2 KHANGTHU 16 - PATHIAN LEKHABU THIANGTHO (BSI)

Aramte tawh Kilemna Demum

¹ Asa lal kum sawmthum leh guk a ti’n in, Israelte Lengpa Baasha chu Judai gam do dingin a kuan ah; Judai gam ah Lengpa Asa kiang lam ah, kuama a chiatua lumlet theilona ding ua dâlna dingin Ramah khua’n kul a siam a.

² Ziaphatchun, Asa chun Lalpa In leh lengpa In ah dangka leh sana haw chu chom khawm in, Damaska khua Aramte Lengpa Ben-hadad kiang in a thotah, a kiang in,

³ “Ka pa tawh la pa kha a la pankhawm gual uh khan, ei te ni le pangkhawm hi ti; dangka leh sanale ka hun thot hi; chia inla, Israelte Lengpa Baasha hin ei hung dolona dingin la kizopnau thu kha vaphel kit ziang in,” a vatisak a.

⁴ Ben-hadad in le Lengpa Asa thugen chu a pom tai; tichun, a sepai hotute chu Israel gam ah khawpi haw chu do dingin a sawl tai. Tichun, Ijon, Dan, Abel-maim leh Naphtali gam ah a go thil koikhawmnateu chu a va lâkpiak tau hi.

⁵ Baasha in zia thu chu a het phat in, Ramah khua a kulpi siam chu haisan in a nasep uh chu a cholsan tau a.

⁶ Ziaphatchun, Lengpa Asa chun Judah mipite zosia chu pui in, Baasha in Ramah khua kulpi a siamna ding ah suang leh thing a puak khawm haw zosia chu a valâkpiak ah, Geba leh Mizpah kul bawlna dingin a mang tai.

⁷ Zia lai tak ah chun, thiamgau Hanani chu Judai gam ah Lengpa Asa kiang in a hungah, a kiang in, “Lalpa la Pathian ah kinga’ lo ah Aramte lengpa la kingak zawk tak ziakin, Aramte lengpa sepaite chu la tha’suak ta ahi.

⁸ Ethiopia leh Lubiate sepai tam tak tawh, sakol kângtalai leh a chung chuang mi tam dan huaisia takte kha hilo a hiu em? Himaleh, Lalpa ah la kingak ziakin la khut in a hun pia ahi kha.

⁹ Ama ah lungthim dik tak nga zosiate hihat dingin, Lalpa mit chun khawvel pumpi a mu suak hi. Ngolhuai tak in zia gual hin la bawl ta mai hi; tu’kipat hin gâl do pan ta ding la hi,” ti’n a vagen a.

¹⁰ Ziaphatchun, Asa chu thiamgau chung in a lungna ma ma ta’n, kol busak in suangkul in a khum tai; a thugen ziak ah a lungnat man ah zia gual ah chu a bawl ahi. Zia hun ah chun Asa in mi dang dangte le a sugenthei ma ma hi.

Asa Damlona leh A Thi’na

¹¹ Asa thilbawlte chu a masa pen ah kipat a nunung pen tiang in, Judai gam leh Israel gam ah Lengte Chanchin zikna lekhabu chun zik lut vek in a um tai.

¹² Asa lal kum sawmthum leh kuana kipat in a keng a hung na pan ah, a natna chu a hung khawk deu deu tai; a natgim ma ma inle Lalpa lam hawl diak lo in damdawi thiamte lam bep a dong zaw nalai hi.

¹³ Ziaphatchun, Asa chu a lal kum sawmli leh khat a ti’n in a thi tai; a pu leh pate kiang in a chawldam tai.

¹⁴ Ama thân ding ah David khawpi a kibawlna chun a vui tau a. Gimtui siamte’n a thiam theitawp ua a siam uh, gimtui haw lak ah mithi kuang ah chun a sial tauah; ama jana’n meipi nasa tak a sêm tau hi.