1 SAMUEL 31 - PATHIAN LEKHABU THIANGTHO (BSI)

Saul Tawh A Chate Thi’na

¹ Philistinte chun Israelte a do un; chuleh, Israel sepaite chu Philistinte lau in a jamsia tau a; tichun, Gilboa tâng ah chun thalup in a um zeng zung ziang tau hi.

² Philistinte chun Saul tawh a chapate chu a zo un; Saul chapa Jonathan, Abinadab tawh Malkhishua cheng chu Philistinte’n a that ua.

³ Zia kidona chu Saul â dingin a pan haksa deu deu ah, mêlmate thalpi chun nasa tak in a kâp liam tau hi.

⁴ Ziaphatchun, Saul in a gâlvan chawipa kiang ah chun, “Zia zektanlote hin kinoptatna ei mat zaw nung ua ei thalup tho tho sâng un, la chemjam khan ei sun thil ziang tiam in,” a tia. Himaleh, a gâlvan chawipa chun a bawl ngam lo ziakin a nuam ta pua’n. Tichun, Saul in a chemjam a jukdok ah, a baw tai.

⁵ A gâlvan chawipa chun Saul a thi tai ti a mu phât in, ama chemjam chu jukdok in a baw ah, a thi khawm tau a.

⁶ Tichun, Saul tawh, a chapa pathumte tawh, a gâlvan chawipa tawh a sepaite chu ni khat sung in a thi khawm tau hi.

⁷ Israel mipi, guamgâl lam leh Jordan lui gâl lam ah umte chun, Israel sepaite taijak leh, Saul tawh a chapate thi thu a het phat un, a khawpiteu taisan in a jam mang zo tau ah; tichun, Philistinte a hung un, bailam tak in a hun lua tau hi.

⁸ A jing ah mithite van chomkhawm ding ah Philistinte a hung phat un, Saul leh a chapa pathumte chu Gilboa tâng ah a thisa’n a vamudok tau hi.

⁹ A gawl a tan un, a gâlvanteu a sût piak un; tichun, Philistin gam sung zosia ah a milim hona Inteu leh mipite zosia kiang ah zia thupha chu puangjak dingin thangko a sawldok ua.

¹⁰ Saul gâlvante chu Astarte hona tempul sung in a koi un; a luang chu Beth-shan kulbâng in a kil dên tau hi.

¹¹ Himaleh, Saul chung ah Philistinte thilbawl dan haw chu Jabesh-gilead ah chêngte chun a hun het phat un,

¹² mi hangsan zosia a hung kuandok un, jan khawvak ah chia in, Beth-shan kulbâng ah Saul tawh a chate luang kikil dên haw chu a va ladok tau ah. Jabesh khua a hun paw tung un, zia tak ah chun a hâl tau hi.

¹³ A guteu chu a lau ah, Jabesh ah mangge thingbul nuai in a vui ua; ni sagi anngawl in a sûn tau hi.