2 KHANGTHU 10 - PATHIAN LEKHABU THIANGTHO (BSI)

Rehoboam Chung ah Kiphinna

¹ Rehoboam chu Shekhem khua’n a chia ah; zia Shekhem khua chun ama leng ah a puandawna ding un Israel mipite zosia a hung khawm un.

² Nebat chapa Jeroboam in zia thu chu a het phat in, Aigupta gam ah kipat in a hung ah, (ama chu Lengpa Solomon ah kipat a gam nusia ah Aigupta lam ah a la tai mang ahi’n.)

³ Ama ko dingin mi a sawl un; tichun, Jeroboam tawh Israelte zosia chu a hung khawm un, Rehoboam kiangah chun,

⁴ “La pa khan ka ngawngkol puak uh ei sukgik piak talua ahi. Tu’hin, la pa’n ka chung ua ngawngkol gik tak ei puaksak leh ei sepgimsakna haw hi ei sukjangkhai piak inla, la na sêm den ing kau,” a hung tiu a.

⁵ Ama chun a kiang un, “Ni thum zaw leh hung kit un,” ti’n a hilah. Tichun, mipite chu a chia mang tau a.

⁶ Lengpa Rehoboam, in a pa dam laiah a kiang ah nasêm ah um sek upa haw kiang ah chun, “Zia mipite hi bang gual ah dawnhu leng pha la sau em?” ti’n a dong a.

⁷ Amau haw chun, “Zia mipite chung ah hi la nunnem ah, la sukkipak ah, a kiang ua kam pha tak ah la gen piak chun, amau hi kumkhua’n la mite hi mai ding ahiu,” a tiu a.

⁸ Himaleh, upate lemguat dan chu a pom lo ziakin, khangthak, ama khangualpi a nasêm, a kiang ah um sekte chu a dongah;

⁹ a kiang un, “Zia tak ah mipi, ‘La pa khan ka chung ua a ngawngkol ngak hi a gik talua hen ei hijang piak in,’ ti ah hung donte hi bang gual in dawnhu leu hin pha la sau em?” ti’n a dongah.

¹⁰ Ama khangualpi khangthakte chun, “La kiang ah, ‘La pa khan ka chung ua ngawngkol ngak hi a gik talua hen ei hijang piak in,’ tiah hung don mipite kiang ah hin zia gual hin gen in: ‘Ka pa kawngbûk sâng in ka khutme hi a lian zawi.

¹¹ Ka pa khan la ngawngkol uh gik tak in a hun puaksak hi maw! Keima’n la puakgik uh chu hun belap piak nalai ding ka hi. Ka pa khan mi jepna mol in a hun vaw sek in; keima’n chu ainuvet hun pe’sak in, hun engbawl ding ka hi,’ ti’n gen in,” a tiu a.

¹² Tichun, lengpa’n, “Ni thum zaw leh hung kit un,” a ti dungzui in, Jeroboam tawh mipite chu a ni thum zaw in Rehoboam kiang in a chia kit tau a.

¹³ Lengpa chun daidawpna pang lo in a la ho a. Lengpa Rehoboam chun upate thuhilna kha pom lo in,

¹⁴ khangthakte thuhilna dungzui in a la dawnhu a: “Ka pa khan la ngawngkol uh gik tak in a hun puak sak in, keima’n la puakgik uh chu hun belap nalai ding ka hi; ka pa khan mi jepna mol in a hun vaw sek in, keima’n chu ainuvette hun pe’sak in, hun engbawl ding ka hi,” ti’n a la dawnhu a.

¹⁵ Tichun, lengpa chun mipite thugen chu a ngaisak ta pua; Lalpa chun Shilon khua’ Ahijah kiangah, Nebat chapa Jeroboam kiangah a thutiam dungzui ah a guitun theina ding ah, Pathian in a chuti bawlsak chu a la hi’ngal a.

¹⁶ Lengpa’n a thugen uh ngaisak lo ahi, ti Israelte’n a het phat un, mipite chun lengpa kiang in: “David ah hin bang chanvo ka nei ua a hem? Jesse chapa ah hin golua ding ka nei puau hi. Aw Israelte haw, la puanbûk lam chiat un chia kit tau in! Aw David, la Inkuante bep chu ki-etkol mai ta’n!” a tiu a. Tichun, Israelte zosia chu a puanbûk lam chiat un a chia kit tau hi.

¹⁷ Himaleh, Rehoboam chun Judai gam ah khawpite ah Israel chêngte zosia chung bep ah chun vai a hawm tai.

¹⁸ Lengpa Rehoboam in a nasêm ah a gawite lak ah hotu Hadoram a kiang lam ua a sawl phatin, Israel mipite chun suang in a seplum tau a. Lengpa Rehoboam le kin tak ah Jerusalem lam ah jam dingin a sakol kângtalai in a chuang tai.

¹⁹ Ziaziakchun, Israelte chu David Inkuante chung in tu’ni tiang hin a kiphin den tau ahi.