1 TIMOTHI 6 - PATHIAN LEKHABU THIANGTHO (BSI)

¹ Pathian min leh thuhilna thu chu gensiat ah a um lona ding in, suak ngawngkol bât tapo in a puteu chiat chu jabawl tâk in ngai uh hen.

² Chun, gingtu hotu ah neite chun unau khat a hung hi tâk ziak un ngainiam diak kiu hen la, a na seppiakteu chu gingtute leh doitakte ahi tâk ziak un, a phazaw diak in sep piak zawu hen. Zia thute hi hil inla, tîl in.

Zilsakna Diklo leh Hausakna Dik Chu

³ Kua’nle thuhilna chuam a hun hil ah, thu dik, I Lalpa Jesu Khrista thute leh, Pathian ngaisakna tawh kituak ah thuhilnate pom lo ahi chun,

⁴ ama chu mi kisathei, bangma helo, kinial leh kikalna lam ah ngolpi zaw ta ahi. Zia haw ah kipat chun ênna, kipawl khenna, kigen siatna leh kiginlânate a hung pawt sek a,

⁵ ngaituana gilo leh thutak neilo mite lak ah chun kinialnate a um sek ah, amau chun Pathian ngaisak hi lawkna ding bep in a ngaituau hi.

⁶ Lungawina tawh kithua ah Pathian ngaisakna hi lawkna thupi tak chu vang ahi him hi;

⁷ khawvel ah hin bangma I lûtpi puau ah, bangma I pawtpi diak pawngal un;

⁸ nêk ding leh sil ding I nei ua leh, zia chun lungawi mai hitiu.

⁹ Himaleh, hausak nuamte chu thepna’n a lut sek un, thil ngolhuai leh a hi’sethei nopnate thâng in a awk un, ziate chun siatna leh manthâina’n mite a tum lutsak sek ahi.

¹⁰ Dangka sum ngainat hi gitlona chitin bul ahi ngal a; khenkhat in hausak nopna ziakin ginna chu jamsan in, amau leh amau lungngaina tam tak a kisunkhum sek uh ahi.

Ginna Kidona Pha Chu

¹¹ Ahi’n, nang Pathian mi, zia thilte chu jamsan inla, dikna, Pathian ngaisakna, ginna, hepina, thoktheina leh nunnemna chu del zaw ta’n.

¹² Ginna kidona pha chu do inla; kumtuang hinna chu tudet ta’n; zia ding ah chu ko leh, hiatpitu tam takte ma ah puandawna pha chu bawl ta la hi kha.

¹³ Pathian, thil bangkim hinna pepa leh Khrista Jesu, Pontia Pilat ma ah puandawna pha puangpa âng in thu ka hun pia ahi:

¹⁴ I Lalpau Jesu Khrista suklat ahi masia, thupiak chu buak lo leh dem bei in vop zing in.

¹⁵ Zia chu a hun tak in pâk tâk leh Thuneipa bep, lengte Leng, lalte Lalpen chun hun tunsak ding ahi.

¹⁶ Ama bep chun thithei lona a nei ah, kuama nai theilo vâk ah chun a um ah, kuama’n a mu ngailo leh a mu theilo uh ahi’n; ama kiang ah chun choihoina leh thuneina kumkhua’n um ta hen. Amen.

¹⁷ Zia khawvel ah mi hausate chu a hiu leh, kiletsak lo ding leh, hausakna muan umlo ah a kinepnau ngalo ah, I limna ding ua bangkim ah ei somdawlpa Pathian chung ah nga zaw dingin hil in.

¹⁸ Amau chun thilpha a hiu ah, nasep pha lam ah a hausat ua, a huangphal ua, a kiphal ding uh ahi.

¹⁹ Chutia, tu’nung ah amau â ding ah suangphûm pha gothil kiphûm ah, hinna tak tak chu a tûkdet theina ding un.

²⁰ Timothi, la kiang ah vopsak ah um chu vêngpha ta’n. Diklo tak ah pilna a tiu, thu kigen mai mai leh kinialnate chu kiheimang san in;

²¹ zia chu mi khenkhat in nei kisa’n, ginna lam ah chun a chia khial tau hi. Hepina la kiang in um ta hen. Amen.