lai tak ah chun Israelte lengpa tawh Judai gam ah Lengpa Jehoshaphat chu a leng puan ua kithuam in, lalchutpha’n a kichu gêl un; Samaria kul kotkhak zawn tak ah mun thawveng khat ah kichu a hiu ah. A ma-âng un jawlnei zosia chun thu a genlawk chiat un.

¹⁰ Khenana chapa Zedekiah chun thik sakî a kisiam ah, a kiang un, “Lalpa‘n zia gual hin a gen hi: Zia hi mang in Aram mite chu ahi masangsiau thatlum pek ding la hiu, ti’n a gen hi,” a tia.

¹¹ Jawlnei dangte haw zosia chunle zia gual chiat ah chun a hun gen tau ah, a kiang un, “Ramoth-gilead do dingin kuan un la vazo un; lengpa khut ah Lalpa‘n hun pia ding ahi,” a tiu a.

¹² Mikaiah ko ding ah a sawlpau chun, (Jawlnei Mikaiah kiang in) “Ngai in, jawlneite zosia’n lengpa lung lam tak in thu a genlawk chiat un; nang inle amau haw gen gual gual in, lengpa lung lam tak chun gen ziang in aw,” ti’n a gen a.

¹³ Mikaiah chun vang, “Lalpa min in, ka Pathian in a gen gual gual in gensawn ding ka hi,” ti’n a dawnhu a.

¹⁴ Mikaiah chu Lengpa kiang a hung tun phatin, lengpa chun a kiang in, “Mikaiah, Ramoth-gilead do ah kuan to ding ka hiu em kuan lo ding?” ti’n a dongah. Ama chun, “Kuan unla, vazo un; la khut un pûk ding a hiu,” ti’n a dawnhu a.

¹⁵ Himaleh, lengpa chun a kiang in, “Lalpa min ah zuau gen lo ah thu tak bep gen dingin bang vei jat hun kitiamsak ding ka hem?” a tia.

¹⁶ Ziaphatchun, Mikaiah chunle, “Belamching ding nei lo vâkvai gual ah tânggam ah Israel mipite vâk chek in ka mu hen; Lalpa‘n ka kiang in, ‘Ziate hi pu nei lo a hiu; thamuang tak in a In lam chiat un chia tau hen,’ a tii,” ti’n a dawnhu a.

¹⁷ Israelte lengpa chun Jehoshaphat kiang in, “Ama hin ka chungah thil phalo lam bep a gen sek in, ka lung lam mawng mawng a gen nuam puai, ti ka hun hil ta hilo a hem?” ti’n a gen a.

¹⁸ Ziaphatchun, Mikaiah chun a kiang in, “Ziaziakchun, Lalpa thugen hi a la ngai in: A vei leh chang ah van mipite ding kîmvêl in Lalpa chu a lalchutpha kichu’n ka mu hen.

¹⁹ Lalpa‘n zia gual hin a hun gen hi: ‘Israelte Lengpa Ahab chu Ramoth-gilead do dingin kua ka va jawl dawsak ta dia aw?’ a tia. Ziaphatchun, vansawlchâkte chun a chuam chiat a gendok tau a;

²⁰ tichun, thagau pakhat hung dingdok in Lalpa kiang lam a zuan ah, a kiang in, ‘Keima’n vajawldok ing ka,’ a vati’n. Ziaphatchun Lalpa‘n, ‘Bang ti’n la vajawl diam?’ ti’n a dong a.

²¹ Ama chun, ‘Kuan ing ka tin, a jawlneite zosia kam ah zuau gen dawsak dingin vakuan ding ka hi,’ a ti’n. Ziaphatchun, Lalpa‘n a kiang in, ‘Nang chun jawldok zo ding la hi’n, lawting ding la hi; chia kin inla, vabawl ngâl ta’n,’ ti’n a dawnhu a.

²² En ta’n la, la jawlnei zosia hi thagau lepchia Lalpa‘n a pia tai; Lalpa‘n la chung ah siatna tung dingin a gêl puk tak ziak ahi,” ti’n a dawnhu tai.

²³ Ziaphatchun, Khenana chapa Zedekiah chun Mikaiah chu a hun nai ah, a ngeibiang a bet piakah; chuleh, a kiang in, “La kiang ah thu gen dingin khoilam kâi ah Lalpa thagau chun ei hun pêl ah a hem?, ti’n a dongah.

²⁴ Mikaiah chun, Pindan sunggil ah kisel ding ah la lut phat leh hun mu ding la hi,” ti’n a dawnhu a.

²⁵ Israelte lengpa chun thu a hun pia: “Mikaiah chu hun pui unla, khawpi sung ah vaihawm Amon tawh lengpa chapa Joash kiang in thot unla;

²⁶ lengpa’n zia gual hin a gen hi tiu in la: ‘Zia mipa hi suangkul ah khum unla, thamuang tak ah ka hung vaitun kit masia an leh tui tawmcha cha’n a la piau in,’ a tii tiu in la,” a tia.

²⁷ Mikaiah chun a kiang un, “Thamuang tak ah la hung vaitun kit leh vang, Lalpa‘n ka kiang ah thu dik gen lo hi’n a,” a ti’n. Chuleh, zia gual hin a gen nalai a: “Mi zosiate haw, la leng un ngai un!” ti in.

Ahab Guallelna leh A Thi’na

²⁸ Tichun, Israelte lengpa tawh Judai gam ah Lengpa Jehoshaphat chu Ramoth-gilead do dingin a kuan tau a.

²⁹ Israelte Lengpa chun Jehoshaphat kiang in, “Kisiam lamdang in gâldo’na hin pang ing ka tin, nang chu la lal puan in kithuam zing in,” a ti’n. Tichun, Israelte lengpa chu kisiam danglam in gâldo in a kuan tau a.

³⁰ Aramte lengpa chun a sepai hotute kiang in, “Sepai vantang haw chu buaipi kiu inla, Israelte lengpa bep chu thalup guau in,” ti’n thu a la pia.

³¹ Kângtalai hotute chun Jehoshaphat a mu phât un, “Zia saw Israelte leng,” a ti sek un. Tichun, ama chu a delzui sek un; himaleh, Jehoshaphat a hung kikodaw phatin Lalpa‘n a hukdok sek a. Pathian in ama chu delzui talo dingin a kihei mangsak sek a;

³² kângtalaipute chun a mu phât si’n ua leh, Israelte lengpa ahi puai, ti a musak sek ziakin, ama chu a delzui sak ta ngai puai.

³³ Himaleh, mi pakhat in kuama doichuam le nei lo ah a thalpi a vak kâpdaw phatin, Israelte lengpa chu a gâlvan kuana dâlbak kikâlah a awmtâng a kap kha ta’n; a kângtalai hêkpa kiang in, “Ei kap kha tau hi, kângtalai le’hei inla, kidona mun ah kipat ei taidawpi in,” ti’n a hil a.

³⁴ Zia ni kido’na chu a huaisia deu deu ah, Israelte lengpa chu a kângtalai ah Aram mite lam nga’n nitâk lam tiang in a ding tei tei ah; himaleh, nisa tum jul in a thi tai.