1 SAMUEL 9 - PATHIAN LEKHABU THIANGTHO (BSI)

Leng Ding ah Saul Têldawna

¹ Benjamin phung ah mi pakhat a um ah, a min chu Abiel chapa Kish ahi; a pa chu Benjamin suan ah mi hausa tak Aphiah chapa Bekorath chapa Zeror chapa ahi.

² Ama chun chapa pakhat a min Saul kiti, tangval mêlpha tak khat a nei a. Ama tuk ah tangval mêlpha chu Israelte lak in a um pua’n; a din leh mi dang zosia luchang leh liangko sâng ah sâng zaw ahi.

³ Tichun, Saul pa Kish sabiltungte a la vâkmang kha tau a. Kish in a chapa kiang in, “Suak tangval pakhat kipui inla, sabiltungte chu vahawl un,” ti’n a sawl a.

⁴ Ephraim tânggam a hawl suak ua; chuleh, Shalishah gam a hawtheng pek un, ahiziakin a mu zo diak puau ah. Chuleh, Shaalim gam a hawl un a muzo diak puau in, Benjamin gam a hawl kit un a mu zo diak puau hi.

⁵ Zuph gam a hung tun phat un, Saul in a kiang ah tangval kiang ah chun, “Chia kit mai tai ti; achutiloleh, ka pa’n sabiltungte lungkhampi talo in ei chung ah a lungkhamna lian zaw kha ding ahi,” a tia.

⁶ Himaleh, ama chun, “Zia khua hin Pathian mi pakhat a um in; mite’n a ja ma ma ziang uh ahi. Ama thugen taphot chu guitung mai ahi. Tu’hin ama kiang ah chia lehin, I buaina thu hi ei hil thei khâk leh,” ti’n a dawnhu a.

⁷ Ziaphatchun, Saul in tangval kiang ah chun, “A kiang in chia ta lehin, zia pa chu bang I puak piak diam? I dip ah vaithum a um ta pua’n, Pathian mi kiang ah piak ding bangma I nei ta pua’n. Aleh I nei bang a um him him em?” ti’n a dong a.

⁸ Tangval chun Saul chu a dawnhu kit ah, “Zia hin dangka shekel khat se’li sua ah a se’khat ka nei hilam; zia chu Pathian mi kiang ah pe lehin, I lampi ding ei hil in ah,” a tia.

⁹ (Masang lai ah chun, Israel gam ah Pathian kiang ah thu dong ding ah a chia phat ua leh, “Hung tiam in, thiamgau thil hetheipa kiang ah chia hi ti,” a ti sek un; tu’lai ah jawlnei I titeu hi zia lai ah chun thiamgau a la ti sek ziak uh ahi).

¹⁰ Saul inle tangval kiang ah chun, “A phai; hung in chia ngâl hi ti,” a tia. Tichun, Pathian mi umna khua chun a vachia tau hi.

¹¹ Khawpi lam zuan ah tâng ah a chia to lai un, nungak hon tuikhai ding tawh a kituak un, a kiang un, “Thiamgau chu a um em?” ti’n a dong ua.

¹² Amau inle, “Aw, la hung madeu ua khan a la pawt hi. Chia kin un; tu’ni hin mipite’n thoimual ah kithoina nei ding a hiu in, zia na ding ah chu tu’ ma ma ah chu khawpi zuan ah hung ahi.

¹³ Khawpi sung la lut phat ua leh, ama mu ding ah la vachia ziang lo ua leh thoimual ah an ne dingin a la chia man kha’n a. Ama a hung ah, maljawlna a dot piak masang sia, mipite’n ne thei lo ding a hiu; ziazaw chuleh, chial ah umte chun ne bep ding a hiu. Tu’hin chia to ngâl ziang un, la kimupi kintheina ding un,” ti’n a dawnhuu a.

