1 SAMUEL 7 - PATHIAN LEKHABU THIANGTHO (BSI)

¹ Tichun, Kiriath-jearim khua mite chu a hung suk un, Lalpa thuthung thingkuang chu a hung kilâk to un, tânggam ah Abinadab In ah a koi tau a. A chapa Eleazar chu Lalpa thuthung thingkuang enkol dingin a suthiangtho tau hi.

² Kiriath-jearim-ah thuthung thingkuang chu hun sawt tak, kum sawmni ding vêl a kikoi zaw nung in, Israel mipite zosia’n Lalpa a hun thangai pan kit tau ahi.

Samuel Vaihawm ah A Panna

³ Ziaphatchun, Samuel in mipite zosia kiang in, “La lunggil tak ua Lalpa lam ah kihei kit gua la hiu chun, la lak ua pathian dang zosia tawh Astarte kha paidok un. La lunggil tak un Lalpa lam ah kihei unla, ama na bep sêm un; chutileh, Philistinte thunuai ah kipat hin hun hukdok ding ahi,” ti’n a gen tai.

⁴ Tichun, Israelte chun a lak ua Baal leh Astarte haw chu paidok in, Lalpa na bep a sêm tau hi.

⁵ Ziaphatchun, Samuel in, “Israel mipi zosia chu Mizpah ah hun ko khawm unla, Lalpa kiang ah hun dot piak ing ka,” a tia.

⁶ Tichun, mipi zosia Mizpah ah hungkhawm in, tui a khai un; kithoina thillat in zia tui chu Lalpa âng in a sungtha tau a. “Lalpa chung in ka la bawlkhial tau hi,” ti’n, zia ni chun an a ngawl tau a. Tichun, Samuel in Mizpah ah kipat in Israel zosia chung in vai a hawm tai.

⁷ Israel mipi zosia Mizpah in a kikhawm ui ti Philistinte’n a het phat un, Philistin hotute chu Israelte do dingin a kuan tau a. Israel mipite’n zia chu a la het phat un Philistinte chu a huphul ma ma ziang tau hi.

⁸ Israel mipite chun Samuel kiang in, “Lalpa ka Pathian kiang ua kei uh â ding ah pauchap chu chawl kin la; Philistinte thunuai ah kipat ei hukdok dingin ei dot piak zing in,” a tiu a.

⁹ Tichun, Samuel in belamno, nawichep nalai pakhat chu Lalpa kiang ah hâlmang thillat dingin a pia ta’n; Samuel in Lalpa kiang in Israelte â dingin a dot piak ta’n; chuleh, Lalpa‘n a lawtin sak tai.

¹⁰ Samuel in hâlmang thillat a lat lai tak in Philistinte chu Israelte do dingin a hun nai ta ma mau ah; himaleh, Lalpa‘n nasa tak ah van a gitsak phatin Philistinte chu a subuai ta’n; tichun, Israelte âng ah chun a jam mang zo tau hi.

¹¹ Israelte chu Mizpah ah kipat pawtdok in Philistinte chu a delzui un, Beth-kar khua tiang in a that gam tau hi.

¹² Chuleh, Samuel in Mizpah tawh Jeshanah kikâl ah chun suang pakhat a phu ah, a min in Ebenezer a sak tai; ama’n, “Zia chan hin Lalpa‘n ei panpi ahi,” a ti ziak a hi.

¹³ Tichun, Philistinte chu nuaisia ah a um tak ziak un Israelte gam sung in a hung lut kit ta puau ah; Samuel dam sung sia Lalpa‘n Philistinte chu a do zing tai.

¹⁴ Israelte khawpi, Philistinte’n a la lâkpiak uh Ekron ah kipat Gath tiang in a pe’kit tau ah; tichun, Philistinte’n a la lâkpiaknau gam zosia chu Israelte a chang kit tau hi. Chuleh, Israelte tawh Amorte kikâl inle kichamna a um tai.

¹⁵ Samuel in a dam sung zosia chu Israelte chung in vai a hawm tai.

¹⁶ Kum si’n leh Bethel, Gilgal leh Mizpah a chuantha zing ah; tichun, zia munte ah kipat hin Israelte chung in vai a hawm tai.

¹⁷ Chuleh, a chênna mun ahi ziakin, Ramah lam in a hung kit sek ah; zia mun ah kipat chun Israelte chung ah thudik in vai a hawm ah, zia tak ah chun Lalpa â dingin mâichâm pakhat a siam tai.