1 SAMUEL 5 - PATHIAN LEKHABU THIANGTHO (BSI)

Philistinte Lak ah Pathian Thuthung Thingkuang Chu

¹ Philistinte chun Pathian thuthung thingkuang chu a lâkpiak phat un, Ebenezer ah kipat in Ashdod a paw tung tau a;

² chuleh, Philistinte’n zia Pathian thuthung thingkuang chu, a pathian uh Dagon In ah paw lut in, Dagon kiang in a koi tau a.

³ A jing ah Ashdod khua mite jingkal vaima tak ah tho in, a et ua leh a Dagon pathian uh chu, Lalpa thuthung thingkuang âng ah chun a khup lam in a la kizam ta maiah. Tichun, Dagon chu a umna ngaiah chun a phong ding kit tau a.

⁴ Ahi’n, a jingkal kit ah vaima tak ah a thaw kit phat un, Dagon chu Lalpa thuthung thingkuang ângah chun a khup lam in a la pûk kitah; chuleh, Dagon luchang leh a khutbânte ni kitanthasa, Inhulliap ah a la um leh Dagon pum bep a la um chu a mudok tau a.

⁵ Ziaziakchun, Dagon thiampute leh Dagon In ah lut taphot chun, tu’ni tiang in Ashdod ah Dagon hona In hulliap a chuan ngailo uh ahi.

⁶ Ashdod khua mite chu Lalpa‘n a soisa’n, Ashdod khua leh a gam bung zosia ah mite chu sudipchâk in, vunnatna huaisia tak in a gawt tai.

⁷ Chuleh, Ashdod khua mite chun thil hung tung chu a mu phât un, “Israelte Pathian thuthung thingkuang hi I kiang ua umsak lo ding a hi; ei haw leh I pathian uh Dagon ei gawtna hi a tizat um ta lua hilam,” a tiu a.

⁸ Tichun, Philistinte lak ah hotute chu kikokhawm in, “Zia Israelte Pathian thuthung thingkuang hi bang law ding I hiu em?” a kitiu a. Gath khua mite chun, “Pathian thuthung thingkuang chu kei uh kiang lam ah puai tiu,” a tiu a. Tichun, Israelte Pathian thuthung thingkuang chu Gath khua lam in a pua mang tau a.

⁹ Himaleh, Gath khua a puak tung zaw phat un, Lalpa‘n zia khua chêngte chu a hun gawt kit ziakin a patau ma ma ziang tau a; khawpi sung ah chêngte lak ah a têk a khang kidang lo in tibawk natna a vei chiat tau a.

¹⁰ Ziaphatchun, Israelte Pathian thuthung thingkuang chu Ekron lam a tut kit tau a. Himaleh, Ekron khua Pathian thuthung thingkuang puak tung ahi phatin, Ekron khua mite chu a kikojak un, “Bang dingah kei haw leh ka mi teu that dingah Israelte Pathian thuthung thingkuang la hun puak lut uh a hem?” a tiu a.

¹¹ Ziaziakchun, Philistin hotute chu a ko khawm tau a, a kiang un, “Israelte Pathian thuthung thingkuang hi a umna mun ngaiah vathak kit mai un, kei haw leh ka mipiteu ka thigamlona ding un,” a tiu a. A khawpi sung zosiau ah thi ding lau ah patauna a huaisia ma ma ah;

¹² a thilo sunte chule vunnatna a vei un; tichun, mite kâ thawm chun van a thawng hial ziang tai.