1 SAMUEL 3 - PATHIAN LEKHABU THIANGTHO (BSI)

Samuel Ko ah A Umna leh A Nasepna

¹ Tu’hin naupang Samuel chu Eli nuai ah Lalpa nasem in a umah. Zia hun lai ah chun Lalpa‘n mite kiang in thu a gen vâng ma maah; kilâkna mu le a um kha talua puai.

² Zia hun ah chun Eli chu a têk tâk ziakin a mit a thim ta’n, bangma kichian tak in a muthei ta puai; tichun, a pindan in a lumah;

³ Lalpa âng ah thaumei chu a mit ma deu in, Lalpa tempul sungah Pathian thuthung thingkuang umna mun ah chun Samuel chule a lumah.

⁴ Ziaphatchun, Lalpa chun, “Samuel, Samuel,” ti’n a hun koah; ama’nle, “Zia hin ka um hi,” ti kawm in Eli kiang lam chu a del a;

⁵ Eli kiang ah chun, “Zia hin ka um hi, bang ding lei tia ei ko la hem?” a vatia. Himaleh, Eli chun, “Ka hun ko puai, valum kit in,” a tia. Tichun, a chia kit ah, a valum kit tai.

⁶ Lalpa‘n a hun ko kit ah, “Samuel, Samuel!” a hun tia. Samuel le thodok in, Eli kiang in a chia kit ah, “Zia hin ka um hi, bang ding ah lei ko a hem?” a tia. Himaleh, Eli chun, “Ka chapa, ka hun ko puai, valum kit in,” ti’n a la dawnhu a.

⁷ Zia hun ah chun Samuel in Lalpa a hechian naipua’n, Lalpa thu chu a kiang inle suklat in a um nai tadi puai.

⁸ Lalpa‘n a thumveina’n Samuel a hun ko kit ah. Ama le thodok in Eli kiang in a chiaah, “Lei ko’na gual in zia hin ka um hi,” ti’n a hung gen kit a. Ziaphatchun, Eli in naupang chu Lalpa‘n a hun ko a hi ti a he tai.

⁹ Tichun, Eli in Samuel kiang in, “Chia inla valum kit ta’n; a hun ko kit leh a kiang in, ‘Lalpa hun gen in, la suak hin ka la ngaitha zing hi,’ ti’n a la dawnhu in,” ti’n a hil a. Tichun, Samuel a chia ah, a lupna’n a lum kit tai.

¹⁰ Ziaphatchun, Lalpa a hung ah, zia tak ah chun a hung ding ta’n; tu’ma lam ah a hun ko gual khan, “Samuel, Samuel!” ti’n a hun ko kit a. Samuel in a dawnhu ngâlah, a kiang in, “Gen in, la suak hin ka la ngai thai,” a tia.

¹¹ Ziaphatchun, Lalpa chun Samuel kiang in, “Ngai in, Israelte lak ah thil pakhat hun bawl ding ka hi; zia chu a he zosia bil lang ni ah lengsi khuang ziang ding ahi.

¹² Zia ni phat chuleh, Eli Inkuan chung ah tung ding ah ka la gensa zosia kha, a bul ah kipat a tawp tiang in tun kimsak ding ka hi.

¹³ A chate’n Pathian a gensiatnau hezing ngâl in, a khawlo’nau haisan ding ah a hil lo ziakin, a In sung chu kumkhua’n gawt ding ka hi, ti ka la hilsa ahi tai.

¹⁴ Ziaziakchun, Eli Inkuante gitlona hi bang gualah kithoina leh thillat inle ngaidam hi talo hial ding ahi, ti’n sia ka sam ta a hi,” a hun ti tai.

¹⁵ Samuel chu zia mun ah chun a lum den ta’n; jingkal phatin Lalpa In kotkhakte chu a vahong ah. Samuel in a thil mute chu Eli kiang in a gendok ngam ta pua’n.

¹⁶ Himaleh, Eli in Samuel chu a ko ah a kiang in, “Ka chapa Samuel,” a tia. Ama’nle, “Zia hin ka um hi,” ti’n a dawnhu a.

¹⁷ Eli chun, “La kiang ah a gen kha bang a hem? Ka kiangah îm kin. La kiangah a gen kha lei hil noplo chun, Pathian in la chung ah a nop nop bawl ziang hen, a sângah khawk zaw’nle bawl mai ta hen,” ti’n a gen a.

¹⁸ Tichun, Samuel inle bangma îmlo in a leng in a gendok tai. Ziaphatchun, Eli in, “Lalpa ahi chu lam, pha a sak dan dan in bawl mai ta hen,” a ti tai.

¹⁹ Samuel a hung khanlet dungzui in Lalpa‘n a umpi zing ah, a thugen mal khat ziang le a thawn in a umsak puai.

²⁰ Chuleh, Dan ah kipat Beer-sheba tiang ah Israel mipi zosia chun Samuel chu, Lalpa jawlnei dik tak ahi ti a hechiat tau a.

²¹ Lalpa chu Shiloh ah chun a kilâk zing sek ah; Shiloh khua chun Lalpa chu Samuel kiang in a thu ah vakilâk zing sek ahi ngâl a.