2 KHANGTHU 14 - PATHIAN LEKHABU THIANGTHO (BSI)

Asa Vaihawmna

¹ Tichun, Abijah chu a pu leh pate lak in a ipmu ta’n, David khawpi chun a vui tau hi. A chapa Asa chun a go a lua tai. Asa hun sung ah chun kum sawm sung a gam chu a gâl muang tai.

² Asa chun Lalpa a Pathian mit tung in, pha leh dik tak in a bawl hi.

³ Ama chun gamdangte mâichâm haw leh thoimualte chu a susia sik sekah, a suang khuam zimteu khen chim in, a dawikhuamteu chule a phuk pâi sik sekah;

⁴ chuleh, Judah mipite chu a pu leh pateu Pathian, Lalpa lam nga ding leh a dan leh thupiak zui dingin thu a piai.

⁵ Judai gam ah khawpi zosia kipat thoimual leh gimtui mâichâm kisiam zosia chu a thialnâm sik sek hi. Tichun, ama lal sung in lenggam chu thamuang tak in a um tai.

⁶ Gam sung ah muang tak ah a um pet un, Judai gam ah khawpi zosia kulbâng ding a siam un. Lalpa‘n gâlmuanna a piak ziakin, a vaihawm sung in gâl a do kha puai.

⁷ Judai gam mipite kiang in zia gual hin a genah: “Zia khawpite hi bawlphai tiu in, kulpite ûmsak in, gâlven bûksângte siam hitiu in, kotpi leh thikjawlte zam hitiu; Lalpa I Pathian lung I hawl ziak un gam pumpi hi I khut ua ei piak ahi ngâl ah; ama lung I hawl un, ziaziakchun, kil tin ah gâlmuanna ei pia ta ahi,” ti in. Tichun, a hun bawlpha tau a, lamzang tak in a khawsa tau hi.

⁸ Asa chun Judah phung ah mi sepai nuai thum a nei ah, amau haw chu phawlian tak tak leh cheichate’n a kithuam un; chuleh, Benjamin phung ah mi sepai nuai ni leh sîng giat a nei in, amau chule phaw leh chemjamte’n a kithuam ui; zia haw zosia hi mihat minthang ngen a hiu.

Ethiopiate Hung do-na leh Nawkitna

⁹ Ethiopia mi Zerah chun sepai maktaduai khat tawh kângtalai za thum ah hung kuan in, Maresha tiang a hung tung to tau a.

¹⁰ Asa chule amau do ding in a kuandok ah; tichun, Maresha mun ah Zephathah Phâijawl langtuak ah chun a kigual tau hi.

¹¹ Asa chun Lalpa a Pathian zia gual hin a ko ah: “Aw Lalpa, nang in mi hat leh mi jawngkhal la panpi nop lo chuam a um puai. Aw Lalpa ka Pathian uh, nangma ah kinga leh la min bep suang ah zia mipite hi do gua ka hiziak un, ei hun panpi in. Aw Lalpa, nang chu ka Pathian uh la hi; mihing mai mai kizawsak ziang kin,” ti in.

¹² Tichun, Asa leh Judah mipite ma-âng in Ethiopiate chu Lalpa‘n a zaw piak ta’n, Ethiopiate chu a jamsia tau hi.

¹³ Lalpa leh a sepaite zawsa a hiziak un, Asa tawh a sepaite chun Ethiopia sepaite chu Gerar tiangah delzui in, pakhat chale suakcha lo in a that gam tau hi. Judai gam ah mipite chun gâl lâk tam tak a chom khawm tau hi.

¹⁴ Lalpa lau umna’n a umpi ziakin, zia Gerar tuam ah khawpi zosia chule a zo thiang tau a. Khawpi zosia chu a suam un, suam ding tam tak le a um him ahi.

¹⁵ Chuleh, ganchingte giamun haw le a sim un; tichun, belam leh kêlcha tam tak tawh, sangawngsaute le a hun lâkpiak zaw phat un, Jerusalem khua lam in a hung kit tau hi.