1 SAMUEL 4 - PATHIAN LEKHABU THIANGTHO (BSI)

Pathian Thuthung Thingkuang A Lâkpiaknau

¹ Chun, Samuel thugen chu Israelte zosia’n a he suak tau a. Zia hun lai ah chun, Philistinte chu Israelte do dingin a kisauah; amau do dingin Israelte le a kuandok ua. Amau chu Ebenezer ah a kikul un, Philistinte chu Aphek in a kikul ui.

² Philistinte chu Israelte dâltan dingin a la kitiang un, a hung kido phat un, Philistinte chun Israelte chu a zo tau a. Israelte chu kido’na mun ah mi sang li ding vêl a that tau a.

³ Sepaite giamun a hung tun kit phat un Israel upate chun, “Bang dingah Lalpa chun Philistinte âng ah ei sumualpho ziang ahi ta dia aw! Shiloh ah Lalpa thuthung thingkuang chu vala’n, zia hin koi hitiu, I lak ua a hung pan ah, I mêlmateu thilhitheina kipat ei hukdaw khâk leh,” a tiu a.

⁴ Tichun, Cherubte chungah kitung, sepai honte Lalpa thuthung thingkuang Shiloh ah um vapaw dingin mi a sawl tauah. Pathian thuthung thingkuang chu Eli chapa, Hophni leh Phinehas in a hun kitonpiu a.

⁵ Lalpa thuthung thingkuang chu giamun a hun puak tung phat un, Israel mipi zosia kipak in, lei kithing hial in a kiko tau a.

⁶ Philistinte’n a kiko thawm uh a la het phat un, “Zia Hebraite giamun ah thawmgi hi bang thu ahi tam?” a tiuah. Lalpa thuthung thingkuang chu a giamun ua a puak tung uh ahi ti a het phat un,

⁷ Philistinte chu a lauthawng tau ah; amau chun, “Pathiante chu a giabuk un a hung tung ui,” a tiu a. Chuleh, “I chung uh a gik na e! Zia gual thil hi a la tung kha nai paw’ngâl in.

⁸ I chung uh a gik na e! Zia pathian hat takte khut ah kipat hin kua’n ei hukdok thei ta ding a hem? Zia pathiante hin gamthip ah khan, gawtna tincheng in Aiguptate kha a la gawt tau a.

⁹ Aw Philistinte haw, hangsan tak ah pang in, kipawsalsak unla, Hebraite I suak ua a um gual un amau nuai ah I umlona ding un kipawsalsak unla, do un,” a tiu a.

¹⁰ Tichun, Philistinte’n a hun do ua, Israelte chu a zo tauah; mi ti’n a In lam chiat un a taijak zo tauah. Kithana huaisia tak a hung um tai; Israel keng sepaite sîngthum zet thalup in a um tau a.

¹¹ Pathian thuthung thingkuang chule a lâkpiak tauah; Eli chate Hophni leh Phinehas le a thi tau hi.

Eli Thina

¹² Zia ni ma ma’ chun, Benjamin phung ah mi pakhat, a puante tel net nut leh a luchung leivui nât nem num in, kido’na kipat in Shiloh a hung tai tung a.

¹³ A hung tai tung hunah chun Eli chu Pathian thuthung thingkuang kha bang a chang na dia aw, ti ah dîpchak tak ah gelkawm in, lamlian pâmah a la kichut lai tak ahi’n. Mipa chu khawpi sung a hung lutah chanchin a genzaw phatin, khawpi sungah mi zosia chu a kap jak ziang tau a.

¹⁴ Eli chun mipi husa a het phat in, “Bang thu a hem?” ti’n a dong a. Ziaphatchun, mi pa chu a kiang ah hung in, Eli chu a hung hil ta’n.

¹⁵ Zia hun ah chun Eli chu kum sawmkua leh giat ah upa ahi tâk ziakin, a mit le a thim ta’n, a muchian thei ta puai.

¹⁶ Mi pa chun Eli kiang in, “Kido’na mun ah kipat hung tai dok ka hi; tu’ni’n kidona mun ka hun nusia mai ahi tai,” a tia. Eli chun, “Ka chapa, bang a ti’na em le?” ti’n a dong a.

¹⁷ Thangko’pa chun, “Philistinte âng ah Israelte a jamsia tauah; sepai hon lak ah mi tam tak a thiu hen, la chate Hophni leh Phinehas le a thi tau ah, Pathian thuthung thingkuang le ei lâkpiak tau hi,” ti’n a hun dawnhu tai.

¹⁸ Pathian thuthung thingkuang chungchâng a gen chu a het phat in, Eli chu kotkhak lam zuan ah a kichutna kipat thal pûk in, a têk tawh a tawi zo bêk ta pua, a ngawngpigu tatbong in a thi tai; Israelte chung ah kum sawmli vai a hawm hi.

¹⁹ Zia hun ah chun Phinehas ji, a monu chu nau nei vang vang ah nauvop ahi’n. Pathian thuthung thingkuang lâkpiak a hiu ti leh, a talpupa leh a pawsal le thi a hiu ti a het phat in, a bokkhupah nau a nei ngâl tai; a nauvei nat a huaisia ngâlah.

²⁰ A thi ding kuan in ama enkolnu chun a kiang in, “Lau kin, chapa la nei hi,” a hun tia. Himaleh, ama chun vang a dawnhu pua’n, a ngaisak diak ta puai.

²¹ Nausen min dingin Ikhabod a phuak ah, zia chu, “Lopina chun Israelte a nusia tai,” ti’na ahi. Pathian thuthung thingkuang lâkpiak a hitauah, a talpupa tawh a pawsal le a thi tâk ziak uh ahi.

²² Ama chun, “Pathian thuthung thingkuang lâkpiak ahi tâk ziak un, lopina chun Israel a nusia tai,” a ti ahi.