2 KHANGTHU 15 - PATHIAN LEKHABU THIANGTHO (BSI)

Asan gam sung A Siamphatna

¹ Pathian thagau in Oded chapa Azariah a hun thuam a.

² Asa kiang in a chia ah, zia gual hin a genah: “Lengpa Asa leh Judah leh Benjamin phung ah mi zosiate haw, ka thugen hi ngai tiam un: Lalpa ah la um sungsiau chu ama’nle a hun umpi hi. Ama la bawlphat ua leh hung kimusak intin; ahi’n, ama la nutsiau leh vang ama’nle hun nusia ngal ding ahi.

³ Israelte chu hun sawt tak Pathian dik tak nei lo in, amau thuhil ding thiampu leh dan nei lo in a la um tau a;

⁴ himaleh, lungkhamna a tuak phat ua leh Israelte Pathian, Lalpa lam hun nga sek in, ama a hawl sek un, ama chu a mu sek ui.

⁵ Zia hun lai ah chun, a gam sung ah chêngte â ding ah haksatna tam tak a um ziakin, chia suk chia to lumlet le a lau um ma ma hi.

⁶ Pathian in buaina tincheng ah a sukbuai tâk ziakin, nam khat in nam dang khat do in, khawpi khat in khawpi dang khat kidotua in, siatna huaisia tawp a tuak tau ahi.

⁷ Himaleh, nang vang kihihat in! La khut nasep zosia lamzang ding a hiziak in, la khut chu thâtdasak kin!” ti in.

⁸ Oded chapa Azariah thugente chu Asa in a het phat in a hung kihân sak ah; tichun, Judah leh Benjamin mite gam sung leh Ephraim Thingtâng gam ah khawpi a luanau zosia ah kipat in, milim ki’dak um haw zosia chu a chomdok thiang kei a. Chuleh, Lalpa In mai jawn ah Lalpa mâichâm a la chimsa chule a siampha kit tai.

⁹ Judah leh Benjamin phung ah mite zosia tawh, a lak ua Lalpa a Pathian um ahi ti a het ziak ua Israelte lak hun taisan ah, amau hung bêl ah a gam ua gam dang mi gual ah a la chêng ta, Ephraim, Manasseh leh Simeon phung ah mi tam takte chu a ko khawm a.

¹⁰ Asa vaihawmna kum sawm leh nga a tin ah, a tha thumna chun Jerusalem khua chun a hung khawm tau a.

¹¹ Zia ni chun a gal lâk lak ua bawngchal za sagi tawh belam sangsagi chun Lalpa kiang ah kithoina a bawl tau hi.

¹² A pu leh pateu Pathian, Lalpa chu a lungthim zosiau leh a ngaituanau zosia ah hawl dingin thuthung a siam tau hi.

¹³ Kuale Israelte Pathian, Lalpa lam nga nuam lo tapo chu, têksia hi’n, khanglai hileh; numei hi’n, pawsal hileh thalup ngal ding a hiu, a tiu a.

¹⁴ Lalpa kiang ah aw ngai takah kiko in, pengkulte leh belam kîte ngai tak ah mut in kitiamna a bawl tau hi.

¹⁵ A lungthim zosiau leh a doinau gil tak ah thutiam bawl a hiziak un, zia a kitiamnau ziak ah chun Judah mipi zosia chu a kipak ma ma tau a; tichun, Lalpa chu a mudaw tâk ziak un, ama’n a kîmvêl ua mi zosia ah kipat galmuanna a pia tai.

¹⁶ Lengpa Asa chun ama nu Maakah chule Asherah lim ki’dak um tak a nei ziakin, lengnu ah a panna chu a paithâk piak tai. Asa chun zia a milim chu a tan bong ah, a sat tel zaw nung in Kidron Guam ah chun a hâl tum tai.

¹⁷ Israelte lak in vang thoimualte chu suksiat in a um puai. Asa chu vang a dam sungsia’n lungthim dik tak in a um zing hi.

¹⁸ Pathian Insung ah chun a pa’n a la latsate leh ama ngei in a latsate dangka, sana leh ûm leh bêl zosia chu a koilut suak tai.

¹⁹ Tichun, Asa lal kum sawmthum leh nga a ti’n tiang in gâl kidona him him a um kha ta puai.