2 KHANGTHU 13 - PATHIAN LEKHABU THIANGTHO (BSI)

Judai Gam ah Abijah Vaihawmna

¹ Lengpa Jeroboam lal kum sawm leh giat tin in, Abijah in Judai gam ah vai a hawm pan a.

² Jerusalem khua’n kum thum sung vai a hawm hi. A nu chu Gibeah khua Uriel chanu Mikaiah ahi. Zia hun ah chun Abijah tawh Jeroboam chu a kido zing ui.

³ Abijah chun kidona pang dingin sepai hangsan nuai li a nei ah; Jeroboam inle gâldo ding ah têlchuam, sepai hat leh hangsan ngen nuai giat tawh a dosak a.

⁴ Ziaphatchun, Abijah chu Ephraim Thingtâng ah Zemaraim tângpang in a dingdok ah, zia gual hin a vak gen a: Jeroboam tawh Israel mipi zosiate haw, ka thugen hi a la ngai tiam un.

⁵ Lalpa, Israelte Pathian in Israel lenggam hi David leh a suan a pâkte chun, kumkhua a lua pek ding ua chi ah thuthung siam ah a la tiamsa a hi tai ti helo la hiu em?

⁶ Zia gual chu ahi sapi’nle, David chapa Solomon suakpa Nebat chapa Jeroboam hi a pu chung in a kiphin ta’n;

⁷ ahi’n, Solomon chapa Rehoboam chu naupang leh lungthim piting ahi masang khan, zia Rehoboam chung ah helna siam dingin michavai leh dukdak lo zosia hung kisang pawm in, a hung khawm tau ah, ziate chu a la lang zo ta pua’n.

⁸ Aleh, tu’hin nang in mipi tam tak leh Jeroboam in la pathian ding ua sana bawngno lim a siamte chu kisuanpi in, Lalpa‘n lenggam David chate khut ah a la piaksa hi lâkpiak zo ding ah kinem la hiu em?

⁹ Lalpa thiampu, Aron chate leh Levite chu nawdok in, gamdangte gual ah la thiampu ding uh kisiam kawm mai mai hilo la hiu em? Bawngchal khat a hem, belamchal pasagi a hem ah hung kilân thiangtho thei taphot chu, zia pathian bawn hilote thiampu ding po ah chun la pansak mai mai hilo a hem?

¹⁰ Kei haw ka hiu leh vang, Lalpa chu ka Pathian uh ahi’n, ama chu ka nusia ngai puau hi. Lalpa kiangah sêm ding thiampu Aron leh Levi suante lak ah mi ngen ka nei uh ahi.

¹¹ Amau haw chun jing leh nitâk si’n ah, Lalpa kiang ah kithoina, hâlmang thillat leh gimtuite chu hâl in, sana thiangtho dawkan ah chunle vaithum haw chu tiang in, nitâk si’n leh sana thaumeite chu a vak zingna dingin a chingtup zing ui; kei haw hin Lalpa ka Pathian thupiak uh chu ka vop zing un, nanghaw’n vang la nusia tau ahi kha.

¹² Ngai un, Pathian chu ka hotu pen uh ahi’n, a thiampute chun kidona pengkulte chu chawi chiat in, nanghaw do ding ah mipi ko khawm zing dingsa pang zo a hitau hi, ti’n a gen a.

¹³ Jeroboam chun a hung kuan tak ua leh, a nung lam ua chângpang ding lawile a pansak ah; tichun, a sepaite chu Judah sepaite âng lam in a tawlkhawm ah, a nung lam ua naw ding pawl le a pansak hi.

¹⁴ Judah mipite chu a datvel ua leh a ma lam leh a nung lam un a hun do tua tau a. Ziaphatchun, Lalpa a hun ko ua, thiampute chunle a pengkulteu chu a hun mut chiat tau a.

¹⁵ Tichun, Judah mipite chule gâldo dingin a hung kiko chiat phat un, Jeroboam tawh Israel mipi zosia chu Pathian in Abijah tawh Judah mipite chu a zawsak tai.

¹⁶ Judah mipite ma-âng in Israelte chu a jamsia tau a, Pathian in a khut un a pedok tai.

¹⁷ Abijah tawh a sepaite chun a zo tau ah, mi tam tak le a that ui; Israelte lak ah doichuam kitêldok nuai nga hial chu a that tau hi.

¹⁸ Tichun, Judah mipite chun a pu leh a pateu Pathian, Lalpa a kisuanpi ziak un, Israelte chu zo in a nuaisia tau hi.

¹⁹ Abijah chun Jeroboam chu a delzui pekah, a khawpiu bang jat a hem le lâkpiak tai; ziate lak ah chun: Bethel tawh a khawpelte, Jeshanah tawh a khawpelte leh Ephron tawh a khawpelte chu a lâkpiak tai.

²⁰ Abijah damsung in Jeroboam chu a kiduadok kit zo ta puai; Lalpa khutlum thuak in a thi pai tai.

²¹ Abijah chu vang a hat deu deu ah; ji sawm leh pali a nei ah; chapa sawmni leh ni tawh chanu sawm leh guk a nei hi.

²² Abijah thilbawl zosia leh a umchan leh a sepdaw zosia chu, jawlnei Iddo Chanchin zikna Lekhabu chun zik lut ahi tai.