1 TIMOTHI 1 - PATHIAN LEKHABU THIANGTHO (BSI)

Chibai Bûkna

¹ Paul, I hukdampau Pathian leh Khrista Jesu I kinepnau, thupiak dungzui ah Khrista Jesu sawlchâk hin,

² ginna ka chapa Timothi kiang ah: I pau Pathian leh Khrista Jesu I Lalpau kiang ah kipat hepina leh jangaina leh chamna um ta hen.

Thugin Diklote Lak ah Kivên Ding dan

³ Makedonia gam ah ka chia ding kuan ah ka hun hil gual khan, Ephesa khua’n umzing inla, mi khenkhat in thugin chuam zilsak lo ding ah la hiltheina ding leh,

⁴ Pathian lam ah phatchuamna, ginna ah um pen hilo ah, tuanthu lui leh khangthu suidaw sênlote kinialna suaksak sekte chu buaipi lo ding ah la hiltheina ding in.

⁵ Ei un thuhil ding I kol pen uh hi ahileh, lunggil thiangtho leh sia leh pha hetna thiang leh ginna tak tak ah kipat pawt hepina ahi zaw ngal a.

⁶ Mi khenkhat in ziate chu pêtmangsan in, thuman lo phatchuamna beite chu a buaipi zaw tau a.

⁷ A thugen uh leh thil ahi ngei ah a genteu le bang ahi helo in, Dan thu zilsaktute hi a nuam sek ui.

⁸ Min a mat dik phot ua leh Dan chu a phai ti I hiau,

⁹ Ziate hi a umzia hetchian ding ahi, Dan chu miphate â ding ah kibawl a hipua’n, Dan kãl mite leh Dan botsete, migilote, mithianglote, mibuakte, pa ahiloleh nu thatte, mithatte haw leh,

¹⁰ mithanghuaite, tawkawhûkte, mihing ah kiveite, juautheite, juau ah kihaksialte leh,

¹¹ pakchat tâk Pathian chanchinpha lopi tak ka kiang ah vopsak ah um, zia thugin chu tawh kikãl thil dang him himte â ding ah chun bawl ahi.

Jangaina Ziak ah Kipak Thu Genna

¹² Keima hatna ei pepa, Khrista Jesu I Lalpau kiang in kipak thu ka gen hi; ama chun ginum ah ei ngai in, a nasêm ding ah ei pansak ziakin.

¹³ Tu’ma khan Pathian gensepa, a hi’gentheipa leh a hi’liampa a la hitama leng, ginglo pum ah ka la hetlo ziak, ahiziak in jangaina chu ka mu ahi.

¹⁴ I Lalpau hepina chu, Khrista Jesu ah um ginna leh hepina chun keima ah nasa tak in a dimlêt tai.

¹⁵ Khrista Jesu chu migilote hukdam dingin khawvel ah hung ahi, ti hi taksan um leh pom tâk ahi. A lak ua gilo Chungnung pen chu keima ka hi.

¹⁶ Himaleh, ziaziak tak ah chun ahi jangaina chu ka mu; chutia, a gilo pen keima ah Jesu Khrista dawtheina kim latsak ah um chu, tu’nung ah ama hun gingte chun, kumtuang hinna a mu ding uh chu etsakna hiding in.

¹⁷ Khang zosia ah Lalpen, thi theilo, muthei lo, Pathian pakhat bep kiang ah chun kumtuang in choihoina leh lopina um zing ta hen.

¹⁸ Ka chapa Timothi, la chungchâng ah genlawknate tawh kituak in zia thuhilnate hi ka hun pia ahi; tichun, ziate chu la zui ah, kidona pha chu la do theina dingin.

¹⁹ Ginna leh sia leh pha hetna thiang tak vop zing in. Mi khenkhat in a sia leh pha hetnau chu paitha’n, ginna lam ah chun kuang kek gual in a buaisia tau hi;

²⁰ ziate lak ah chun Humenai leh Aleksander le a hiu in; amau chun Pathian a gensiat tâk lona ding un Setan kiang in ka pedok tai.