1 TIMOTHI 2 - PATHIAN LEKHABU THIANGTHO (BSI)

Pauchapna Thu ah Hilna

¹ Chutichun, a masa pen ah chun, thildot pauchapnate, pauchapna him himte, midang â ding ah pauchapnate leh kipak thu gennate hi mi zosia â ding ah nei piak dingin ka hun tîl la hi;

² lengte leh thuneina sâng tak neite â dingin tawh: Tichun, Pathian ngaisak leh za tak ah, thamuang tak leh kicham dial ah vai a hawm theina ding un.

³ Zia chu I Hukdampau Pathian mit mu in a pha’n, a pom tâk hi,

⁴ ama chun mi zosia hukhin ah um ding leh thutak he ding in a dawi hi.

⁵ A ziak chu, Pathian pakhat bep a um ah, Pathian leh mihing kikâl inle Palai pakhat bep a um hi, ama Khrista Jesu, Mihing ngei chu,

⁶ ama chu mi zosia tatna dingin a hung kipe tai, zia thu chu a hun tak ah taklat in a um tai.

⁷ Zia ding ah chun thugen ding leh sawlchâk ding, (thutak ka gen ahi, juau ka gen puai,) ginna leh thutak ah Jentelte thu hil ding ah guat ka hi.

⁸ Chutichun, muntin in pawsalte chun, khut thiangtho jak in, lungna lo leh kinial lo in pauchap leu ka dawi in;

⁹ numeite chu a hun bepcha leh nîk leh puan kilawm tawk tiang bep in kivan uh hen; samphêk a hem, tuikep suang a hem leh puan man tam tak tak a hem ah kijem lo in,

¹⁰ nasep phate’n kivan zawu hen; zia chu numei Pathian ngaisak kitite â ding ah kilawm him ahi.

¹¹ Numei chun kitulut tak kawm in thipbek in zil hen.

¹² Numei kuama thu zilsak ah a pan ding a hem, pawsal chung ah thu a nei ding a hem ka phal puai; amau chu thip hiat hiat ah a um diu ahi.

¹³ Amasa’n Adam, zia nung ah chun Evi siam ahi ngal a;

¹⁴ chuleh, Adam chu theppûk in a um pua’n, numei vang chu theppûk in a um ah, botsia a hung hi tai.

¹⁵ Himaleh, ginna leh hepina leh thianthona ah, a kilawm bep ah a um chun, ama chu nau hin ziakin hukdam hi’n a.