2 KHANGTHU 17 - PATHIAN LEKHABU THIANGTHO (BSI)

Jehoshaphat Vaihawmna

¹ A chapa Jehoshaphat in a golua in, Israelte do zo dingin a hung kisuhat a.

² Judai gam ah kul nei khawpite ah chun sepai hon a koi chiatah; Judai gam sung pumpi leh a pa Asa in a la luana Ephraim khawpite ah chunle sepai a koi suak hi.

³ Jehoshaphat in a pa nunchan masa a zui ziakin Lalpa‘n a umpi zing ah; Baal haw chu don lo in,

⁴ a pa Pathian lam chu nga’n, a dan thute chu zui in, Israelte umchan chu a zui puai.

⁵ Ziaziakchun, Lalpa‘n ama khut in lenggam chu a sukdet piak tai. Judai gam ah mi zosia’n lei man Jehoshaphat kiangah a hun piak khawm phat un, hausakna leh za umna nasa tak a hun nei tai.

⁶ Lalpa lam in a lung a det ma ma ah; zia bep chule hilo in, Judai gam sung ah thoimual leh dawikhuam um zosia chule a susia dik dek tai.

⁷ A vaihawmna kum thum a tin in, Judai gam ah khawpi zosia ah mite hil dingin a nasêmte lak ah: Ben-hail, Obadiah, Zekariah, Nethanel leh Mikaiah cheng hi a sawldok a.

⁸ Ziate chu Levi chite lak ah Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah leh Tobadojah inle a zui un; zia Levite lak ah chun thiampu pani le a pang un, amau chu: Elishama leh Jehoram a hiu hi.

⁹ Lalpa dan lekhabu chawi in Judai gam ah chun a hil vêl un; chuleh, Judai gam sung ah khawpite ah chun chia vêl in mipite chule a hil pek un.

¹⁰ Judai gam kîmvêl ah lenggam zosia ah mite chun Lalpa launa a hun nei chiat phat un, Jehoshaphat chu a hung do ngam ta puau hi.

¹¹ Philistinte lak ah khenkhatte chun, Jehoshaphat kiang ah thilpiak leh lei man ding dangkate le a hun piau ah; Arabte chunle belamchal sang sagi leh za sagi tawh, kêlchal sang sagi leh za sagi le a hung piau a.

¹² Jehoshaphat chu awl awl in a hung khanglian deu deu ah. Judai gam ah chun kulpite leh go thil koikhawmna khawpite a siam a.

¹³ Judai gam ah khawpite ah chun nasep thupi tak tak te le a bawlah; chuleh, Jerusalem khua chun sepai leh gâl hangsan tam tak a nei hi.

¹⁴ A pu leh pateu suan dungzui ah a phung u-pateu chu zia gual hi a hiu a: Judah phung ah sang khat chung ah hotute chu: Adna chu nuai thum chung ah hotu ahi’n;

¹⁵ ama bân ah chun Jehohanan leh ama nuai ah sepai, nuai ni leh sîng giat a hiuah;

¹⁶ ama bân ah chun, Lalpa nasêm ding ah kipumpiak Zikhri chapa Amasia leh a nuai ah sepai hangsan nuai ni a hiu hi.

¹⁷ Benjamin phung ah chun: Sepai hangsan Eliada nuai ah sepai, thalpi leh phaw ah kithuam ngen nuai ni a hiuah;

¹⁸ ama bân ah chun Jehozabad leh a nuai ah sepai galdo ding ah kisazosa ngen nuai khat leh sîng giat a hiu hi.

¹⁹ Ziate hi Judai gam khawpi kul neite ah lengpa’n a la koi haw zosia bân ah lengpa sepai ah pangte chu a hiu hi.