1 TIMOTHI 3 - PATHIAN LEKHABU THIANGTHO (BSI)

Kochuam ah Hotu Lian Titna

¹ Kua’nle, kochuam hotulian ah pan nopna a nei chun, nasep pha dawi ahi, ti hi a dik hi.

² Chutichun, kochuam hotulian chu dem kâi lo, ji pakhat nei, kisûm thei, lungthim navak, mi ja’um, mi lop thiam, mi hil thiam;

³ zudawn mi hilo, khutthâk chîng lo ah mi nunnem hizaw, kinak chîng lo leh dangka ngaina lo ahi ding ahi.

⁴ Ama Insung pha tak ah pawtûp in, a chate chu kawng bangkim ah thumang leh ja’um tak ah a thunun zaw ding ahi;

⁵ aziak chu, min ama Insung nangawn a puaktûp zaw lo chun bangti’n Pathian kochuamte enkol thei ding a hem?

⁶ Gingthak a hilo ding ahi, chutilochun kisaktheina dim in, diabol thiamlo chansakna chun pûk kha’n a.

⁷ Zia lo chun le, pawlam mite gen phat a hiding ahi; a chutilochun, gensiat ah um in diabol thâng ah chun awk kha’n a.

⁸ Zia gual ma chun kochuam ah hotu dingte chu mi titak ahi diu ahi; mi kam tam, zudu, dangka huaihap hi kiu hen.

⁹ Sia leh pha hetna thiang tak ah ginna thugûk vopdet mi ahi diu ahi.

¹⁰ Chuleh, amau chu etchian in um masau hen la; zia nung ah chun demna ding umlo ahi ngei ua leh, kochuam ah hotu na chu sepsak hiu hen.

¹¹ Zia gual ma chun a jiteu le mi titak, mi gensiat chîng lo, kisûm thei, bangkim ah ginum ahi diu ahi.

¹² Kochuam ah hotute chu ji pakhat bep nei hiu hen la, chuleh, a chateu leh amau Insung ngei pha tak ah pawtûp zo ahi diu ahi.

¹³ Kochuam ah hotu na pha tak ah sêmte chun, amau â dingin minphatna leh Khrista Jesu ah um ginna ah hânsanna lian tak a nei tau hi.

Ginna Thugûk Chu

¹⁴ Chomkhat zaw leh la kiang ah hung ka kinem in, himaleh, zia thute ka hun zikna ziak chu,

¹⁵ ka hung vâigei khâk leh, Pathian Inkuan ah bang gual ah um ding a hem ti la hetna dingin ahi; zia ngei chu Pathian hing kochuam, thutak khuam leh kulpi chu ahi.

¹⁶ Nial gual lo hial in, I ginnau thugûk uh chu a lopi hi: “Ama chu taksa ah suklat, thagau ah thiam chansak, vansawlchâkte mu ngei, Jentelte lak ah tângkopi, khawvel pumpi ah taksan, lopina ah lâk to ah um ahi,” ti hi.