¹⁴ Tichun, khawpi zuan in a chia to ngâl ua. Khawpi sung a lut ding kuan un, Samuel thoimual lam ah chia ding kisa, amau lam hun zuan chu a mu tau hi.

¹⁵ A kiang ah Saul a hungma ni masa ah khan, Lalpa chun Samuel kiang in thil khat a la hil lawk ta’n:

¹⁶ “Jing leh tu’hun tuam hileh, Benjaminte gam ah kipat in pawsal pakhat la kiang ah hun sawl ding ka hi, ama chu ka mipi Israelte chung ah vaihawm ding ah sathau la nu’ ding ahi. Ama chun Philistinte khut ah kipat in ka mipite chu hukdok ding ahi; ka mipite gentheina ka mu ta’n, ei konau aw git ka het tâk ziakin,” ti in.

¹⁷ Samuel in Saul a mu phât in, Lalpa‘n a kiang in, “La kiang ah ka la gen mipa chu zia hi ahi. Ka mipite chung ah vaihawm ding chu ama hi ahi,” ti’n a hil a.

¹⁸ Saul in khawpi kêlkot sung ah Samuel chu a hun zuan ah, a kiang in, “Lungsiat in thiamgau In chu khoi tak a hem ei hil in,” a ti’n.

¹⁹ Samuel in Saul chu a dawnhu ah, “Thiamgau chu keima hi ka hi; thoimual lam zuan in ka ma-âng ah chia in; tu’ni hin ka kiang ah an ne ding la hi; chuleh, jingkal phat leh hun chiasak ing ka tin, la lungthim ah la ngaitua zosia chule hun hil ing ka.

²⁰ Ni thum masang ah la sabiltung matsuate kha vang buaipi ta kin a mudok tau hi. Israel mipite zosia’n a thîl uh chu, nang leh la pa Inkuante hi hilo la hiu em?” ti’n a la dawnhu a.

²¹ Saul in zia gual hin a dawnhu ah, “Kei hi Israelte phung lak ah a naupang pen Benjamin phung ah mi ka hi’n; chuleh, Benjamin phung lak ah le Inkuan thulimlo pen ka hi kit in. Bangtidan ah zia gual ah chu ka kiang ah thu gen la hem?” a tia.

²² Tichun, Samuel in Saul tawh a suak tangval chu pindan lian ah chun a puilût ah, mi kichialkhawm sawmthum vêl ma-âng ah chutna khat ah chun a chutsak a.

²³ Samuel in anhuante kiang in, “La kiang ua a la koichuam un ti ah saliang ka hun piak kha hun lau in,” ti’n a don a.

²⁴ Anhuanpa chunle saliang a zuisekte kha tawh a hun ladok ah, Saul âng in a hun koi ah. Samuel in, “Ngai in, zia hi nang chan ding ah ka la koichuam sak, tu’hun â ding ah hi ka khêk piak ahi; la’n la ne’n; chial ah umte tawh la nêk khawm ding ah ka la khêksak a hi,” a tia. Tichun, zia ni chun Saul in Samuel tawh an a ne’khawm tau hi.

²⁵ Thoimual ah kipat khawpi lam zuan ah a hungsuk lai un, Indan chung lam ah chun Saul lupna ding a la siam piak un; zia tak ah chun Saul a lum tai.

²⁶ Jingkal phalvak lim in Samuel in Indan chung lam ah Saul chu a ko ah, “Hung tho in, la chiana ding lam ah hung thak ta’ng ka,” a tin. Saul le a thodok ah, Samuel tawh khawpi kotzing ah chun a kiton tau hi.

Samuel in Saul Sathau A Nu’na

²⁷ Khawpi pâm lam a hung tun phat un, Samuel in Saul kiang ah, “Zia tangval hi I ma lam ah chia dingin sawl in; chuleh, ei hun makhel zaw phat leh chomkhat ding inla, Pathian in la het ding ah a thugente chu hun hil ing ka,” a tia.